Bendision ti Patriarka, Dagiti
Ited dagiti naordenan a patriarka dagiti bendision ti patriarka kadagiti maikari a miembro ti Simbaan. Ti bendisionmo iti patriarka ti mangipakaammo iti pulim [lineage] iti balay ni Israel ken aglaon iti personal a balakad kenka manipud iti Apo.
No adalem ti bendisionmo iti patriarka ken surotem ti balakad a linaonna, mangipaayto daytoy iti tarabay, liwliwa, ken saluad. Tapno maammuan no kasano ti panangawat iti bendision ti patriarka, kasaom ti bishop wenno branch presidentmo.
Panangipakaammo iti Puli [Lineage]
Iraman ti bendisionmo iti patriarka ti pannakaipakaammo ti pulim, a mangibaga a maibilangka iti balay ni Israel—maysa nga an-annabo ni Abraham, a maibilang iti maitudo a tribu ni Jacob. Maibilang ti adu a Santo iti Ud-udina nga aldaw ti tribu ni Ephraim, ti tribu a naikkan iti kangrunaan a pagrebbengan a mangidaulo iti aramid ti Apo iti ud-udina nga aldaw.
Gapu ta tunggal maysa kadatayo ket aduan iti dara ti puli nga agtartaray kadatayo, dua a miembro ti maymaysa a pamilia ket maibaga a maibilang iti nadumaduma a tribu iti Israel.
Saan a nasken no ti pulim iti balay ni Israel ket babaen dagiti puli wenno babaen ti pannakaadaptar. Kas miembro ti Simbaan, maibilangka nga an-annabo ni Abraham ken agtawid iti amin a kari ken bendision a linaon ti katulagan ni Abraham (kitaen iti “Katulagan ni Abraham,” dagiti panid 74–75).
Panagsursuro manipud iti Bendision ti Patriarka
Apaman a maawatmo ti bendisionmo iti patriarka, nasken a basaem daytoy a sipapakumbaba, nainkararagan, ken masansan. Daytoy ti personal a paltiing manipud iti Nailangitan nga Amam, a makaammo kadagiti pagpigsaam, pagkapsutam, ken agnanayon a potensialmo. Babaen ti bendisionmo iti patriarka, tulongannakanto a mangsursuro iti no ania ti namnamaenna kenka. Mabalin a dagiti bendisionmo ket naglaon kadagiti kari, balakad, ken ballaag. Iti panaglabas ti panawen, mabigbigmonto ti bileg ti paltiing iti daytoy.
No surotem ti balakad iti bendisionmo, saankanto a madalupo wenno mayaw-awan. No saanmo a suroten ti balakad, saanmonto a mabalin nga awaten dagiti naikari a bendision.
Idinto a naglaon ti bendisionmo iti patriarka iti naparegta a balakad ken karkari, saanmo koma a namnamaen a masungbatanna ti amin a saludsodmo wenno mangidetalye iti amin a mapasamakto iti biagmo. No saan a dakamaten ti bendisionmo ti maysa a napateg a pasamak, kas iti full-time a mision wenno panagkallaysa, saanmo koma nga ipapan a saanmonto nga awaten dayta a gundaway.
Maipada iti daytoy, saanmo koma nga ipapan a maipatungpalto iti daytoy a biag ti amin a banag a nadakamat iti bendisionmo iti patriarka. Agnanayon ti maysa a bendision ti patriarka, ket mabalin nga agtultuloy dagiti karina agingga kadagiti kinaagnanayon. Maipanamnama a no maikarika, matungpalto amin a kari iti naituding a panawen ti Apo. Dagiti saan pay a natungpal iti daytoy a biag ket matungpalto iti sumaruno a biag.
Sagrado ken personal ti bendisionmo iti patirarka. Mabalinmo nga ipabasa daytoy kadagiti miembro ti pamiliam, ngem saanmo koma a basaen daytoy iti napigsa iti kaaduan wenno saanmo nga ipalubos a basaen dagiti dadduma daytoy wenno ipatarusda daytoy. Nasken a saan nga ipatarus uray ti patriarch wenno bishop wenno branch presidentmo daytoy.
Ipategmo iti pusom dagiti napapateg a balikas iti bendisionmo iti patriarka. Utobem dagitoy, ken tungpalem tapno agbalinkanto a maikari nga umawat kadagiti naikari a bendision iti daytoy a biag ken iti biag nga umay.