Silaw ni Cristo
Ti Silaw ni Cristo ket “lawag a tumpuar iti imatang ti Dios a mangpunno iti law-ang.” Daytoy “ti silaw nga adda iti amin a banag, a mangted biag iti amin a banag, nga isu ti paglintegan a pakaiwanwanan ti amin a banag” (DkK 88:12–13; kitaen met iti DkK 88:6–11). Daytoy a bileg ket maysa nga impluwensia para iti pagsayaatan iti biag ti amin a tao (kitaen iti Juan 1:9; DkK 93:2). Kadagiti nasantuan a kasuratan, no dadduma maawagan ti Silaw ni Cristo iti Espiritu ti Apo, ti Espiritu ti Dios, ti Espiritu ni Cristo, wenno ti Silaw ti Biag.
Nasken a saan a mairiro ti Silaw ni Cristo iti Espiritu Santo. Saan a maysa a kinatao daytoy, a kas iti Espiritu Santo. Ti impluwensiana ket mangiturong kadagiti tao a mangsapul iti pudno nga ebanghelio, agpabuniag, ken umawat iti sagut ti Espiritu Santo (kitaen iti Juan 12:46; Alma 26:14–15).
Ti konsensia ket pakaiparangaran ti Silaw ni Cristo, a mangpabalin kadatayo a mangikeddeng iti nasayaat manipud iti dakes. Insuro ni propeta Mormon: “Naited ti Espiritu ni Cristo iti tunggal tao, tapno maammuanna ti nasayaat manipud iti dakes; gapuna, imparangko kadakayo ti wagas a mangngeddeng; ta amin a banag a makaawis tapno agaramidka iti nasayaat, ken mangallukoy iti panamati ken Cristo, naibaon babaen iti pannakabalin ken sagut ni Cristo; gapuna maammuanyo iti naan-anay a pannakaammo dagitoy iti Dios. … Ket ita kakabsatko, makitak nga ammoyo ti silaw a pakaikeddenganyo, a dayta a silaw ti silaw ni Cristo, kitaenyo ta dikayo agbiddut a mangeddeng; ta dayta pangngeddengyo ti pakakednganyonto met” (Moroni 7:16, 18).