Jesucristo
Idi Enero 1, 2000, nangipaulog ti Umuna a Panguluen ken ti Korum dagiti Sangapulo-ket-dua nga Apostol iti sumaganad a palawag. Napauluan iti “Ti Sibibiag a Cristo,” daytoy a palawag ti mangipaneknek ken ni Cristo ken manggupgop iti pakabigbigan ken nadiosan a misionna:
“Bayat ti panagrambaktayo iti pannakayanak ni Jesucristo dua ribu a tawenen ti napalabas, iruknoymi ti pammaneknekmi maipapan iti kinapudno ti awan pakaipadaanna a biagna ken iti awan patinggana a saguday ti naindaklan a pangsubbot a sakripisiona. Awan ti sabali pay a napalpalaus nga impluwensia iti amin a nagbiagen ken agbiagto pay laeng ti daga.
“Isu ti Naindaklan a Jehova ti Daan a Tulag, ti Mesias ti Baro a Tulag. Iti babaen ti panangiturong ti Amana, Isu ti namarsua ti daga. ‘Dagiti isu amin napaaddada gapu kenkuana; ket no isu awan awan ti napaadda kadagiti adda’ (Juan 1:3). Nupay awan basolna, nabuniagan tapno ipatungpalna iti amin a kinalinteg. Isu ‘namagpagna a nagar-aramid iti kinaimbag’ (Dagiti Aramid 10:38), ngem nauyaw gapu iti daytoy. Ti ebangheliona ti mensahe ti kappia ken pagimbagan. Impakaasina iti amin a sumurot iti pagwadanna. Nagna kadagiti kalsada ti Palestina, nangag-agas kadagiti masakit, nangpasubli iti panagkita dagiti bulsek, ken nangpagungar kadagiti natay. Insurona dagiti kinapudno ti kinaagnanayon, ti kinapudno ti kaaddatayo sakbay a nayanaktayo, ti panggep ti biag iti daga, ken ti potensial dagiti annak a lallaki ken annak a babbai ti Dios iti umay a biag.
“Inyam-ammona ti sakramento kas panglaglagip iti naindaklan a pangsubbot a sakripisiona. Natiliw ken nakondena kadagiti inuulbod a pammabasol, nakedngan tapno mangpatgan iti tarigagay ti bunggoy dagiti managdakdakes, ket nakedngan a matay iti krus ti Kalbario. Intedna ti biagna a mangsubbot iti basbasol ti amin a sangkataw-an. Isu ti naindaklan a sagut a pangisaup a mangipaay iti amin nga agbiagto iti daga.
“Sipapasnekkami a mangipaneknek a ti biagna, a kangrunaan iti pakasaritaan ti amin a sangkataw-an, saan a nangrugi iti Betlehem wenno naggibus iti Kalbario. Isu ti Inauna ti Ama, ti Bugbugtong nga Anak iti lasag, ti Mannubbot ti lubong.
“Nagungar manipud iti tanem tapno ‘agbalin nga umuna a bunga kadagiti matmaturog’ (1 Taga Corinto 15:20). Kas Nagungar nga Apo, sinarungkaranna dagiti inayatna iti biag. Nagministro pay kadagiti ‘sabsabali a karnerona’ (Juan 10:16) iti nagkauna nga America. Iti kabaruanan a lubong, nagpakita Isu ken ti Amana iti ubing a ni Joseph Smith, a mangasikaso iti nabayagen a naikari a ‘pannakatungpal dagiti panawen’ (Taga Efeso 1:10).
“Maipapan iti Sibibiag a Cristo, insurat ni Propeta Joseph Smith: ‘Kasla dumardarang nga apuy dagiti matana; puraw ti buokna a kas iti puro a niebe; naranraniag ti rupana ngem iti init; ket ti timekna kas iti anasaas ti dakkel a danum, a kas iti timek ni Jehova, a nagkuna:
“‘Siak ti umuna ken maudi; Siak ti nagbiag, siak ti napapatay; siak ti mangibabaet kadakayo iti Ama’(DkK 110:3–4).
“Maipapan Kenkuana impakdaar pay ti Propeta: ‘Ket ita, kalpasan ti adu a pammaneknek a naipaay kenkuana, daytoy ti pammaneknek, a maudi iti amin, nga ipaaymi kenkuana: A sibibiag!
“‘Ta nakitami, uray iti makanawan ti Dios; ket nangngegmi ti timek a mangpaneknek nga isu ti Bugbugtong ti Ama—
s“‘A babaen kenkuana, ken gapu kenkuana, ken kenkuana, mabukel ken nabukel dagiti lubong, ket nagbalin nga annak a lallaki ken babbai ti Dios dagiti agindeg kadagitoy’ (DkK 76:22–24).
“Ipakdaarmi iti balikas nga addaan iti kinapasnek a naisublin iti daga ti kinasaserdote ken ti Simbaanna—‘a nabangon iti rabaw ti cimiento … dagiti apostol ken mammadto, ket ni Jesucristo met laeng ti bato a nangnangruna ti iking’ (Taga Efeso 2:20).
“Ipaneknekmi nga iti maysa nga aldaw agsublinto Isuna iti daga. ‘Ken ti dayag ni Jehova maiparangarangto, ken amin a lasag isu makitadanto amin’ (Isaias 40:5). Agturayto kas Ari dagiti Ar-ari ket agturay kas Apo dagiti Appo, ket agparintumengto ti tunggal tumeng ket agsaonto ti tunggal dila kas pagdaydayaw iti sanguananna. Agtakderto ti tunggal maysa kadatayo tapno ukomennatayo a mayannurot kadagiti aramidtayo ken dagiti tarigagay ti puspusotayo.
“Iburaymi ti pammaneknekmi, kas maikari a naordenan nga Apostolna—a ni Jesus ti sibibiag a Cristo, ti imortal nga Anak ti Dios. Isu ti naindaklan nga Ari Emannuel, nga agtakder ita iti makanawan nga ima ti Amana. Isu ti silaw, ti biag, ken ti namnama ti lubong. Ti dalanna isu ti dana nga agturong iti kinaragsak iti daytoy a biag ken agnanayon a biag iti umay a lubong. Agyamantayo iti Dios para iti awan kapadana a sagut ti nadiosan nga Anakna” (Ensign, Abr. 2000, 2–3).