1 Ne mpindiewu, mema, Yakoba, ndi ngakula kunudi kabidi, bana betu bananga, bitangila ditamba edi diakana dindi muakuila.

2 Bualu monayi, malaya atudi bapeta adi malaya kutudi bilondeshila ku musunyi; pananku, bu muvuabi bilejibua kundi ne ba bungi ba ku bana betu nebafua mu musunyi bua bualu bua dipanga ditabuija, nansha nanku, Nzambi neikala ne lusa kudi ba bungi; ne bana betu nebapingajibua, bua balua ku tshiabapesha dimanya dilelela dia Musungidi wabu.

3 Pananku, bu mumvua munuambila, bidi bikengedibua ne Kilisto—bualu butuku bushala muanjelu uvua muakula kundi ne edi nedikala dîna dienda—alua munkatshi mua Bena Yuda, munkatshi mua badi bikala tshitupa tshia bapita bubi tshia ba pa buloba; ne nebamutshiamakaja—bualu nanku bidi biakanyina Nzambi wetu, ne kakuena tshisamba tshikuabu nansha tshimua pa buloba tshidi bua kuela Nzambi watshi pa mutshi mutshiamakana to.

4 Bualu bu bishima bia bukitu bienjibua munkatshi mua bisamba bikuabu nebikudimuna mutshima, ne nebimanya ne udi Nzambi wabi.

5 Kadi bua bualu bua buakuidi bua mafi ne malu mabi, badi ku Yelushalema nebamuiminyishila nshingu yabu, bua atshiamakajibua.

6 Pananku, bua bualu bua malu mabi abu, dinyanguka, biyola, bipupu, ne dimatshisha dia mashi nebilua pa mutu pabu, ne aba bâbenga kubutuka nebatangalajibua munkatshi mua bisamba bionsu.

7 Kadi monayi, Mukalenga Nzambi udi wamba: Pâlua dituku dingitabuijabu, ne ndi Kilisto, apu ndi muenza tshipungidi ne batatuabu ne nebapingajibua mu musunyi, pa buloba, mu malaba a bupianyi buabu.

8 Ne nebilua ne nebasangishibuamu ku dimuangalajidibua diabu dila, ku bidila bia mu mbuwa, ne ku matengu anayi a buloba; ne bisamba bia Bena Bisamba bia Benda nebikala binena ku mesu anyi, Nzambi udi wamba, mu dibambula ku malaba a bupianyi buabu.

9 Eyowa, bamfumu ba Bena Bisamba bia Benda nebikala batatuabu badishi, ne bamfumu bakaji babu nebikala bamamuabu badishi; bua nanku, malaya a Mukalenga adi manena kudi Bena Bisamba bia Benda, bualu udi mutshiakula, ne nganyi udi mua kuela mpata?

10 Kadi monayi, bulaba ebu, Nzambi udi wamba, nebuikala bulaba bua bupianyi bueba, ne Bena Bisamba bia Benda nebabeneshibua pa bulaba.

11 Ne bulaba ebu nebuikala bulaba bua budishikaminyi bua Bena Bisamba bia Benda, ne kakuakuikala bamfumu mu bulaba bâbishidibua mu Bena Bisamba bia Benda to.

12 Ne nenkolesha bulaba ebu bua kukolela bisamba bionsu bikuabu.

13 Ne udi uluisha Siona neafua, Nzambi udi wamba.

14 Bualu udi ujula mfumu bua kunduisha neafua, bualu mema, Mukalenga, Mfumu wa mu diûlu, nengikala mfumu wabu, ne nengikala bukenka kudibu bua kashidi, badi bateleja mêyi anyi.

15 Pananku, bua bualu ebu, bua bipungidi bianyi bindi muenza kudi bana ba bantu bikumbajibua, bingenza kudibu mu musunyi, ndi ne tshia kunyangakaja midimu ya musokoku ya mîdima, ne ya mashipeyangana, ne ya malu mapita bubi.

16 Bua nanku, udi uluisha Siona, bubidi Muena Yuda ne Muena tshisamba tshia benda, bubidi mupika ne mudikadila, bubidi muluma ne mukaji, nebafua; bualu bobu badi bikala ndumba wa mu buloba bonsu; bualu badi kabayi buanyi to badi banduisha, Nzambi wetu wamba.

17 Bualu nenkumbaja malaya anyi amvua muenza kudi bana ba bantu, angabenzela patshidibu mu musunyi—

18 Pananku, bana betu bananga, nanku Nzambi wetu wamba: Nentatshisha ndelanganyi yeba ku tshianza tshia Bena Bisamba bia Benda; nansha nanku, nentekesha mitshima ya Bena Bisamba bia Benda, bua ne nebikala bu mudi tatu kudibu; bua nanku Bena Bisamba bia Benda nebabeneshibua ne nebabadibua munkatshi mua nzubu wa Isalele.

19 Pananku, nenjidila bulaba ebu bua ndelanganyi yeba, ne aba bâbadibua munkatshi mua ndelanganyi yeba, bua kashidi, bua bulaba bua bupianyi buabu; bualu budi bulaba bua disungula, Nzambi udi wamba kundi, kupita malaba makuabu onsu, bua nanku nendomba ne bantu bonsu badi bikadilamu bantendelela.

20 Ne mpindiewu, bana betu bananga, kumona ne Nzambi wetu wa lusa udi mutupesha dimanya dinena bikola bitangila malu â, tumuvulukayi, ne tulekelayi mibi yetu, ne katuinyiki mitu panshi to, bualu katuena bipatshibua to; nansha nanku, tudi bisakibua pambelu pa bulaba bua bupianyi buetu; kadi tudi balombodibua ku bulaba buimpa kupita, bualu Mukalenga udi muenza mbuwa kajila ketu, ne tudi pa tshidila tshia mu mbuwa.

21 Kadi manena adi malaya a Mukalenga kudi badi pa bidila bia mu mbuwa; pananku mudibi biamba bidila, kudi ne tshia kuikala kupita etshi, ne bana betu badi bikadilamu kabidi.

22 Bualu monayi, Mukalenga Nzambi udi mulombola kula ku musangu ne musangu ba mu nzubu wa Isalele, bilondeshila ku disua ne nsankilu wenda. Ne mpindiewu, monayi, Mukalenga udi uvuluka bonsu badi batuka, bua nanku udi utuvuluka petu.

23 Bua nanku, sangulujayi mitshima yenu; ne vulukayi ne nudi ne nudi badisuila bua kudienzela nkayenu—bua kusungula njila wa lufu lua tshiendelela anyi njila wa moyo wa tshiendelela.

24 Pananku, bana betu bananga, lengejanganayi ne disua dia Nzambi, ne kadi ne disua dia diabulu ne mubidi to; ne vulukayi, kunyima kua nuenu kulengejangana ne Nzambi, bidi amu mu ne ku ngâsa wa Nzambi kunudi bapandishibua.

25 Pananku, Nzambi anujula ku lufu ku bukola bua dibika ku lufu, ne kabidi ku lufu lua tshiendelela ku bukola bua bupikudi, bua nuakididibua mu bukalenga bua kashidi bua Nzambi, bua numusamuna ku ngâsa wa bunzambi. Amena.