Kinadios

Dakamaten ti umuna a pagannurotan ti pammati, “Mamatikami iti Dios, ti Agnanayon nga Ama, ken iti Anakna, ni Jesucristo, ken iti Espiritu Santo.” Dagitoy tallo a kinatao ti mangbukel iti Kinadios. Idauluanda daytoy a lubong ken ti amin a dadduma pay a pinarsua ti Amatayo iti Langit.

Napukaw ti pudno a doktrina ti Kinadios iti ikakalilis iti kinapudno kalpasan ti mortal a panagministro ti Mangisalakan ken ti ipapatay dagiti Apostolna. Nangrugi a naisubli daytoy a doktrina idi inawat ti agtawen iti 14 a ni Joseph Smith ti Umuna a Parmatana (kitaen iti Joseph Smith—Pakasaritaan 1:17). Manipud iti pakasaritaan ti Propeta maipapan iti Umuna a Parmata ken manipud iti dadduma pay a pannursurona, ammotayo a nagsina a tallo a kinatao ti Kinadios. Addaan ti Ama ken ti Anak iti marikna a bagi a nagtagilasag ken nagtagitulang, ket ti Espiritu Santo ti kinatao ti espiritu (kitaen iti DkK 130:22).

Nupay agduduma a kinatao dagiti kameng ti Kinadios nga addaan iti agduduma nga akem, agkaykaysada iti panggep ken doktrina. Naan-anay a nagkaykaysada iti panangipatungpal iti nadiosan a panggep ti pannakaisalakan ti Nailangitan nga Ama.