Diborsio

Iti “Ti Kaamaan: Maysa a Waragawag iti Lubong,” ti Umuna a Panguluen ken ti Korum dagiti Sangapulo-ket-dua nga Apostol ket “sipapasnek[da] a mangiwaragawag nga inordenan ti Dios ti kallaysa iti nagbaetan ti maysa a lalaki ken maysa a babai ken ti kaamaan ti sentro iti plano ti Namarsua para iti agnanayon a pagtungpalan dagiti annakna” (kitaen iti panid 102 iti daytoy a libro). Iti baet dagitoy a kinapudno, nagbalinen ti diborsio wenno panagsina a gagangay iti adu a kagimongan ken nagrairan uray kadagiti miembro ti Simbaan. Saan nga aramid ti Dios daytoy agraira a didigra, ngem ketdi aramid daytoy ti kabusor.

Nasken nga agtinnulong dagiti agassawa tapno agbalinda a maikari kadagiti bendision ti agnanayon a kallaysa. No naasawaanka ket mapadpadasanyon nga agassawa dagiti panagrigat, laglagipem a ti pangrisut iti kaaduan a problema ti agassawa ket saan a diborsio wenno panagsina. Ti pangrisut ket masarakan iti ebanghelio ni Jesucristo—iti panagbabawi, pannakapakawan, integridad, ken ayat. Daytoy ket masarakan iti panangtratom iti asawam a kas iti kayatmo a pannakatratom (kitaen iti Mateo 7:12). Bayat ti panangitrabahom a mangrisut kadagiti pakarikutan, mabalin a kayatmo nga agpabalakadkayo iti bishop wenno branch presidentyo.