Aramid ti Misionario
No mapadasantayo dagiti bendision ti panagbiag iti ebanghelio, gagangay a kayattayo nga iburay dagita a bendision kadagiti dadduma. Insao ti Apo ti maipapan iti rag-o a sumangbay iti biagtayo no iburaytayo ti ebangheliona:
“Ket no pudno a kasapulan ti panagtrabahoyo iti unos ti panagbiagyo a mangyararaw kadagitoy a tao iti panagbabawi, ket yegyo, uray no maysa la a kararua kaniak, anianton a rag-oyo iti sibayna iti pagarian ti Amak!
”Ket ita, no nalausto ti rag-oyo iti maysa a kararua a mayegyo kaniak iti pagarian ti Amak, anianto la ketdin a rag-oyo no mangyegkayo kaniak iti adu a kararua!” (DkK 18:15–16).
Misionario a Pagrebbengan ti Tunggal Miembro
Impakdaar ti Apo a ti aramid ti misionario ket pagrebbengan ti amin a Santo iti Ud-udina nga Aldaw (kitaen iti DkK 88:81). Kas maysa a miembro ti Simbaan ti Apo, mabalinmo, babaen ti kinasayaat ti biagmo ken pigsa ti pammaneknekmo, a tulongan nga agsagana dagiti miembro ti pamiliam, gagayyem, ken dadduma pay a kaam-ammo tapno makipagkita kadagiti full-time a misionario.
Ti kabilgan a mensahe ti misionario a maitedmo ket ti bukodmo a pagwadan iti panagbiag a naragsak kas maysa a Santo iti Ud-udina nga Aldaw. Laglagipen a saan nga agkameng dagiti tao iti Simbaan gapu laeng kadagiti pagbatayan ti ebanghelio a masursuroda. Agkamengda gapu ta mariknada ti maysa a banag a mangrugi a mangpennek kadagiti naespirituan a kasapulanda. No napudnoka iti pannakigayyemmo kadakuada, kabaelandanto a riknaen ti espiritu ti pammaneknek ken ragsakmo.
Kas nayon iti panangipakita iti nasayaat a pagwadan, dakayo ket “madadaankayo a sumungbat iti isu amin a mangimtuudto kadakayo ti gapu ti inanama nga adda kadakayo” (1 Pedro 3:15). Makapagkararagka para kadagiti gundaway a mangisalaysay kadagiti dadduma maipapan iti naisubli nga ebanghelio. Kalpasanna makapagbalinka nga alerto, gapu ta aggagar dagiti tao iti kinapudno.
Panagserbi kadagiti Full-time a Mision
Kalpasan ti Panagungarna, binilin ti Apo dagiti disipulona nga “inkayo … ket pagbalinenyo nga ad-adalan dagiti amin a nasnasion a bautisaranyo ida iti nagan ti Ama, ken ti Anak, ken ti Espiritu Santo” (Mateo 28:19). Kas pannakaipatungpal daytoy a bilin, addaan iti pagrebbengan dagiti makabael nga agtutubo a lallaki iti Simbaan tapno agsaganada a mainaig iti kinaespirituan, mainaig iti bagi, ken mainaig iti rikna tapno agserbi kas full-time a misionario. Dagiti awan assawana a babbai ken nataenganen nga agassawa ket addaanda met iti gundaway nga agserbi kadagiti full-time a mision. No tarigagayam ti agserbi iti full-time a mision, kasaom ti bishop wenno branch presidentmo.
Panangtulong kadagiti Baro a Miembro ti Simbaan
Iraman ti aramid ti misionario ti panangtulong ken panangsuporta kadagiti agkameng iti Simbaan. Bayat ti panangutobmo iti daytoy a pagrebbengan, laglagipem a mabalin a maipasango dagiti baro a miembro kadagiti pannubok no agkamengda iti Simbaan. Masansan nga agkasapulan kadakuada dagiti baro a panagkumitda a mangisardeng kadagiti sigud nga ugali ken panawandan dagiti sigud a gagayyem ken kapulapolda. Mainayon pay, yam-ammo ti Simbaan ti maysa a wagas ti biag a mabalin a kasla naidumduma ken adda dagiti kasapulan.
Agkasapulan ti tunggal baro a miembro ti Simbaan iti tallo a banag: maysa a gayyem, maysa a pagrebbengan, ken pannakataraonna “iti nasayaat a balikas ti Dios” (Moroni 6:4). Makapagbalinka a paset ti aramid a mangipaay iti daytoy a tulong. Makapagbalinka a kanayon a gayyemna. Uray no awanka iti posision a maikkan kadagiti awag iti Simbaan wenno pagrebbengan, mabalinmo ti agserbi kadagiti baro a miembro. Ken makasapulka kadagiti gundaway a mangibinglay iti balikas ti Dios kadagiti baro a miembro.