Panagraem
Ti panagraem ket nalaus a panagdayaw ken panagayat. No addaanka iti managraem a tignay iti Dios, agdayawka Kenkuana, yebkasmo ti panagyamanmo Kenkuana, ken tungpalem dagiti bilinna.
Nasken a managraemka iti ugalim kasta met ti tignaymo. Ti naraeman nga ugali ket iramanna ti panagkararag, panagadal kadagiti nasantuan a kasuratan, panagayuno, ken panagbayad kadagiti apagkapullo ken daton. Iramanna ti panagkawes iti disente ken panagusar iti nadalus, ken makaay-ayo a pagsasao. Ti kalaus ti panagraemmo ket pakakitaan iti panagpilim iti musika ken dadduma pay a pagaliwaksayan, iti wagas a panagsaom maipapan kadagiti sagrado a pagsasaritaan, ken iti wagas a panagkawes ken panagtignaymo no makimisaka ken mapanka iti templo. Ipakitam ti panagraemmo iti Apo no agserbika iti dadduma pay a tao ken tratuem ida iti kinaimbag ken respeto.
Bayat ti panagbalinmo nga ad-adda a managraem, madlawmonto ti naulimek a panagbalbaliw iti biagmo. Ibukbokto ti Apo ti Espirituna kenka a siwawadwad. Saankanto a mariribukan ken matikaw. Kabaelamto ti umawat iti paltiing a makatulong kenka a mangrisut kadagiti bukodmo a problema ken problema ti pamiliam.
Kas iti ad-adda a panangyasideg kenka ti panagraem iti Dios, kasta met a maibagay ti kinaawan panagraem kadagiti panggep ti kabusor. Sulisogennakanto ni Satanas a mangsurot iti ayo ti lubong iti ad-adu pay nga ariwawa, panaggagar, ken sinnupanget ken awanan panagteppel ken natalna a panagraem. Kas iti komander a mangisagsagana iti iraraut ti buyot, padasennanto a serraan dagiti dalan ti komunikasion iti nagbaetanyo iti Apo. Agannadka kadagiti kasta a kinasikap, ket ikagumaam ti agbalin a managraem iti amin nga aramidem.