Impierno

Dakamaten dagiti paltiing iti ud-udina nga aldaw maipapan iti impierno iti dua laeng a wagas. Umuna, daytoy ti sabali pay a nagan para iti pagbaludan ti espiritu, maysa a lugar iti lubong ti espiritu kalpasan ti ipapatay para kadagitay “natay a sibabasol, a di nakaammo iti kinapudno, wenno nagsalungasing, a nangsupring kadagiti propeta” (DkK 138:32). Daytoy ket saan nga agbayag a kasasaad a pakaisuruanto dagiti espiritu iti ebanghelio ken maaddaanda iti gundaway nga agbabawi ken umawat kadagiti ordinansa ti pannakaisalakan a maannong para kadakuada kadagiti templo (kitaen iti DkK 138:30–35). Mabalin dagiti umawat iti ebanghelio ti agindeg iti paraiso agingga iti Panagungar. Kalpasan a mapagungar ken maukomda, umawatdanto iti tukad ti gloria a pakaikarianda. Dagiti mangpili a di agbabawi ngem saanda nga annak a lallaki ti manangdadael ket agtalinaeddanto iti pagbaludan ti espiritu agingga iti gibus ti Milenio, inton mawayawayaanda manipud iti impierno ken iti pannakadusa ken mapagungarda a maipan iti telestial a gloria (kitaen iti DkK 76:81–85).

Maaikadua, maus-usar ti balikas nga impierno a mangitudo iti akinruar a kasipngetan, a daytoy ti pagyanan a lugar ti sairo, dagiti anghelna, ken dagiti annak a lallaki ti manangdadael (kitaen iti DkK 29:36–38; 76:28–33). Dagiti annak a lallaki ti manangdadael ket isu dagiti umawat iti “awan ti pannakapakawan iti daytoy a lubong wenno iti umay a lubong—iti panangtallikud iti Nasantuan nga Espiritu kalpasan ti panangawat, ken iti panangtallikud iti Bugbugtong nga Anak ti Ama, iti panangilansada kenkuana ken iti panangibabainda” (DkK 76:34–35; kitaen met iti 76:31–33, 36–37). Saanto nga agtawid dagiti kasta a tao iti maysa a lugar iti ania man a pagarian ti gloria; agtalinaed dagiti kasasaad ti impierno para kadakuada (kitaen iti DkK 76:38; 88:24, 32).