Family Home Evening

Ti pagtaengan ti kapatgan a lugar a pagsursuruan iti ebanghelio. Awan ti sabali pay nga organisasion a mabalin a mangsukat iti pamilia. Naulit-ulit nga inyawag dagiti propeta iti ud-udina nga aldaw kadagiti nagannak a padakkelenda dagiti annakda iti ayat ken panangisuro iti ebanghelio.

Idi 1915 inrugi ni Presidente Joseph F. Smith ken dagiti mamagbagana iti Umuna a Panguluen ti sapasap a panagkagumaan ti Simbaan a mangpapigsa iti pamilia. Inyawagda kadagiti nagannak iti Simbaan nga ummongenda dagiti annakda iti maminsan iti makalawas para iti maysa a “Home Evening.” Nasken a maaddaan dagiti pamilia iti oras nga aggigiddan nga agkararag ken agkanta, agbasa kadagiti nasantuan a kasuratan, isuro ti ebanghelio iti tunggal maysa, ken makiraman iti dadduma pay nga aktibidad a mangparnuay iti panagkaykaysa ti pamilia.

Idi 1970 nakikaysa ni Presidente Joseph Fielding Smith kadagiti mammagbagana iti Umuna a Panguluen tapno ilatangda ti rabii ti Lunes kas oras para iti family home evening. Manipud iti dayta a panangipakaammo, pinagtalinaeden ti Simbaan dagiti rabii ti Lunes a nawaya manipud kadagiti aktibidad iti Simbaan tapno maaddaan dagiti pamilia iti daytoy nga oras a makapagtitipon.

Intultuloy dagiti propeta iti ud-udina nga aldaw ti nangallukoy kadagiti miembro ti Simbaan tapno ikkanda iti kangatuan a panangipangpangruna iti family home evening. Inkarida a ti dedikasiontayo iti daytoy a programa ket makatulongto a mangsaluad kadagiti pamilia a maibusor kadagiti dakes iti panawentayo ken mangisangbayto kadatayo iti nawadwad a rag-o ita ken iti unos ti kinaagnanayon.

Nasken iti amin a miembro ti Simbaan a mangaramid iti rabii ti Lunes a sagrado nga oras, a nailatang para iti family home evening. No naasawaankan, maadaankayo iti asawam iti linawas a family home evening. No addaankayo kadagiti annak, iramanyo ida iti family home evening. Ibagayyo ti programa kadagiti kasapulan ken pagesmanda, ket bay-an ida a makiraman. Kalpasan a dimmakkelen dagiti annakmo ket immadayoda, ituloyyo nga agassawa ti mangangay iti family home evening.

No awan asawam wenno agmaymaysaka, idawatmo iti bishop wenno branch presidentmo a mangbukel iti grupo ti home evening para kenka ken iti dadduma pay nga awan asawana a miembro ti ward wenno branchyo. Mabalinna ti umawag iti lider ti home evening, nga akinrebbeng a mangbuangay iti programa ken mangkita a maangay dagiti home evening iti linawas.

Naisingasing a balabala para iti family home evening ti sumaganad:

Panglukat a kanta
Panglukat a kararag
Panagbasa iti nasantuan a kasuratan
Leksion
Aktibidad
Panggibus a kanta
Panggibus a kararag
Merienda

Bayat ti panagisaganam kadagiti leksion para iti family home evening, laglagipem nga ibasarmo dagitoy kadagiti nasantuan a kasuratan, dagiti pannursuro dagiti propeta iti ud-udina nga aldaw, ken dagiti personal a padas ken pammaneknek. Makatulong daytoy a libro iti panangpili kadagiti topiko nga isuro. Kas pangnayon, mabalinmo ti agibasar iti dadduma pay a pablaak ti Simbaan, kas iti Family Home Evening Resource Book (item number 31106), Dagiti Pagbatayan ti Ebanghelio (06195 864), ti Pagbasaan a Mangiwanwan iti Kaamaan (31180 864), ken dagiti magasin iti Simbaan.