Aramid iti Family History ken Genealogy

Idi maika-3 ti Abril 1836, immay ni propeta Elias kada Joseph Smith ken Oliver Cowdery iti Templo ti Kirtland. Intalekna kadakuada ti pangilantip a bileg ti priesthood, a namagbalin a mailantip dagiti pamilia iti amin a kaputotan. Iti panangitalekna iti daytoy a bileg, impatungpalna ti pammadto nga isu ket ibaonto ti Apo nga “isublinanto ti puso dagiti amma kadagiti annak, ken ti puso dagiti annak kadagiti ammada” (kitaen iti DkK 110:14–16; kitaen met iti Malakias 4:5–6).

Babaen ti aramid iti family history, mabalinmo ti makiraman iti panagtultuloy a pannakaipatungpal daytoy a pammadto. Masursurom ti maipapan kadagiti kapuonam ken mapadakkelmo ti ayatmo kadakuada. Maparegtaka babaen kadagiti estoriada maipapan iti kinatured ken pammati. Mabalinmo nga ipasa dayta a tawid kadagiti annakmo.

Dagitoy ti manayon a pagimbagan a naggapu iti aramid iti family history, ngem saanda a kangrunaan a gapu para iti dakkel a panagkagumaan ti Simbaan a mangummong kadagiti rekord dagiti kapupuon. Amin nga aramid ti Simbaan iti family history ket maiturong iti panagkasapulan a mangbukel iti “mamagtugmok a saanen nga agsina … iti nagbaetan dagiti amma ken dagiti annak” (DkK 128:18). Daytoy a mamagtugmok [welding link] ket buklen ti bileg ti priesthood, babaen dagiti sagrado nga ordinansa ti templo nga awatentayo a maipaay kadagiti kapuonantayo.

Pannakasubbot dagiti Natay

Adu kadagiti annak ti Nailangitan nga Ama ti pimmusayen a saan a naaddaan iti gundaway nga umawat iti pakabuklan ti ebanghelio. Iti asi ken awan patinggana nga ayatna, nangisaganan ti Apo iti wagas a pakagun-odanda iti pammaneknek maipapan iti ebanghelio ken pangawatanda kadagiti pangisalakan nga ordinansa ti priesthood.

Iti lubong ti espiritu, ti ebanghelio ket “maikasaba kadagiti natay[en] a sibabasol, a di nakaammo iti kinapudno, wenno nagsalungasing, a nangsupring kadagiti propeta. Naisuro dagitoy iti pammati iti Dios, panagbabawi iti basol, panangisaup a panagbuniag para iti pannakaugas ti basbasol, ti sagut ti Espiritu Santo babaen ti panangipatay kadagiti dakulap ken amin a sabsabali pay a pagbatayan ti ebanghelio a nasken a maammuanda tapno maikarida a maukom a maibatay kadagiti tao iti lasag, ngem agbiag a maibatay iti Dios iti espiritu” (DkK 138:32–34).

Adu iti lubong ti espiritu ti umawat iti ebanghelio. Nupay kasta, saanda a maawat dagiti ordinansa ti priesthood para iti bagbagida gapu ta awananda kadagiti pisikal a bagi. Kadagiti nasantuan a templo, addaantayo iti pribilehio ti panangawat kadagiti ordinansa nga agpaay kadakuada. Iraman dagitoy nga ordinansa ti panagbuniag, kumpirmasion, ordinasion iti Melchizedek Priesthood (para kadagiti lallaki), ti endowment, ti pangilantip a kallaysa, ken ti pannakailantip dagiti annak kadagiti nagannak. Impalgak ti Apo daytoy nga aramid ken ni Propeta Joseph Smith, a mangisubli iti aramid a naipalgak idin kadagiti Kristiano kalpasan laeng ti Panangungar ni Jesucristo (kitaen iti 1 Taga Corinto 15:29).

Bayat ti yaawatmo kadagiti ordinansa ti priesthood a maipaay kadagiti pimmusayen, agbalinka a mangisalakan iti Bantay Zion para kadakuada (kitaen iti Abdias 1:21). Ti panagkagumaam ket maipada iti espiritu ti pangsubbot a sakripisio ti Mangisalakan—annongem ti maysa a pangisalakan nga aramid para kadagiti dadduma a saanda a kabaelan nga aramiden para iti bagbagida.

