Mukanda Muibidi wa Nefi

1 Ne mpindiewu biakalua ne kunyima kua mema, Nefi, mujikija kulongesha bana betu ba baluma, tatuetu, Lehi, wakabambila kabidi malu a bungi, ne wakabambuluila bunena bua malu avua Mukalenga mubenzela mu dibapatula mu bulaba bua Yelushalema.

2 Ne wakabambila bitangila mantomboji abu pa mâyi, ne lusa lua Nzambi mu diepelesha dia mioyo yabu, bua ne kabakadînyibua mu mbuwa to.

3 Ne wakabambila kabidi bitangila bulaba bua dilaya, buakapetabu—bu muvua Mukalenga ne lusa mu ditudimuisha ne tuvua ne bua kunyema pambelu pa bulaba bua Yelushalema.

4 Bualu, monayi, wakamba, ndi mumona tshimônyi, mundi mumanyina ne Yelushalema mmubutuka; ne bu tuetu bashala mu Yelushalema tuvua petu tufua.

5 Kadi, wakamba, nansha bua ntatu yetu, tudi bapeta bulaba bua dilaya, bulaba bua disungula ku mutu kua malaba makuabu onsu; bulaba budi Mukalenga Nzambi muenza tshipungidi nanyi bua ne nebuikala bulaba bua bupianyi bua ndelanganyi yanyi. Eyowa, Mukalenga udi muenza tshipungidi bua kufila bulaba ebu kundi, ne kudi bana banyi bua kashidi, ne kabidi kudi bonsu bâpatudibua ku matunga makuabu kudi tshianza tshia Mukalenga.

6 Bua nanku, mema, Lehi, ndi ngamba ku Nyuma bilondeshila ku buenzeji bua Nyuma udi munda muanyi, ne kakuakuikala nansha umua walua mu bulaba ebu to amu bobu batuadibua kudi tshianza tshia Mukalenga.

7 Bua nanku, bulaba ebu budi bujididibua bua ewu watualayeku. Ne bikalabi ne nebamusadila bilondeshila ku mikenji idiye muela, nebuikala bulaba bua budishikaminyi kudibu; bua nanku, kabakubuejibua mu bukuatshibu nansha; bikalabi nanku, nebikala bua bualu bua malu mabi; bualu biavulangana malu mabi, bulaba nebutshipibua bua bualu buabu, kadi bua bakana nebubeneshibua bua kashidi.

8 Ne monayi, bidi lungenyi bua ne bulaba ebu buatshikala kâyi mamanyibua kudi bisamba bikuabu to; bualu bua, monayi, bisamba bia bungi nebiwuja bulaba, bua ne kakuakuikala muaba bua bupianyi to.

9 Pananku, mema, Lehi, ngakapeta dilaya ne, monsu mualama bapatula Mukalenga Nzambi ku bulaba bua Yelushalema mikenji yenda, nebalubuluka pa mpala wa bulaba ebu; ne kabakumanyika kudi bisamba bikuabu bionsu to, bua ne bâsa mu bulaba ebu buabu nkayabu. Ne bikalabi ne nebalama mikenji yenda nebabeneshibua pa mpala wa bulaba ebu, ne kakuakuikala nansha umua bua kubatatshisha, anyi kubanyenga bulaba bua bupianyi buabu to; ne nebisomba mu bukubi bua kashidi.

10 Kadi monayi, palua tshikondu tshiashingulukabu mu dipanga dia ditabuija, kunyima kua bapeta mabenesha manena umbukila ku tshianza tshia Mukalenga—bikala ne dimanya dia bufuki bua buloba, ne bantu bonsu, bamanya midimu minena ne ya dikema ya Mukalenga kumbukila ku bufuki bua buloba; bikala bapeshibua bukôkeshi bua kuenza malu onsu ku ditabuija; bikala ne mikenji yonsu kumbukila ku mbangilu, ne bikala batuadibua ku buimpa buenda budi kabuyi ndekelu mu bulaba bua dilaya bua mushinga â—monayi, ndi ngamba, bialua dituku diabengabu Wa Tshijila wa Isalele, Mashiya mulelela, Musungidi wabu ne Nzambi wabu, monayi, bitungu bia udi muakana nebitudila pa mutu pabu.

11 Eyowa, neatuala bisamba bikuabu kudibu, ne neabipesha bukola, ne neabanyenga malaba adibu basamu, ne neenzeja ne batangalajibua ne batûtshibua.

12 Eyowa, mudi tshikondu tshishila tshikuabu muaba nekuikala dimatshisha dia mashi dia bungi, ne makumbula manena munkatshi muabu; bua nanku, bana banyi ba baluma, ndi musua ne nuvuluka; eyowa, ndi musua ne numvuila mêyi anyi.

13 Ô ne nubika; nubika ku tulu tukola, eyowa, mena ku tulu tua mu ngena, ne nudibukula bua kumbusha nkanu mibi mipita inudi basuikibua nayi, idi mikala nkanu idi isuika bana ba bantu, ne badi bambudibua bakuatshibu mu lupongu lua tshiendelela lua dikenga ne diakabi.

14 Bikayi! ne jukayi mu lupuishi, ne umvuayi mêyi a muledi udi uzakala, muena bitupa bia mubidi binudi ne tshia kuladika panshi katataka mu lukita lua mashika ne lutalala, kudi muenji wa luendu nansha umua kayi mua kualukila to; matuku atshidiku makesa ne ndi nya njila wa buloba bonsu.

15 Kadi monayi, Mukalenga udi musungila anyima wanyi ku ngena; ndi mumona butumbi buenda, ne ndi munyunguludibua tshiendelela mu maboku a dinanga dienda.

