Milenio

Ti milenio ket maysa a panawen ti 1,000 a tawen. No agsaritatayo maipapan iti “Milenio,” kaipapananna ti 1,000 a tawen kalpasan ti Maikadua a Yaay ti Mangisalakan (kitaen iti Apocalipsis 20:4; DkK 29:11). Bayat ti Milenio, “agturayto a mismo ni Cristo iti daga” (Pagannurotan ti Pammati 1:10).

Ti Milenio ket maysanto a panawen ti kinalinteg ken kinatalna iti rabaw ti daga. Impalgaken ti Apo nga “iti dayta nga aldaw ti gura ti tao, ken ti gura dagiti ayup, wen ti gura ti amin a lasag, agkirpanto” (DkK 101:26; kitaen met iti Isaias 11:6–9). Ni Satanas “maigalutto …, tapno awanto ti lugarna iti puspuso dagiti annak ti tattao” (DkK 45:55; kitaen met iti Apocalipsis 20:1–3).

Kabayatan ti Milenio, agbalinto a nasayaat ken nalinteg ti amin a tao, ngem adunto ti saan pay a nakaawat iti pakabuklan ti ebanghelio. Gapu iti daytoy, makiramanto dagiti miembro ti Simbaan iti aramid ti misionario.

Makiramanto pay dagiti miembro ti Simbaan iti aramid iti templo kabayatan ti Milenio. Ituloyto dagiti Santo ti mangbangon kadagiti templo ken umawat kadagiti ordinansa a maipaay kadagiti pimmusayen a kabagianda. Matarabay babaen ti paltiing, isaganadanto dagiti kasuratan dagiti kapuonanda [ancestor] manipud rugi agingga kada Adan ken Eva.

Agtultuloyto ti naan-anay a kinalinteg ken kinatalna agingga iti gibus ti 1,000 a tawen, inton ni Satanas ket “maruk-atanto iti apagbiit a panawen, tapno maummongna a sangsangkamaysa dagiti buyotna.” Makirangetto dagiti buyot ni Satanas a maibusor kadagiti pangen ti langit, nga ipanguluanto ni Miguel, wenno ni Adan. Maabakto ni Satanas ken dagiti buyotna ket mapapanawdanto iti agnanayon. (Kitaen iti DkK 88:111–115.)