Dagiti Pagrebbengam iti Aramid iti Family History

Iti aramid iti family history, addaanka iti tallo a kangrunaan a pagrebbengan:

Awatem dagiti ordinansa iti templo para iti bagim ket tulongam dagiti miembro ti pamiliam nga umawatda met kadagitoy.
Maaddaan iti agdama a temple recommend ket dumar-ay iti templo a masansan no ipalubos dagiti kasasaad.
Mangummong iti impormasion iti family history tapno makatulongka kadagiti kapuonam nga umawat kadagiti bendision ti templo.

Mabalinmo ti makiraman iti aramid iti templo ken family history, iti uray sumagmamano a sakup, sadino man ti pagnaedam ken ania man dagiti kasasaadmo. Idinto a nalabit a saanmo a kabaelan nga aramiden ti amin a banag, makaaramidka iti maysa a banag. Mabalin a makatulong kenka dagiti sumaganad a kapanunotan a mangirugi:

Isuratmo dagiti napapateg a detalye maipapan iti bukodmo a biag. Isuratmo ti petsa ti pannakayanakmo ken lugar a nakayanakam ken dagiti petsa ti panagbuniag ken kumpirmasionmo. Mangidulinka iti personal a journalmo a pagisuratam kadagiti bugas wenno highlights ti biagmo, agraman dagiti bukodmo a padas a mangpapigsanto iti pammati dagiti annakmo ken ti dadduma pay a masakbayan a kaputotan.
Ammuem ti maipapan kadagiti kapuonam. Mangrugika babaen iti panangisuratmo iti impormasion manipud iti lagip ken manipud kadagiti magun-od a pagalaan iti pagtaengan. Isuratmo ti napateg nga impormasion a siuumno a malagipmo wenno masarakam maipapan kadagiti kakabsat, nagannak, uuliteg ken iikit, lelong ken lelang, ken lelong ken lelang iti tumeng. Iti lugar a mabalin, manggun-od iti kopia dagiti sertipiko wenno dadduma pay a dokumento a mangiraman iti daytoy nga impormasion. Bayat ti panangummongmo iti ad-adu pay nga impormasion, mabalin a kayatmo ti agsukisok iti dadduma pay a lugar, kas kadagiti kasuratan iti publiko. Mabalin nga addaan ti lokal a ward wenno branch iti family history consultant a makatulong kenka. Mabalin a kayatmo pay a bisitaen ti official Web site ti Simbaan para iti family history, www.familysearch.org.
Bayat ti panangilasinmo kadagiti kapupuonmo, usarem dagiti pedigree tsart ken porma ti ragup ti pamilia tapno pangisuratan iti impormasion a masarakam. Sidadaan a magun-od dagitoy a porma iti papel ken kadagiti pay programa ti software a patpatauden ti Simbaan, kas iti Personal Ancestral File.

No naummongmon ti kasapulan nga impormasion maipapan kadagiti kapuonam a pimmusayen a saan a nakaawat iti ebanghelio, penkem a maannong ti aramid iti templo para kadakuada. Uray no saanka nga agnanaed iti asideg ti maysa a templo tapno makaaramidkayo kadagiti miembro ti pamiliam iti aramid nga ordinansa, mabalinmo ti mangipatulod iti nagnagan dagiti kapuonam iti maysa a templo tapno maaramid dagiti dadduma ti aramid para kadakuada. Mabalinmo a sarungkaran ti asideg a family history center wenno makipagkitaka kadagiti family history consultant ti lokal a ward wenno branch tapno makitam no kasano nga aramiden daytoy.

Impakdaar ni Propeta Joseph Smith nga adda dagiti “pagbatayan dagitoy a mayalubog kadagiti natay ken dagiti sibibiag a saan a nalaklaka a palabsen lattan, a maipapan iti pannakaisalakantayo. Ta nasken ken kasapulan unay ti pannakaisalakanda iti pannakaisalakantayo, kas … kadakuada saanda a makapagbalin a naan-anay no awantayo—kasta met a saantayo a makapagbalin a naan-anay no awan dagiti minataytayo” (DkK 128:15). Babaen ti pannakiramanmo iti aramid iti family history, saanka ken dagiti kapuonam a makapagdur-as nga agturong iti pannakaisalakan.