Panagtungpal
Iti panagbiag sakbay daytoy a biag, indauluan ti Nailangitan nga Ama ti dakkel a Konseho iti Langit. Idiay a nasursurotayo ti planona para iti pannakaisalakantayo, a pakairamanan ti maysa a panawen ti pannakapadas iti rabaw ti daga: “Mangaramidtayo iti daga a pagtaengan dagitoy; ket subokentayo ida babaen daytoy, ta kitaentayo no aramidenda amin a banag nga ibilin kadakuada ti Apo a Diosda” (Abraham 3:24–25). Maysa a gapu ti kaaddayo ditoy rabaw ti daga ket tapno ipakitayo ti kinatallugodyo nga agtungpal kadagiti bilin ti Nailangitan nga Ama.
Marikna ti adu a tao a dagensen dagiti bilin ket limitaranda ti wayawaya ken bukod a panagdur-as. Ngem insuro ti Mangisalakan nga umay laeng ti pudno a wayawaya manipud iti panangsurot Kenkuana: “No agtalinaedkayo koma iti saok, pudno a dakayto ti adalak; ket maammuanyonto ti pudno, ket ti kinapudno luk-atannakayto” (Juan 8:31–32). Mangted ti Dios kadagiti bilin para iti pagimbagam. Dagitoy dagiti naayat a pangiturong para iti pagragsakam ken pisikal ken naespirituan a pagimbagam.
Insuro ni Propeta Joseph Smith a ti panagtungpal kadagiti bilin ket mangiturong kadagiti bendision manipud iti Dios. Kinunana: “Adda paglintegan a di maibabawi ti pannakaipaulogna iti langit sakbay ti pannakabukel daytoy a lubong, a nakaibatayan amin a bendision ket no makagun-odtayo iti ania man a bendision manipud iti Dios, babaen ti panagtulnog iti dayta a paglintegan a naibatay” (DkK 130:20–21). Insuro pay ni Ari Benjamin daytoy a pagbatayan. “Tarigagayak a dakayo ti mangusig iti bendision ken naragsak a kasasaad dagiti agtungtungpal kadagiti bilin ti Dios,” imbalakadna. “Ta adtoy naparaburanda iti amin a banag a nainlasagan ken naespirituan; ket no agtalinaedda a situtulnog agingga iti kamaudianan maawatdanto idiay langit, ket makipagtaengdanto iti Dios iti kasasaad nga awan ti gibusna a kinaragsak. O laglagipenyo, laglagipenyo a pudno dagitoy a banag; agsipud ta ti Apo Dios ti nangisao” (Mosiah 2:41).
Ti panagtungpaltayo kadagiti bilin ket maysa a panangipeksa iti ayat para iti Nailangitan nga Ama ken ni Jesucristo. Kinuna ti Mangisalakan, “No ayatendak, tungpalenyo dagiti bilbilinko” (Juan 14:15). Impakdaarna idi agangay: “No tungpalenyo dagiti bilbilinko, agtaengkayto iti ayatko; kasla iti panagtungpalko kadagiti bilbilin ni Amak, ket agtaengak iti ayatna” (Juan 15:10).