16 Ne ndi njinga ne nuvuluka bua kutumikila mikandu ne mêyi a Mukalenga; monayi, edi divua dikala dipampakana dia anyima wanyi kumbukila ku mbangilu.

17 Mutshima wanyi uvua muikala bujitu ne kanyinganyinga ku musangu ne musangu, bualu mvua ntshina ne, bua bupapa bua mitshima yenu, Mukalenga Nzambi wenu kunuluidi mu tshiwudi tshia tshiji tshienda, bua ne nukoshibua ne nubutuka bua kashidi to;

18 Anyi, ne mulawu ulua pa mutu penu bua mutantshi wa bikondu bia bungi; ne nukumbudibua kudi muela wa mvita, ne kudi tshiyola, ne nuikala bakinyibua, ne balombodibua bilondeshila ku disua ne bukuatshibu bia diabulu.

19 Ô bana banyi ba baluma, ne malu â ka’anuluidi to, kadi nuikala bantu ba disungula ne basuibua kudi Mukalenga. Kadi monayi, disua dienda dienzeka; bualu njila yenda idi buakana bua kashidi.

20 Ne uvua muamba: Monsu munualama mikenji yanyi nenulubuluka mu bulaba; kadi monsu munuapanga kulama mikenji yanyi nenukoshibua ku mpala kuanyi.

21 Ne mpindiewu bua anyima wanyi ikala ne disanka kunudi, ne bua mutshima wanyi ushiya buloba ebu ne musangelu bua bualu buenu, bua tshipuekeshibu mu lukita ne dibungama ne kanyinganyinga to, jukayi mu lupuishi, bana banyi ba baluma, ne ikalayi baluma, ne difilayi ne meji amua ne mutshima umua, bakuatangana mu malu onsu, bua ne kanuyi mu bukuatshibu to;

22 Bua ne kanutshipibu ne mutshipu mukola to; ne kabidi, bua ne kanupetakanyi ne dibungama dia Nzambi muakana, tô ne ku dinyanguka to, eyowa, dinyanguka dia tshiendelela dia bionsu bibidi anyima ne mubidi.

23 Bikayi, bana banyi ba baluma; vualayi biluilu bia buakana. Dibukulayi bua kumbusha nkanu inudi basuikibua nayi, ne patukayi mu bujimakana, ne jukayi mu lupuishi.

24 Kanutombokedi nansha kabidi muanenu wa baluma, muena mamonyi adi mikala a dikema, ne udi mulama mikenji katshia ku tshikondu tshituakumbuka ku Yelushalema; ne udi muikala tshiamu tshia mudimu mu bianza bia Nzambi, mu ditutuala mu bulaba bua dilaya; bualu bu kabuyi buenda to, tuvua ne tshia kufua ne nzala mu tshipela; nansha nanku, nuvua bakeba bua kuangata moyo wenda; eyowa, ne uvua mukenga kanyinganyinga kakola bua bualu buenu.

25 Ne ndi ntshina menamena ne nzakala bua bualu buenu, bua kalu kukenga kabidi; bualu monayi, nuamubandi ne uvua ukeba bukalenga ne bukôkeshi pa mutu penu; kadi ndi mumanya ne kena ukeba bukalenga anyi bukôkeshi pa mutu penu to, kadi udi ukeba butumbi bua Nzambi, ne diakalenga dienu nkayenu dia tshiendelela.

26 Ne nuvua nunungana bualu bua uvua unuambila patoka. Nudi nuamba ne uvua unuambila mêyi makola; nudi nuamba ne wakanufîkila tshiji; kadi monayi, diakula dienda dikoa divua diakula dikola dia bukola bua dîyi dia Nzambi, buvua nenda; ne tshinudi nubikila ne tshiji tshivua bulelela, bilondeshila ku buvua munda mua Nzambi, buvuaye kayi mua kukanda to, umuenesha ne dikima bitangila malu enu mabi.

27 Ne bidi bikengedibua ne bukola bua Nzambi budi ne tshiakuikala nenda, mena mu dinutumina dîyi ne nudi tshia tumikila. Kadi monayi, kabivua yeya to, kadi bivua Nyuma wa Mukalenga uvua munda muenda, uvua munzulula mukana muenda bua kuakula bua ne kavua mua kumubuikila to.

28 Ne mpindiewu muananyi wa baluma, Lamana, ne kabidi Lemuele ne Sama, ne kabidi bana banyi ba baluma badi bikala bana ba baluma ba Yishemaela, monayi, binumvuila dîyi dia Nefi kanuakufua to. Ne binuamumvuila ndi nushila dibenesha, eyowa, mena dibenesha dianyi dia kumpala.

29 Kadi binuapanga kumumvuila ndi nnyenga dibenesha dianyi dia kumpala, eyowa, mena dibenesha dianyi, ne neditudila pa mutu penda.

30 Ne mpindiewu, Zolama, ndi ngakula kûdi: Mona, udi musadidi wa Labana; nansha nanku, uvua mupatudibua mu bulaba bua Yelushalema, ne ndi mumanya ne udi mulunda mulelela wa muananyi wa baluma, Nefi, bua kashidi.

31 Bua nanku, bualu bua udi muikala ne lulamatu, ndelanganyi yeba neibeneshibua ne ndelanganyi yenda, bua ne neikadila mu dilubuluka mutantshi dila pa mpala wa bulaba ebu; ne tshintu nansha tshimua, amu pa kumbusha malu mabi a munkatshi muabu, katshiakubenza bibi anyi katshiakusalakaja dilubuluka diabu pa mpala wa bulaba ebu to bua kashidi.

32 Bua nanku, binualama mikenji ya Mukalenga, Mukalenga wakajidila bulaba ebu bua bukubi bua ndelanganyi yeba ne ndelanganyi ya muananyi wa baluma.