Shapita 31
Nefi udi wamba bua tshinyi Kilisto uvua mutambuishibua—Bantu badi ne tshia kulonda Kilisto, kutambuishibua, kupeta Nyuma wa Tshijila, ne kunanukila tô ne ku ndekelu bua kupandishibua—Dikudimuna mutshima ne ditambula bidi tshibuelelu tshia ku njila mufinakana ne mubumbakana—Moyo wa tshiendelela udi ulua kudi badi balama mikenji kunyima kua ditambula. Pabuipi ne 559–545 k.d.K.
1 Ne mpindiewu mema, Nefi, ndi ngajikiji kuamba kuanyi ku Nyuma kunudi, bana betu bananga. Ne ndi mua kufunda amu malu makesa, andi mumanya bushuwa adi ne tshia kulua; nansha ndi mua kufunda amu makesa a ku mêyi a muanetu wa baluma Yakoba.
2 Pananku, malu andi mufunda adi mmakumbanyina, amu bikala mêyi makesa andi ne tshia kuakula bitangila dilongesha dia Kilisto; pananku, nengakula kunudi patoka, bilondeshila ku butoka bua kuamba kuanyi ku Nyuma.
3 Bualu anyima wanyi udi usankila mu butoka; bualu ku mushindu ewu Mukalenga Nzambi udi wenza mudimu munkatshi mua bana ba bantu. Bualu Mukalenga Nzambi udi ufila bukenka bua ngumvuilu; bualu udi wakula kudi bantu bilondeshila ku muakulu wabu, bua ngumvuilu wabu.
4 Pananku, ndi musua ne nuvuluka ne nganuambidi bitangila muambi awu udi Mukalenga muleja kundi, watambuisha Muana wa Mukoku wa Nzambi, wumbusha mibi ya ba pa buloba.
5 Ne mpindiewu, bikala Muana wa Mukoku wa Nzambi, yeya muikala munsantu, mukengela kutambuishibua ne mâyi, bua kukumbaja buakana bonsu, Ô apu, munyi mutudi, katuyi bansantu to, bakengela bikola bua kutambuishibua, eyowa, mena ne mâyi!
6 Ne mpindiewu, ndi musua kunuebeja, bana betu bananga, munyi muakakumbaja Muana wa Mukoku wa Nzambi buakana bonsu mu kuikala mutambuishibua ne mâyi?
7 Kanuena bamanya ne uvua munsantu anyi? Kadi nansha yeya muikala munsantu, udi uleja kudi bana ba bantu ne, bilondeshila ku musunyi udi udipuekesha kumpala kua Tatu, ne ujadika kudi Tatu ne neikala mutumikidi kudiye mu dilama dia mikenji yenda.
8 Pananku, kunyima kua mutambuishibua ne mâyi, Nyuma wa Tshijila wakatuluka pa mutu penda mu tshimfuanyi tshia nkudimba.
9 Ne kabidi, bidi bileja kudi bana ba bantu bufinakana bua njila, ne bubumbakana bua tshibuelelu, kudibu ne bua kubuelela, yeya muikala muleja tshilejilu kumpala kuabu.
10 Ne wakamba kudi bana ba bantu: Ndonda. Bua nanku, bana betu bananga, munyi mutudi mua kulonda Yezu patuikala katuyi bitaba bua kulama mikenji ya Tatu?
11 Ne Tatu wakamba: Kudimunayi mutshima, kudimunayi mutshima, ne tambuishibuayi mu dîna dia Muananyi wa baluma Munanga.
12 Ne kabidi, dîyi dia Muana diakalua kundi, diamba: Udi mutambuishibua mu dîna dianyi, kudiye Tatu neapesha Nyuma wa Tshijila, bu mudi kundi; pananku, ndondayi, ne enzayi malu anudi bammona ngenza.
