Pannakatnag
Iti Minuyongan ti Eden, imbilin ti Dios, “Kadagiti amin a kayo iti minuyongan, siwawayakayo a mangan, ngem iti kayo iti pannakaammo iti naimbag ken dakes, dikanto mangan, nupay kasta, siwawayaka a mangpili iti kayatmo, ta naited kenka; ngem, laglagipem nga iparitko, ta iti aldaw nga ikakaanmo iti daytoy awan duadua a mataykanto” (Moises 3:16–17). Gapu ta naglabsing da Adan ken Eva iti daytoy a bilin ket nanganda iti bunga ti kayo ti pannakaammo iti naimbag ken dakes, napapanawda manipud iti imatang ti Apo (kitaen iti DkK 29:40–41). Iti sabali a pannao, nakapadasda iti naespirituan nga ipapatay. Nagbalinda pay a mortal—makapadas iti pisikal nga ipapatay. Maawagan daytoy a naespirituan ken pisikal nga ipapatay iti Pannakatnag.
Ti Natnag a Kasasaadtayo
Kas an-annabo da Adan ken Eva, tawidentayo ti natnag a kasasaad kabayatan ti mortalidad wenno panagbiag iti daga (kitaen iti Alma 42:5–9, 14). Naisinatayo manipud iti imatang ti Apo ket makapadastayo iti pisikal nga ipapatay. Maipantayo pay iti kasasaad ti pagsusupadian a pakasubokantayo kadagiti rigat ti biag ken pannulisog ti kabusor (kitaen iti 2 Nephi 2:11–14; DkK 29:39; Moises 6:48–49).
Iti daytoy a natnag a kasasaad, adda parikuttayo iti kaunggantayo. Espiritu nga annaknatayo ti Dios, nga addaan iti potensial nga agbalintayo a “mairaman iti kinadios” (2 Pedro 1:4). Nupay kasta, “saankami a maikari [iti Dios]; gapu iti pannakatnag nagtultuloy a nagbalin a dakes ti kasasaadmi” (Ether 3:2). Masapul nga agtultuloytayo nga agkagumaan a mangparmek kadagiti saan a nalinteg a pagreggetan ken tarigagay.
Iti panangulitna kadagiti balikas ti maysa nga anghel, kinuna ni Ari Benjamin, “Agsipud ta kabusor ti Dios ti nailubongan a tao, ket kastan manipud iti pannakatnag ni Adan.” Imballaag ni Ari Benjamin nga iti daytoy nailubongan, wenno natnag a, kasasaad, agbalinto a kabusor iti Dios ti tunggal tao iti agnanayon “malaksid no sumuko iti panangawis ti Nasantuan nga Espiritu, ken ikkatenna ti nailubongan a kinatao ket agbalin a santo babaen ti pannubbot ni Cristo nga Apo, ket agbalin a kasla ubing, natulnog, nadayaw, napakumbaba, naanus, napnuan ayat, siaayat a mangtungpal iti amin a banag a makita ti Apo a rumbeng nga ipabaklay kenkuana, kas iti ubing a natulnog iti amana” (Mosiah 3:19).
Dagiti Pagimbagan ti Pannakatnag
Ti Pannakatnag ket napateg a paset ti plano ti pannakaisalakan ti Nailangitan nga Ama (kitaen iti 2 Nephi 2:15–16; 9:6). Mabalin daytoy a pannakatnag nga agpababa manipud iti nangatngato a kasasaad —ngem mangirugi met daytoy iti panagtuloy a panagdur-as ti tao. Kas nayon iti panangyam-ammo iti pisikal ken naespirituan nga ipapatay, nangted daytoy iti gundaway kadatayo a mayanak iti daga ken agsursuro ken dumur-as. Babaen ti nalinteg a panangaramattayo iti kinawaya nga agpili ken ti napudno a panagbabawitayo no agbasoltayo, makaasidegtayo ken Cristo ken, babaen ti Pannubbotna, makapagsaganatayo nga umawat iti sagut ti agnanayon a biag. Insuro ni propeta Lehi:
“No saan a naglabsing ni Adan, saan koma a natnag, ngem nagtalinaed koma iti minuyongan ti Eden. Ket nagtalinaed koma amin a banag a naparsua iti sigud a kasasaadda kalpasan ti pannakaparsuada; ket nagtalinaedda koma iti agnanayon, nga awan patinggana.
