Hustisia

Ti hustisia ket saan nga agbalbaliw a linteg a mangisangbay kadagiti bunga dagiti aramid. Gapu iti linteg ti hustisia, umawatka kadagiti bendision no agtungpalka kadagiti bilin ti Dios (kitaen iti DkK 130:21–22). Idawat pay ti linteg ti hustisia a mabayadan ti multa iti tunggal basol nga aramidem. Idawatna nga awan ti narugit a banag a mapalugodan a makipagtaeng iti Dios (kitaen iti 1 Nephi 10:21).

Idi impatungpal ti Mangisalakan ti Pannubbot, inawatna iti Bagina dagiti basbasoltayo. Kinabaelanna ti “makasungbat iti pagpatinggaan ti linteg” (2 Nephi 2:7) gapu ta impasangona ti Bagina iti pannusa nga indawat ti linteg a kasapulan para kadagiti basbasoltayo. Iti panangaramidna iti kastoy, Isu “napenneknan ti kasapulan ti linteg” ken nangipaay iti asi iti tunggal maysa nga agbabawi ken sumurot Kenkuana (kitaen iti Mosiah 15:9; Alma 34:14–16). Gapu ta inkaronan dagiti basbasolmo, saanmonto a kasapulanen ti agsagaba pay iti dayta a pannusa no agbabawika (kitaen iti DkK 19:15–20).