Plano ti Pannakaisalakan
Iti biag sakbay a naitao, nangisagana ti Nailangitan nga Ama iti maysa a plano a mangpabael kadatayo nga agbalin a kas Kenkuana ken umawat iti pakabuklan ti rag-o. Itudo dagiti nasantuan a kasuratan daytoy a plano a kas “ti plano ti pannakaisalakan”(Alma 24:14; Moises 6:62), “ti naindaklan a plano ti panagragsak” (Alma 42:8), “ti plano ti pannakasubbot” (Jacob 6:8; Alma 12:30), and “ti plano ti panangngaasi” (Alma 42:15).
Ti plano ti pannakaisalakan ket ti pakabuklan ti ebanghelio. Iraman daytoy ti Panagparsua, ti Pannakatnag, ti Pannubbot ni Jesucristo, ken ti amin a linteg, dagiti ordinansa, dagiti doktrina ti ebanghelio. Ti moral a kinawaya nga agpili, ti kabaelan a pumili ken agtignay para iti bagbagitayo, ket napateg pay iti plano ti Nailangitan nga Ama. Gapu iti daytoy a plano, makapagbalintayo a naan-anay babaen ti Pannubbot, umawat iti pakabuklan ti rag-o, ken agbiag nga agnanayon iti sidong ti Dios. Makapagpaut dagiti relasiontayo iti pamilia agingga kadagiti agnanayon.
Maibilangka iti plano ti Nailangitan nga Ama, ken ti agnanayon a padasmo ket mabingay iti tallo a kangrunaan a paset: biag sakbay daytoy a biag, biag iti daga, ken biag kalpasan ti ipapatay. No maawatam ti plano, maammuam dagiti sungbat kadagiti saludsod a damdamagen ti nakaad-adu: Sadino ti naggapuantayo? Apay nga addatayo ditoy? Sadino ti papanantayo kalpasan daytoy a biag?
Biag Sakbay Daytoy a Biag
Sakbay a nayanakka iti daga, nagbiagka iti sidong ti Nailangitan nga Ama kas maysa kadagiti espiritu nga annakna. Iti daytoy a biag sakbay a naitao, dimmar-ayka iti maysa a konseho a kaduam dagiti dadduma pay nga espiritu nga annak ti Nailangitan nga Ama. Iti dayta a konseho, indatag ti Nailangitan nga Ama ti naindaklan a plano ti panagragsak (kitaen iti Abraham 3:22–26).
Iti pannakitunos iti plano ti panagragsak, ti biag sakbay a naitao a Jesucristo, ti Inauna nga Anak ti Ama iti espiritu, ket nakitulag nga agbalin a Mangisalakan (kitaen iti Moises 4:2; Abraham 3:27). Dagiti simmurot iti Nailangitan nga Ama ken ni Jesucristo ket napalubosan nga umay iti daga tapno makapadasda iti biag iti daga wenno mortalidad ken dumur-asda agingga iti agnanayon a biag. Ni Lucifer, sabali pay nga espiritu nga anak ti Dios, ket nagalsa a maibusor iti plano ket “pinanggepna a dadaelen ti kinawaya ti tao nga agpili” (Moises 4:3). Nagbalin isuna a Satanas, ket napapanaw isuna ken dagiti pasurotna iti langit ken napaidamanda kadagiti pribilehio ti panangawat iti pisikal a bagi ken panangpadas iti biag iti daga wenno mortalidad (kitaen iti Moises 4:4; Abraham 3:27–28).
Iti unos ti biagmo sakbay daytoy a biag, napadur-asmo ti pakaam-ammuam ken napaadum dagiti naespirituan a kabaelam. Naparaburanka iti sagut ti kinawaya nga agpili, nagaramidka kadagiti napapateg a pangngeddeng, kas iti pangngeddeng a sumurot iti plano ti Nailangitan nga Ama. Dagitoy a pangngeddeng ti nangaring iti biagmo idi ken ita. Dimmakkelka iti kinasaririt ken nasursurom nga impateg ti kinapudno, ken nagsaganaka nga umay iti daga, a pakaituloyam a rumang-ay.
Biag iti Daga
Mapadpadasam itan ti panagbiag iti daga. Tumipon ti espiritum iti bagim, a mangted kenka kadagiti gundaway tapno dumakkel ken dumur-as kadagiti wagas a saan a mabalin iti biagmo sakbay daytoy a biag. Daytoy a paset ti panagbiagmo ket panawen ti panagsursuro a pakasubokam iti bagim, pakapagpiliam nga umasideg ken ni Cristo, ken pakapagsaganaam nga agbalin a maikari iti agnanayon a biag. Panawen pay daytoy a pakatulongam kadagiti dadduma a mangsapul iti kinapudno ken manggun-od iti pammaneknek maipapan iti plano ti pannakaisalakan.
Biag kalpasan ti Ipapatay
No matayka, sumrekto ti espiritum iti lubong ti espiritu ket agurayto iti panagungar. Iti panawen ti panagungar, agtiponto ti espiritu ken bagim, ket maukomkanto ken maawatkanto iti maysa a pagarian ti gloria. Ti gloria a tawidem ket agpannurayto iti kauneg ti pannakapasurotmo [conversion] ken iti panagtungpalmo kadagiti bilin ti Apo (kitaen iti “Dagiti Pagarian ti Gloria,” dagiti panid 31–33). Agpannurayto daytoy iti wagas a sika ket “immawat iti pammaneknek ni Jesus” (DkK 76:51; kitaen met iti 76:74, 79, 101).
Dagiti Bendision babaen ti Pannakaammo iti Plano
Ti pammaneknek maipapan iti plano ti pannakaisalakan ket makaited kenka iti namnama ken panggep bayat ti pannakirangetmo kadagiti karit ti biag. Makasarakka iti pammatalged iti pannakaammo a maysaka nga anak ti Dios ken nagindegka iti sidongna sakbay a nayanakka iti rabaw ti daga. Makasarakka iti kaipapanan iti agdama a biagmo, nga ammom a dagiti tignaymo kabayatan ti biag iti daga ket makaimpluwensia iti agnanayon a pangtungpalam. Babaen iti daytoy a pannakaammo, maibataymo dagiti napapateg a pangngeddeng maipapan kadagiti agnanayon a kinapudno imbes a maipapan kadagiti agbalbaliw a kasasaad ti biag. Maituloymo a mapasayaat ti relasionmo kadagiti miembro ti pamiliam, nga agrag-o iti kari a mabalin nga agnanayon ti pamiliam. Masarakam ti rag-o iti pammaneknekmo maipapan iti Pannubbot ken kadagiti bilin, ordinansa, katulagan, ken doktrina ti Apo, nga ammom nga “asino man a mangaramid kadagiti aramid ti kinalinteg, awatennanto ti gunggonana, a kas iti kappia iti daytoy a lubong, ken agnanayon a biag iti masungad a lubong” (DkK 59:23).