Panangisuro iti Ebanghelio
Impakdaar ti Apo: “Itedko kadakayo ti bilin nga isuroyo iti tunggal maysa ti doktrina ti pagarian. Mangisurokayo a sireregta ket tarabayennakayo ti paraburko, tapno ad-adda a naan-anay ti pannakaiwanwanyo iti kapanunotan, iti pagbatayan, iti doktrina, iti paglintegan ti ebanghelio, iti amin a banag a mainaig iti pagarian ti Dios, a nasken a maawatanyo” (DkK 88:77–78).
Iti panangtedna iti daytoy a bilin, inikkannatayo ti Apo iti sagrado a pagrebbengan. Iturongnatayo pay kadagiti adu a gundaway para iti napnuan kaipapanan a serbisio. Sumagmamano a padas ti maidilig iti rag-o ti panangtulong iti dadduma nga agsursuro ken agbiag iti ebanghelio.
Mayaplikar kenka daytoy a bilin a mangisuro, uray no awananka iti agdama a pormal nga awag kas maysa a mannursuro. Addaanka kadagiti gundaway a mangisuro kas maysa a miembro ti pamiliam, kas maysa a home teacher wenno visiting teacher, ken uray pay kas maysa a katrabaho, kaarruba, ken gayyem. No dadduma mangisuroka babaen dagiti balikas nga insaganam nga isao. No dadduma mabalinmo a gundawayan dagiti ababa, saan a naplano a kanito a pakaibinglayam kadagiti kinapudno ti ebanghelio. Iti kaaduanna a gundaway mangisuroka babaen ti pagwadan.
Panangisuro a kas iti Panangisuro ti Mangisalakan
Kadagiti panagkagumaam a mangisuro iti ebanghelio, tuladem ni Jesucristo a kas pagwadam. Agadal kadagiti pakaammuan maipapan iti panagministrona iti daga, ken agsapul kadagiti wagas tapno mangisuro a kas iti panangisurona. Nangipakita iti napudno nga ayat ken pannakaseknan para kadagiti nagserbianna. Pinapigsana a saggaysa dagiti tao, a nangisursuro kadagiti pagbatayan ti ebanghelio iti wagas a pakatulonganna kadakuada kadagiti naidumduma a kasapulanda. Sumagmamano ti riniingna iti tarigagay a mangawat ken agbiag iti ebanghelio. Iti adu a gundaway nagdamag kadagiti saludsod a mangtulong kadakuada a mangyaplikar iti nasursuroda. Insurona dagiti pangisalakan a kinapudno ti ebanghelio, a mangtulong kadagiti dumdumngeg a maawatanda no ania ti kasapulan a maammuan, aramiden, ken pagbalinanda tapno maawatda ti sagut ti agnanayon a biag.
Kabayatan ti panangsurotmo iti pagwadan ti Mangisalakan, mangtaraonto ti panangisurom ken mangitag-ay kadagiti dadduma, mangpapigsa iti pammatida, ken mangted kadakuada iti panagtalek a mangsango kadagiti karit ti biag. Daytoy ti mangallukoyto kadakuada a mangliklik iti basol ken agtungpal kadagiti bilin. Daytoy ti mangtulongto kadakuada nga umasideg ken ni Cristo ken agtalinaed iti ayatna.
Panangisuro babaen ti Espiritu
Kinuna ti Apo, “Maitedto kadakayo ti Espiritu babaen ti kararag ti pammati; ket no diyo maawat ti Espiritu saankayo a mangisuro” (DkK 42:14). Ti Espiritu wenno ti Espiritu Santo, ket miembro ti Kinadios. Maysa a panggep ti Espiritu ket “iparangarangna … ti kinapudno ti amin a banag” (Moroni 10:4–5). Babaen laeng ti impluwensia ti Espiritu a makaitan-ok ken makaparegta ti panangisuro iti ebanghelio.
Ti pribilehiom a kas mannursuro ti ebanghelio ket ti panagbalinmo a ramit a mabalin a pangisuruan, pagpaneknekan, pangliwliwaan, ken pangparegtaan ti Espiritu Santo. Kas insuro ni propeta Nephi, “No agsao ti tao babaen ti bileg ti Espiritu Santo ipasagepsep ti bileg ti Espiritu Santo iti puso dagiti annak ti tao” (2 Nephi 33:1).
No agsaganaka a naespirituan, tulongannakanto ti Espiritu Santo a mangammo no ania ti aramiden ken isao iti panangisurom. Maisaganam ti bagim babaen ti panagkararag a masansan, panagadal kadagiti nasantuan a kasuratan, panagbiag iti ebanghelio, ken panagbalin a napakumbaba.
Dagiti Wagas ti Panangisuro
Agbalin a kasamayan ti panangisurom no agusarka iti nadumaduma a maitutop a wagas. Kas pagarigan, mabalinmo ti agisalaysay kadagiti estoria ken pagarigan a mangawis iti imatang dagiti tao ken mangipakita no kasano a mayaplikar dagiti pagbatayan ti ebanghelio iti inaldaw a panagbiag. Mabalinmo ti agusar kadagiti ladawan ken banag [object] a mangpapigsa iti pannakaawat dagiti dadduma maipapan kadagiti pakaammuan ti nasantuan a kasuratan ken pagbatayan ti ebanghelio. Babaen ti musika, mabalinmo ken dagiti sursuruam ti mangawis iti impluwensia ti Espiritu Santo ken mangyebkas kadagiti rikna a mabalin a narigat a mayebkas kadagiti sabali pay a wagas. Mabalinmo ti agdamag kadagiti saludsod a mangyallukoy iti napanunotan a panagsursuro ken panaglilinnawag ken mangiturong iti maitutop a panangibinglay kadagiti bukod a padas. Babaen dagiti simple nga aktibidad, matulongam dagiti adalan a mangipamaysa iti imatangda.
No ibilangmo ti panangusar iti maitudo a wagas iti panangisuro, saludsodem iti bagim dagiti sumaganad a saludsod: Mangawisto ngata daytoy a wagas iti impluwensia ti Espiritu? Maibagay ngata daytoy iti kinasagrado dagiti pagbatayan nga isursurok? Mangitan-ok ken mangpapigsanto ngata daytoy kadagiti isursurok?
Laglagipen a kas maysa a mannursuro ti ebanghelio, ibagiam ti Apo. Penken nga amin nga aramidem ken isaom ket naraeman ken maitunos iti pagayatanna.
Para kadagiti nayon a singasing iti panangisuro iti ebanghelio, mabalin a kayatmo ti agibasar iti Teaching, No Greater Call (36123); ti Pagbasaan a Mangiwanwan iti Panangisuro (34595 864); ken “Teaching the Gospel,” section 5.5 ti Handbook 2: Administering the Church (08702).