13 Bua nanku, bana betu bananga, ndi mumanya ne binualonda Muana, ne kipatshila kajima ka mutshima, kanuyi nuenzela lubombu anyi nudinga kumpala kua Nzambi to, kadi ne dijinga dilelela, nukudimuna mutshima ku mibi yenu, nujadika kudi Tatu ne nudi bitaba bua kuangata dîna dia Kilisto pa mutu penu, mu ditambula—eyowa, mu dilonda Mukalenga wenu ne Mupandishi wenu tô ne mu mâyi, bilondeshila ku dîyi dienda, monayi, pashisha nenupeta Nyuma wa Tshijila; eyowa, pashisha ditambula dia kapia ne dia Nyuma wa Tshijila nedilua; ne pashisha nenuikala mua kuakula ne muakulu wa banjelu, ne kubila misamunu kudi Wa Tshijila wa Isalele.
14 Kadi, monayi, bana betu bananga, nanku dîyi dia Muana diakalua kundi, diamba: Kunyima kua nuenu bakudimuna mutshima ku mibi yenu, ne bajadika kudi Tatu ne nudi bitaba bua kulama mikenji yanyi, ku ditambula dia mu mâyi, ne bangata ditambula dia kapia ne dia Nyuma wa Tshijila, ne bikala mua kuakula ne muakulu mupia-mupia, eyowa, mena ne muakulu wa banjelu, ne kunyima kua ebi bamvila, bivua kuikala bimpa kupita buenu ne kanuvua kuikala bammanya to.
15 Ne ngakumvua dîyi difumina kudi Tatu, diamba: Eyowa, mêyi a Munanga wanyi adi malelela ne a lulamatu. Udi unanukila tô ne ku ndekelu, muina neapandishibua.
16 Ne mpindiewu, bana betu bananga, ku ebu ndi mumanya ne pa kumbusha muntu munanukila tô ne ku ndekelu, ku dilonda tshilejilu tshia Muana wa Nzambi wa moyo to, kena mua kupandishibua to.
17 Bua nanku, enzayi malu andi munuambila ne ndi mumona ne Mukalenga wenu ne Musungidi wenu udi ne neenza; bualu, bua bualu ebu adi malejibua kundi, bua numanya ku tshibuelelu kunudi ne bua kubuelela. Bualu ku tshibuelelu kunudi ne bua kubuelela tshidi dikudimuna dia mutshima ne ditambula dia mu mâyi; ne pashisha ki dilekedibua dia mibi yenu didi dilua ku kapia ne ku Nyuma wa Tshijila.
18 Ne pashisha nudi mu njila mufinakana ne mubumbakana udi ulombola ku moyo wa tshiendelela; eyowa, nudi babuelela ku tshibuelelu; nudi benza bilondeshila ku mikenji ya Tatu ne Muana; ne nudi bapeta Nyuma wa Tshijila, udi ujadika bua Tatu ne Muana, mu dikumbaja dia dilaya divuaye muenza, ne binuabuelela ku njila nenupeta.
19 Ne mpindiewu, bana betu bananga, kunyima kua nuenu babuela mu njila mufinakana ne mubumbakana ewu, ndi ngebeja bionsu bienzabu anyi? Monayi, ndi ngamba kunudi ne, To; bualu kanuena balua tô ne apa to amu bikala ku dîyi dia Kilisto ne ditabuija didi kadiyi dinyungana to kudiye, beyemena monsu ku makumbanyi a udi ne bukitu bua kupandisha.
20 Bua nanku, nudi ne tshia kusêsa kumpala ne disuminyina mu Kilisto, bikala ne dinkenka dijima dia ditekemena, ne dinanga dia Nzambi ne dia bantu bonsu. Pananku, binuasêsa kumpala, nutshionkomokela pa dîyi dia Kilisto, ne nunanukila tô ne ku ndekelu, monayi, nanku Tatu udi wamba: Nenupeta moyo wa tshiendelela.
21 Ne mpindiewu, monayi, bana betu bananga, ewu udi njila; ne kakuena njila mukuabu anyi dîna dikuabu nansha bipeshibua muinshi mua diûlu bidi bipandisha muntu mu bukalenga bua Nzambi to. Ne mpindiewu, monayi, edi didi dilongesha dia Kilisto, ne dilongesha dimuepela ne dilelela dia Tatu, ne dia Muana, ne dia Nyuma wa Tshijila, badi bikala Nzambi umua, kayi ndekelu. Amena.