Panagungar

Gapu iti Pannakatnag da Adan ken Eva, makapadastayo iti pisikal nga ipapatay, a panagsina ti espiritu manipud iti bagi. Babaen ti Pannubbot ni Jesucristo, agungarto ti amin a tao—maisalakan manipud iti pisikal nga ipapatay (kitaen iti 1 Taga Corinto 15:22). Ti panagungar ket panagsubli ti espiritu iti bagi iti naan-anay, imortal a kasasaad, saanen a makapadas pay iti sakit wenno ipapatay (kitaen iti Alma 11:42–45).

Ti Mangisalakan ti umuna a tao iti daga a nagungar. Aglaon ti Baro a Tulag iti sumagmamano a pakaammuan a mangipampaneknek nga Isu ket nagungar manipud iti tanem (kitaen iti Mateo 28:1–8; Marcos 16:1–14; Lucas 24:1–48; Juan 20:1–29; 1 Taga Corinto 15:1–8; 2 Pedro 1:16–17).

Idi nagparang ti nagungar nga Apo kadagiti Apostolna, tinulonganna ida a makaawat nga Isu ket addaan iti bagi a nagtagilasag ken nagtagitulang. Kinunana, “Kitaenyo dagiti ima ken sakak, ta siak met laeng: arikapendak ket kitaenyo; ta ti espiritu awan ti lasagnaken tulangna, a kas makitayo nga adda kaniak” (Lucas 24:39). Nagparang pay kadagiti Nephi kalpasan ti Panagungarna (kitaen iti 3 Nephi 11:10–17).

Iti panawen ti panagungar, datayonto ket “maukom babaen ti aramid[tayo]. … Maisaklangtayonto iti sango ti Dios, nga ammotayo kas iti pannakaammotayo ita, ket maaddaantayonto iti nalawag a pananglagip iti amin a basoltayo” (Alma 11:41, 43). Agpannurayto ti agnanayon a gloria nga awatentayo iti kinapudnotayo. Nupay agungarto ti amin a tao, dagitinto laeng immasideg ken ni Cristo ken nakiranud iti pakabuklan ti ebangheliona ti makatawidto iti pannakaitan-ok iti celestial a pagarian.

Ti pannakaaawat ken pammaneknek maipapan iti panagungar ti makaited kenka iti namnama ken pannirigan bayat ti panangpasarmo kadagiti karit, pannubok, ken balligi ti biag. Makasarakka iti liwliwa iti pammatalged a sibibiag ti Mangisalakan ken babaen ti Pannubbotna, “pinekkana ti begkes ni patay, tapno saan nga agballigi ti tanem ken tapno maalimonda ti sippit ni patay iti panagnamnamada iti gloria” (Alma 22:14).