Dagiti Dadduma pay a Resources
Pannakaisubli ti Ebanghelio

Pannakaisubli ti Ebanghelio

Idi adda iti daga ni Jesucristo, impasdekna ti Simbaanna kadagiti pasurotna. Kalpasan ti Pannakailansana iti Krus ken ti ipapatay dagiti Apostolna, naipanaw ti pakabuklan ti ebanghelio manipud iti daga gapu iti panagsaknap ti ikakalilis iti kinapudno (kitaen iti “Ikakalilis iti Kinapudno,” dagiti panid 56–57). Adu a lallaki ken babbai ti nagsapul iti pakabuklan ti kinapudno ti ebanghelio kabayatan dagiti siglo ti Nakaro nga Ikakalilis iti Kinapudno, ngem saanda a nasarakan daytoy. Nupay adu ti nagikasaba nga addaan iti kinapudno maipapan iti Mangisalakan ken dagiti pannursurona, awan ti pakabuklan ti kinapudno wenno turay ti priesthood a naggapu iti Dios.

Ti Nakaro nga Ikakalilis iti Kinapudno ket maysa a panawen ti naespirituan a kinasipnget, ngem agbibiagtayo ita iti maysa a panawen a mabalintayo ti makiranud iti “lawag ti ebanghelio ti dayag ni Cristo” (2 Taga Corinto 4:4; kitaen met iti DkK 45:28). Naisublin ti pakabuklan ti ebanghelio, ket adda manen iti daga ti pudno a Simbaan ni Jesucristo. Awan ti sabali nga organisasion a mabalin a pangipadaan iti daytoy. Daytoy ket saan a bunga ti maysa a repormasion, addaan daytoy kadagiti nasayaat ti panggepna a lallaki ken babbai a mangar-aramid iti amin a kabaelanda tapno mangyeg iti panagbalbaliw. Daytoy ti pannakaisubli ti Simbaan nga impasdek ni Jesucristo. Daytoy ti aramid ti Nailangitan nga Ama ken ti Ay-ayatenna nga Anak.

Kas miembro ti Ti Simbaan ni Jesucristo dagiti Santo iti Ud-udina nga Aldaw, makaawatka kadagiti bendision nga awan idi iti daga iti dumani 2,000 a tawen. Babaen dagiti ordinansa ti panagbuniag ken kumpirmasion, makaawatka iti pannakaugas dagiti basbasolmo ken masagrapmo ti kanayon a panangkadkadua ti Espiritu Santo. Makapagbiagka iti ebanghelio iti pakabuklanna ken kinagagangayna. Makagun-odka iti pannakaawat iti kasasaad ti Kinadios, ti Pannubbot ni Jesucristo, ti panggep ti biag iti daga, ken ti kinapudno ti biag kalpasan ti ipapatay. Addaanka iti pribilehio a matarabaydaka dagiti sibibiag a propeta, a mangisuro iti pagayatan ti Dios iti aldawtayo. Dagiti ordinansa iti templo ti mangpabalin kenka nga umawat iti pannarabay ken talna, agsagana para iti agnanayon a biag, mailantip iti pamiliam para iti kinaagnanayon, ken mangipaay kadagiti pangisalakan nga ordinansa para kadagiti pimmusayen a kapuonam.

Dagiti Pasamak iti Pannakaisubli

  • Gupugopen ti sumaganad a balabala ti sumagmamano kadagiti napapateg a pasamak iti pannakaisubli ti ebanghelio ken ti pannakaipasdek ti Ti Simbaan ni Jesucristo dagiti Santo iti Ud-udina nga Aldaw, nga impakdaar ti Apo a “ti kakaisuna a pudno ken nabiag a simbaan iti rabaw ti sangabukel a daga” (DkK 1:30).

  • Nasapa a panawen ti panagsusulbod, 1820. Iti panagsapsapulna iti pudno a Simbaan ni Jesucristo, nagkararag ni Joseph Smith iti kakaywan iti asideg ti pagtaenganna iti Palmyra, New York. Kas sungbat iti napakumbaba a kararagna, sinarungkaran isuna ti Nailangitan nga Ama ken ni Jesucristo ket imbagada kenkuana a nasken a saan a kumappeng iti ania man a simbaan iti daga iti dayta a panawen. (Kitaen iti Joseph Smith—Pakasaritaan 1:11–19.) Iti Simbaan itudotayo daytoy a padas a kas Umuna a Parmata ni Joseph Smith.

  • Septiembre 21–22, 1823. Ni Joseph Smith ket sinarungkaran ti maysa nga anghel nga agnagan iti Moroni. Impadto ni Moroni dagiti umay a pagteng ket imbagana ken ni Joseph maipapan iti kasuratan ti Libro ni Mormon, a naisurat kadagiti pinanid a balitok. Pinalugodan ti anghel a makita ni Joseph dagiti pinanid a balitok, a naikali iti asideg ti Turod Cumorah. (Kitaen iti Joseph Smith—Pakasaritaan 1:27–53.)

