Panagayuno ken dagiti Daton iti Panagayuno
Ti agayuno ket saan a pannangan ken saan a yiinum a sitatallugod iti uneg ti masinunuo a panawen. Ti panagayuno a buyogan ti napasnek a panagkararag ket makatulong kenka a mangisagana iti bagim ken iti dadduma pay tapno umawat kadagiti bendision ti Dios.
Dagiti Panggep ti Panagayuno
Iti maysa a gundaway, pinaruar ti Mangisalakan ti sairo manipud iti maysa nga ubing ken inaramatna daytoy a padas tapno maisuro dagiti disipulona maipanggep iti panagkararag ken panagayuno. Nagsaludsod Kenkuana dagiti disipulona, “Apayapay isu dikam nabalinan a pinaruar?” Insungbat ni Jesus: “Gapu iti bassit a pammatiyo: ta pudno kunak kadakayo, A no adda koma pammatiyo a kas iti bukel ti mustasa, kunaenyonto itoy bantay, Umaliska manipud ditoy agingga idiay a disso; ket umalisto; ket awanto ti di mabalin kadakayo. Ngem daytoy a kita saan a rummuar no di gapu iti panagkararag ken panagayunar.” (Kitaen iti Mateo 17:14–21.)
Isuro daytoy a pakaammuan a ti panagkararag ken panagayuno ket makaited iti nayon a pigsa kadagitay mangmangted ken umaw-awat kadagiti bendision ti priesthood. Mayaplikar pay daytoy a pakaammuan kadagiti bukodmo a panagkagumaan nga agbiag wenno agtungpal iti ebanghelio. No addaanka iti maysa a pagkapsutan wenno basol nga inkarigatam a parmeken, mabalin a kasapulam ti agayuno ken agkararag tapno maawatmo ti tulong wenno pammakawan a tarigagayam. Kas iti demonio a pinaruar ni Cristo, ti panagkarigatam ket mabalin a kita a maparuarto babaen laeng ti panagkararag ken panagayuno.
Mabalinmo ti agayuno para iti adu a panggep. Ti panagayuno ket maysa a wagas ti panagdaydayaw iti Dios ken panangipeksa iti panagyaman Kenkuana (kitaen iti Lucas 2:37; Alma 45:1). Mabalinmo ti agayuno no agkiddawka iti Nailangitan nga Ama a bendisionanna ti masakit wenno ti agsagsagaba (kitaen iti Mateo 17:14–21). Mabalin a makatulong ti panagayuno kenka ken kadagitay ay-ayatem nga umawat iti personal a paltiing ken agbalin a napasurot iti kinapudno (kitaen iti Alma 5:46; 6:6). Babaen ti panagayuno makagun-odka iti pigsa a mangkedked iti pannulisog (kitaen iti Isaias 58:6). Mabalinmo ti agayuno bayat panagkagumaam nga ipakumbaba ti bagim iti sango ti Dios ken aramatem ti pamatim ken ni Jesucristo (kitaen iti Omni 1:26; Helaman 3:35). Mabalinmo ti agayuno tapno umawat iti pannarabay iti panangibinglay iti ebanghelio ken panangipatungpal a naimbag kadagiti awag iti Simbaan (kitaen iti Dagiti Aramid 13:2–3; Alma 17:3, 9; 3 Nephi 27:1–2). Mabalin a buyogan ti panagayuno ti nalinteg a panagleddaang wenno panagun-unnoy (kitaen iti Alma 28:4–6; 30:1–2).
Domingo a Panagayuno
Ilatang ti Simbaan ti maysa a Domingo iti binulan, a gagangay nga iti umuna a Domingo, kas maysa nga aldaw ti panagayuno. Ti umisu a panagtungpal iti Domingo a panagayuno ket pakairamanan ti saan a pannangan ken yiinum iti dua nga agsaruno a pannangan, idadar-ay iti miting ti panagayuno ken panagpaneknek, ken panangted iti daton iti panagayuno a pangtulong a mangaywan kadagitay agkasapulan.
Nasken a ti datonmo iti panagayuno ket saan a nababbaba ngem ti pateg ti dua a pannangan a liniwatam. No mabalin, agbalinka koma a managparabur ket mangtedka iti nawadwadwad pay ngem daytoy a gatad.
Kas pangnayon iti panangsurot kadagiti aldaw a panagayuno nga inlatang dagiti lider ti Simbaan, mabalinmo ti agayuno iti ania man a sabali pay nga aldaw, a maibatay kadagiti kasapulam ken kasapulan dagiti dadduma pay. Nupay kasta, nasken a saanka nga agayuno iti masansan unay wenno iti nalablabes a panawen.
Ti Pudno a Panagayuno
Iti Kaskasaba idiay Bantay, insuro ni Jesus ti pudno a kita ti panagayuno. Nagsarita a maibusor kadagiti managinsisingpet, no agayunoda, “baliwanda ti rupada tapno agparangda a nagayunar kadagiti tattao.” Imbes a panangipakita iti akinruar a kinalinteg, nasken nga agayunoka “ken Amam nga adda iti nalimed: ket ni Amam a makakita iti nalimed, gunggonaannakanto” (Mateo 6:16–18).
Insuro pay ni propeta Isaias ti pudno a kaipapanan ti panagayuno: “Saan a daytoy aya ti panagayunar a pinilik? tapno pangketta kadagiti galut ti kinadangkes, tapno pangwarwar kadagiti patapat ti sangol, ket tapno pagwayawayaen ti mailuplupit, ken tapno bungtolenyo koma ti tunggal sangol? Saan aya a tapno iwarasmo ti tinapaymo iti mabisin, ken ti panangalam iti balaymo iti napanglaw a napagtalaw? no makitam ti silalamolamo, tapno isu kawesam; ket dika koma baybay-an ti lasagmo met laeng?” (Isaias 58:6–7).
Impaneknek pay ni Isaias maipapan kadagiti bendision a sumangbay no agtungpaltayo iti linteg ti panagayuno: “Iti kasta agbannawagto ti lawagmo a kas iti agsapa ket ta isasalun-atmo sumantakto a sisisiglat unay: ket ta kinalintegmo mapanto iti sanguanam; ti dayag ni Jehova isunto ti agaywan iti malikudam. Iti kasta umawagkanto, ket ni Jehova sumungbatto; umikkiskanto, ket isu kunaennanto, Addaak ditoy. … No ta kararuam manangngaasi iti mabisin, ket bussogem ti kararua a mapaladingit; iti kasta tumangkayagto ti lawagmo iti kasipngetan, ket ta kinakudrepmo kasla iti matoon: ket ni Jehova idalannakanto a kankanayon, ken pennekennanto ta kararuam idiay natikag a disso, ken papigsaennanto dagiti tultulangmo: ket mayarigkanto iti nadanum a minuyongan ken kas iti ubbog ti danum, a dagiti dandanumna saanda nga agatian” (Isaias 58:8–11).