1 Ne mpindiewu, mema, Nefi, ntshiena mua kufunda malu onsu avua malongeshibua munkatshi mua bantu banyi; nansha ntshiena ne bukitu mu difunda to, bu mudi mu diakula; bualu padi muntu wakula ku bukola bua Nyuma wa Tshijila bukola bua Nyuma wa Tshijila budi buya nabi mu mitshima ya bana ba bantu.

2 Kadi monayi, kudi ba bungi badi bapapishila Nyuma wa Tshijila mitshima yabu, bua ne kena ne muaba munda muabu to; bua nanku, badi bimansha malu a bungi adi mafundibua ne badi ba’angata bu malu a tshianana.

3 Kadi mema, Nefi, ndi mufunda bindi mufunda, ne ndi mbiangata ne bidi bia mushinga wa mukola, ne nangananga bua bantu banyi. Bualu ndi nsambila ne munanunanu buabu mu munya, ne mesu anyi adi abolesha musâmu wanyi butuku, bua bualu buabu; ne ndi mbila kudi Nzambi wanyi mu ditabuija, ne ndi mumanya ne neumvua lubila luanyi.

4 Ne ndi mumanya ne Mukalenga Nzambi neajidila masambila anyi bua tshipeta tshimpa tshia bantu banyi. Ne mêyi andi mufunda mu buteketa neavuijibua makola buabu; bualu adi abitabujija bua kuenza bimpa; adi abamanyisha bitangila batatuabu; ne adi akula bua Yezu, ne abitabujija bua kumuitabuija, ne bua kunanukila tô ne ku ndekelu, udi moyo wa tshiendelela.

5 Ne adi akula malu makola bua mibi, bilondeshila ku patoka pa bulelela; bua nanku, muntu nansha umua kakufîka tshiji bua mêyi andi mufunda, amu muikala wa nyuma wa diabulu.

6 Ndi ntumbila mu patoka; ndi ntumbila mu bulelela; ndi ntumbila mu Yezu wanyi, bualu udi musungila anyima wanyi ku ngena.

7 Ndi ne bunangi bua bantu banyi, ne ditabuija dinena mu Kilisto ne nensambakana ne anyima ya bungi kayiyi katoba ku nkuasa wenda wa tshilumbuluilu.

8 Ndi ne bunangi bua muena Yuda—ndi ngamba muena Yuda, bualu ndi musua kuamba, ba kundi mufumina.

9 Ndi kabidi ne bunangi bua Bena Bisamba bia Benda. Kadi monayi, bualu nansha umua wa aba ntshiena mua kutekemena to pa kumbusha balengeja ne Kilisto, ne babuelela ku tshibuelelu tshibumbakana, ne bendela mu njila mufinakana udi ulombola ku moyo, ne batungunuka mu njila tô ne ku ndekelu wa dituku dia ditêtshibua.

10 Ne mpindiewu, bana betu bananga, ne kabidi muena Yuda, ne nuenu bonsu ndekelu ya buloba, telejayi mêyi â ne itabuijayi mu Kilisto; ne binuabenga kuitabuija mêyi â itabuijayi mu Kilisto. Ne binuitabuija mu Kilisto nenuitabuija mêyi â, bualu adi mêyi a Kilisto, ne udi mu’ampesha; ne adi alongesha bantu bonsu ne badi ne bua kuenza bimpa.

11 Ne bikalawu kâyi mêyi a Kilisto to, dijunguluilayi—bualu Kilisto nealeja kunudi, ne bukola ne butumbi bunena, ne adi mêyi enda, ku dituku dia ndekelu; ne nuenu ne mema netuimana mpala ne mpala, kumpala kua tshilumbuluidi tshienda; ne nenumanya ne ndi mupeshibua mukenji kudiye bua kufunda malu â, nansha bua buteketa buanyi.

12 Ne ndi nsambila Tatu mu dîna dia Kilisto ne ba bungi ba kutudi, kabî bonsu to, bapandishibua mu bukalenga buenda ku dituku dinena ne dia ndekelu.

13 Ne mpindiewu, bana betu bananga, bonsu badi ba ku nzubu wa Isalele, ne nuenu bonsu ndekelu ya buloba, ndi ngakula kunudi bu dîyi dia umua udi ubila ku lupuishi: Shalayi kashidi bilenga tô ne pâlua dituku dinena adi.

14 Ne nuenu babenga kuangata buimpa bua Nzambi, ne kunemeka mêyi a bena Yuda, ne mêyi anyi kabidi, ne mêyi âpatukila mukana mua Muana wa Mukoku wa Nzambi, monayi, ndi nulaya tshiendelela kashidi, bualu mêyi â neanupîsha ku dituku dia ndekelu.

15 Bualu tshindi nsuika pa buloba, netshituadibua bua kunupîsha ku tshilumbuluidi; bualu nanku Mukalenga udi mumpesha mukenji, ne ndi ne tshia kutumikila. Amena.