  • Septiembre 22, 1827. Inawat ni Joseph Smith dagiti pinanid a balitok manipud ken ni Moroni iti Turod Cumorah kalpasan ti pannakipagkitana ken ni Moroni iti maika-22 ti Septiembre iti tunggal tawen ti napalabas nga uppat a tawen. (Kitaen iti Joseph Smith—Pakasaritaan 1:53, 19.)

  • Mayo 15, 1829. Iti pannakabasana maipapan iti panagbuniag para iti pannakaugas dagiti basbasol kabayatan ti panangipatarusna kadagiti pinanid a balitok, napan ni Joseph Smith ken ti para suratna a ni Oliver Cowdery iti nalemmeng a lugar tapno agdamag iti Apo maipanggep iti dayta a banag. Idiay, kadagiti igid ti Karayan Susquehanna iti asideg ti Harmony, Pennsylvania, inawatda ti sungbat iti kararagda. Immay kadakuada ni Juan Bautista, maysa a nagungar a tao, kas “mensahero manipud iti langit iti naraniag nga ulep.” Intalekna kadakuada ti Aaronic Priesthood. Kalpasanna, kas panagtungpal kadagiti pammilinna, nagbinnuniag da Joseph ken Oliver iti tunggal maysa ken naginnordenda iti tunggal maysa iti Aaronic Priesthood. (Kitaen iti Joseph Smith—Pakasaritaan 1:68–72; kitaen met iti DkK 13.)

  • Mayo 1829. Intalek dagiti nagkauna nga Apostol a da Pedro, Santiago, ken Juan ti Melchizedek Priesthood kada Joseph Smith ken Oliver Cowdery. (Kitaen iti DkK 128:20.)

  • Hunio 1829. Natarabay “babaen ti sagut ken bileg ti Dios” (DkK 135:3), inleppas ni Propeta Joseph Smith ti patarus ti Libro ni Mormon.

  • Marso 26, 1830. Nagun-od dagiti umuna a naimaldit a kopia ti Libro ni Mormon iti Palmyra, New York.

  • Abril 6, 1830. Nabuangay ti Simbaan iti Fayette Township, New York, a nangrugi iti innem a miembro.

  • Marso 27, 1836. Naidaton ti Kirtland Temple, ti umuna a templo a nabangon iti daytoy a dispensasion. Inruknoy ni Propeta Joseph Smith ti pangidaton a kararag, a naited idin kenkuana babaen ti paltiing. (Kitaen iti DkK 109.)

  • Abril 3, 1836. Nagparang ti Mangisalakan kada Joseph Smith ken Oliver Cowdery iti Kirtland Temple. Nagparang met da Moises, Elias, ken Elijah ket intedda dagiti tulbek ti priesthood kada Joseph ken Oliver. Inyeg ni Elijah dagiti tulbek ti bileg a mangilantip, a mangpabalin a mailantip a sangkamaysa dagiti pamilia iti agnanayon. (Kitaen iti DkK 110.)

Ti Pagtungpalan ti Simbaan

Impadto ti propeta iti Daan a Tulag a ni Daniel a ti Dios “mamangonto iti maysa a pagarian” nga “kaano man dinto madadael” ken “agtalinaedto iti agnanayon” (Daniel 2:44). Iti panangaramidna iti daytoy a pammadto, nagsao maipapan iti Ti Simbaan ni Jesucristo dagiti Santo iti Ud-udina nga Aldaw, ti pagarian ti Dios iti daga iti agdama. Manipud iti aldaw a pannakabuangay ti Simbaan nga addaan iti innem a miembro, dimmakkel ken dimmur-asen daytoy, ken agtultuloyto a rumang-ay daytoy agingga a “pinunnona ti amin iti daga” (Daniel 2:35; kitaen met iti DkK 65:2). Ginasgasut a ribu a tattao ti mabuniagan iti tunggal tawen. Maipatpatarus ti Libro ni Mormon iti adu a pagsasao. Mabangbangon dagiti templo iti intero a lubong. Iti kaadda ni Jesucristo iti ulo ti Simbaan, tarabayento dagiti sibibiag a propeta ti panagrang-ay ti Simbaan agingga a maisagana ti daga para iti Maikadua a Yaay ti Mangisalakan.

Insao ni Propeta Joseph Smith ti maipapan kadagiti bendision ti Pannakaisubli: “Ita, ania ti mangngegtayo iti ebanghelio nga inawattayo? Napnuan ragsak a timek! Timek ti panangngaasi manipud iti langit; ken timek ti kinapudno a timpuar iti daga; naimbag a damag para kadagiti natay; naragsak a timek para kadagiti sibibiag ken kadagiti natay; naimbag a damag ti naindaklan a rag-o” (DkK 128:19).