Panagyaman

ti Apo, “Isu nga umawat iti amin a banag a siyayaman maidaydayawto” (DkK 78:19). Ti panagyaman ket makaitag-ay, makaitan-ok a galad. Mabalin a maisaom manipud iti padasmo a naragragsakka no adda panagyamanmo iti pusom. Saanka a masaktan iti nakem, makagura, wenno makapagtangsit no managyamanka.

Agyamanka kadagiti nakaskasdaaw a bendision nga adda kenka. Agyamanka kadagiti adu a gundaway nga adda kenka. Agyamanka kadagiti nagannak kenka. Ipakaammom kadakuada ti panagyamanmo. Agyamanka kadagiti gagayyemmo ken mannursurom. Ipeksam ti panagyaman iti tunggal maysa nga agar-aramid kenka iti pabor wenno tumultulong kenka iti ania man a wagas.

Agyamanka iti Nailangitan nga Amam iti kinaimbagna kenka. Maipeksam ti panagyamanmo iti Dios babaen ti panangbigbigmo iti imana iti amin a banag, panagyamanmo Kenkuana iti amin nga it-itedna kenka, panagtungpalmo kadagiti bilinna, ken panagserbim kadagiti dadduma. Agyamanka Kenkuana para iti Patpatgenna nga Anak, ni Jesucristo. Ipeksam ti panagyamanmo iti naindaklan a pagwadan ti Mangisalakan, kadagiti pannursurona, iti manangtulong nga imana a mangitag-ay ken tumulong, iti awan patinggana a Pannubbotna.

Agyamanka iti Apo iti naisubli a Simbaanna. Agyamanka Kenkuana iti amin nga idiayana kenka. Agyamanka Kenkuana para kadagiti gagayyem ken pamilia. Patarabay ken pabendisionam koma iti espiritu ti panagyaman dagiti aldaw ken rabiim. Itrabahom ti panagbalin a managyaman. Matakuatamto a mangyeg daytoy kadagiti nakaskasdaaw a resulta.