“ Ken awan koma ti annak da [Adan ken Eva]; gapuna nagtalinaedda koma iti kasasaad ti kinainosente, nga awanan iti ragsak, ta saanda nga ammo ti rigat; agaramid iti saan a naimbag, gapu ta saanda nga ammo ti basol.
“Ngem adtoy, naaramid amin a banag ti nasaririt a makaammo iti amin a banag.
“Natnag ni Adan tapno adda tao; ket ti panggep dagiti tao, ket tapno maaddaanda iti ragsak.
“Ket immay ti Mesias iti naituding a panawen, tapno subbotenna dagiti annak ti tao manipud iti pannakatnag” (2 Nephi 2:22–26; kitaen met iti 2 Nephi 2:19–21, 27).
Inyebkas da Adan ken Eva ti panagyamanda kadagiti bendision a simmangbay kas bunga ti Pannakatnag:
“Rinaem ni Adan ti Dios ket naparaburan, ket rinugianna ti nagipadto maipanggep kadagiti kaamaan iti daga, a kinunana: Madaydayaw koma ti nagan ti Dios, ta gapu iti panaglabsingko nalukatan dagiti matak, ken maaddaanak iti rag-o iti daytoy a biag, ket manen iti lasag makitakto ti Dios.
“Ket nangngeg ni Eva, ti asawana, amin dagitoy a banag ket naragsakan, ket kinunana: No saan a gapu iti panaglabsingmi saankami koma a naaddaan iti bukel, ket pulos a dimi naammuan ti naimbag ken dakes, ken ti rag-o iti pannakasubbotmi, ken ti agnanayon a biag nga ited ti Dios kadagiti amin a managtungpal” (Moises 5:10–11).
Pannakasubbot manipud iti Pannakatnag
Gapu iti natnag, mortal a kasasaaad ken dagiti bukodtayo a basbasol, ti laeng namnamatayo ket adda ken ni Jesucristo ken ti plano ti pannakasubbot.
Babaen ti Pannubbot ti Jesucristo, masubbotto ti tunggal maysa manipud kadagiti epekto ti Pannakatnag. Agungartayonto, ket maisublitayonto iti sidong ti Apo tapno maukom (kitaen iti 2 Nephi 2:5–10; Alma 11:42–45; Helaman 14:15–17).
Kas nayon iti pannakasubbottayo manipud kadagiti sangalubongan nga epekto ti Pannakatnag, masubbotnatayo ti Mangisalakan manipud kadagiti bukodtayo a basbasol. Iti natnag a kasasaadtayo, agbasol ken mayadayotayo ti bagbagitayo manipud iti Apo, a mangisangbay iti naespirituan nga ipapatay iti bagbagitayo. Kas iti kinuna ni Apostol Pablo, “Isuda amin nagbasolda, ket agkurangda iti dayag ti Dios” (Taga Roma 3:23). No agtalinaedtayo iti basbasoltayo, saantayo a makapagindeg iti sidong ti Dios, gapu ta “awan ti narugit a banag a makapagtaeng … iti sidongna” (Moises 6:57). Siyayaman, ti Pannubbot “yegna ti pannakatungpal ti wagas ti panagbabawi” (Helaman 14:18), a mangaramid a mabalintayo nga awaten ti pannakapakawan dagiti basbasoltayo ken agindeg iti sidong ti Dios iti agnanayon. Insuro ni Alma, “Adda panawen a naited iti tao nga agbabawi; ngarud nagbalin daytoy a biag a pakatingitingan; panawen a panagsagana a sumabat iti Dios; panawen a panagsagana para iti awan patinggana a kasasaad a naisaomin, nga isu ti kalpasan ti panagungar dagiti natay” (Alma 12:24).
Panagyaman iti Pangsubbot a Sakripisio ti Mangisalakan
Kas iti saantayo a panagtarigagay iti taraon agingga a ditayo mabisin, ditayo agtarigagay iti agnanayon a pannakaisalakan agingga a ditayo mabigbig ti panagkasapulantayo iti Mangisalakan. Umay daytoy a pannakabigbig bayat ti panagdur-astayo iti pannakaawattayo maipapan iti Pannakatnag. Kas iti insuro ni propeta Lehi, “Mapukawto ken addanto iti pannakatnag ti sangkataw-an, ket nasken nga agtalekda itoy a Mannubbot tapno maisalakanda” (1 Nephi 10:6).