Joseph Smith
Iti panagsusulbod ti 1820, agsapsapul ti 14-ti-tawenna a Joseph Smith iti pudno a Simbaan ni Jesucristo idi nabasana ti maysa a binatog iti Biblia: “No siasino man kadakayo ti agkurang iti kinasirib, agdawat koma iti Dios, isu a mangted a sikakaasi kadagiti isu amin, ket saan a mangpabain; ket maitedto kenkuana” (Santiago 1:5; kitaen met iti Joseph Smith—Pakasaritaan 1:11–12). Addaan iti gagangay, awan duadua a pammatina, sinurot ti ubing a ni Joseph ti balakad iti dayta a binatog. Napan nga agmaymaysa iti kakaywan, a nagkararaganna tapno ammuen no ania a simbaan ti nasken a pakikamenganna. Kas sungbat iti kararagna, nagparang ti Dios nga Ama ken ni Jesucristo kenkuana. Maibilang iti dadduma pay a banag, imbagada kenkuana a nasken a saan nga agkameng kadagitoy a simbaan nga adda idi. Kitaen iti Joseph Smith—Pakasaritaan 1:13–20.
Bayat ti panangipaneknek ni Joseph Smith iti pannakaikarina, naikkan iti nadiosan a mision kas maysa a propeta ti Dios. Babaen kenkuana, impatungpal ti Apo ti maysa a naindaklan ken nakaskasdaaw nga aramid a nangiraman iti pannakaisangbay ti Libro ni Mormon, pannakaisubli ti priesthood, pannakaipalgak dagiti napapateg a kinapudno ti ebanghelio, pannakabangon ti pudno a Simbaan ni Jesucristo, ken pannakaipasdek ti aramid iti templo. Idi Hunio 27, 1844, napapatay ni Joseph ken ti kabsatna a ni Hyrum iti panangdarup kadakuada ti siaarmas a bunggoy dagiti managdakdakes. Inserrada dagiti pammaneknekda babaen ti darada.
Tapno naan-anay ti pammaneknekmo maipapan iti naisubli nga ebanghelio, nasken nga iramanna ti pammaneknek maipapan iti nadiosan a mision ni Joseph Smith. Ti kinapudno ti Ti Simbaan ni Jesucristo dagiti Santo iti Ud-udina nga Aldaw ket maibatay iti kinapudno ti Umuna a Parmata ken iti dadduma pay a paltiing nga inted ti Apo ken ni Joseph Smith. Insurat ni Presidente John Taylor, ti maikatlo a Presidente ti Simbaan, “Ni Joseph Smith, ti Propeta ken Mammadto ti Apo, ti ad-adu ti naaramidna, malaksid ken ni Jesus, para iti pannakaisalakan dagiti tao iti daytoy a lubong, ngem iti asino man a tao a a nagbiag ditoy” (DkK 135:3).