1 Ne mpindiewu, mema, Nefi, ndi ngakula bitangila mambi avua tatuanyi muakula, bitangila Yosefe, uvuabu bambula mu Ejipitu.

2 Bualu monayi, bulelela wakamba ku Nyuma bitangila ndelanganyi yenda yonsu. Ne mambi akafundaye, kakuena a bungi adi mapita bunena to. Ne wakamba ku Nyuma bitutangila, ne nkongu yetu ya bantu idi ilua; ne adi mafundibua pa bitata bia tshiamua tshia mitaku.

3 Pananku, kunyima kua tatuanyi mujikija diakula bitangila mambi a Yosefe, wakabikila bana ba Lamana, bana benda ba baluma, ne ba bakaji, ne wakabambila ne: Monayi, bana banyi ba baluma, ne ba bakaji, badi bikala bana ba muananyi wa kumpala, ndi musua ne nuteya matshi ku mêyi anyi.

4 Bualu Mukalenga Nzambi udi muamba ne: Monsu munualama mikenji yanyi, nenulubuluka mu bulaba; ne monsu munuapanga kulama mikenji yanyi nenukoshibua ku mpala kuanyi.

5 Kadi monayi, bana banyi ba baluma ne ba bakaji, ntshiena mua kupueka mu lukita luanyi to amu mema mushiya dibenesha pa mutu penu; bualu monayi, ndi mumanya ne binuikala bakoleshibua mu njila unudi ne bua kuyila kanuakumulekela to.

6 Pananku, binuatshipibua, monayi, ndi nshiya dibenesha dianyi pa mutu penu, bua ne mutshipu umbushibua kunudi ne wikala pa mitu ya baledi benu.

7 Bua nanku, bua bualu bua dibenesha dianyi Mukalenga Nzambi kakulekela ne nufua to; bua nanku, neikala ne lusa kunudi ne kudi ndelanganyi yenu bua kashidi.

8 Ne biakalua ne kunyima kua tatuanyi mujikija kuakula kudi bana ba baluma ne ba bakaji ba Lamana, wakenzeja ne bana ba baluma ne ba bakaji ba Lemuele batuadibua kumpala kuenda.

9 Ne wakakula kudibu, wamba ne: Monayi, bana banyi ba baluma ne ba bakaji, badi bikala bana ba muananyi wa baluma muibidi; monayi ndi nushila dibenesha dia tshimua ne dingashidi bana ba baluma ne ba bakaji ba Lamana; bua nanku, kanuakubutuka bonsu to; kadi ku ndekelu ndelanganyi yenu neibeneshibua.

10 Ne biakalua ne pakamana tatuanyi diakula kudibu, monayi, wakakula kudi bana ba baluma ba Yishemaela, eyowa, ne mena ba mu nzubu muenda bonsu.

11 Ne kunyima kua mujikija kuakula nabu, wakakula ne Sama, wamba ne: Udi mubeneshibua, ne ndelanganyi yeba; bualu neupiana bulaba ebu bu mudi muanenu wa baluma Nefi. Ne ndelanganyi yeba neibadibua pamua ne ndelanganyi yenda; ne newikala mena bu mudi muanenu wa baluma, ne ndelanganyi yeba bu mudi yenda; ne neubeneshibua mu matuku eba onsu.

12 Ne biakalua ne kunyima kua tatuanyi, Lehi, muakula ne ba mu nzubu wenda bonsu, bilondeshila ku bivua mu mutshima wenda ne Nyuma wa Mukalenga uvua munda muenda, wakakulakaja. Ne biakalua ne wakafua, ne wakajîkibua.

13 Ne biakalua ne kakuyi matuku a bungi kunyima kua lufu luenda to, Lamana ne Lemuele ne bana ba baluma ba Yishemaela bakamfîkila tshiji bua bualu bua madimuisha a Mukalenga.

14 Bualu mema, Nefi, mvua muenzejibua bua kubambila, bilondeshila ku dîyi dienda; bualu mvua mubambila malu a bungi, ne kabidi tatuanyi, kumpala kua lufu luenda; malu a bungi â adi mafundibua pa bitata bianyi bikuabu; bualu tshitupa tshidi nangananga ne malu a kala tshidi tshifundibua pa bitata bianyi bikuabu.

15 Ne pa ebi ndi mfunda malu a anyima wanyi, ne mifundu ya bungi idi mikanunyibua pa bitata bia kalabi. Bualu anyima wanyi udi usankila mu mifundu, ne mutshima wanyi udi uyinanela meji, ne udi uyifunda bua dilonga ne tshipeta tshimpa tshia bana banyi.

16 Monayi, anyima wanyi udi usankila mu malu a Mukalenga; ne mutshima wanyi udi unana meji ne munanunanu bitangila malu amvua mumona ne mumvua.

17 Nansha nanku, nansha bua buimpa bunena bua Mukalenga, mu dindeja midimu yenda minena ne ya dikema, mutshima wanyi udi utua tshikemu, wamba ne: Ô mema muntu wa dikenga! Eyowa, mutshima wanyi udi unyingalala bua bualu bua musunyi wanyi; anyima wanyi udi ne dikenga bua bualu bua malu mabi anyi.

18 Ndi munyunguludibua ku nseka yonsu, bua bualu bua matêtshibua ne mibi bidi binkuata kakuyi lutatu to.

19 Ne pandi njinga mua kusanka, mutshima wanyi udi utua mikemu bua bualu bua mibi yanyi; nansha nanku, ndi mumanya kudi nganyi kundi mueyemena.

20 Nzambi wanyi uvua muikala tshieyemenu tshianyi; udi mundombola mu ntatu yanyi mu tshipela; ne wakankuba pa mâyi a ndondu mula.

21 Udi munguwuja ne dinanga dienda, mena ne ku dishila dia musunyi wanyi.

22 Udi mupuwisha bena lukuna banyi, ne ku dibakankisha kumpala kuanyi.

23 Monayi, wakumvua lubila luanyi mu munya, ne wakampesha dimanya mu bimônyi butuku.

24 Ne mu munya wakalua ne dikima mu disambila dikola kumpala kuenda; eyowa, dîyi dianyi ngakabandisha kûlu; ne banjelu bakatuluka ne bakansadila.

25 Ne pa mapuapua a Nyuma wenda mubidi wanyi uvua muambudibua kula pa mikuna mila menamena. Ne mesu anyi adi mamona malu manena, eyowa, mena manena kupita bua muntu; bua nanku mvua mukandikibua ne ntshi’afundi to.

26 Ô nanku, bu mundi mumona malu mapita bunena, ne bu mudi Mukalenga mu bupuekela buenda kudi bana ba bantu udi mukumbula bantu ne lusa lupita bungi, bua tshinyi mutshima wanyi neudila ne anyima wanyi neajangulukana mu tshibanda tshia kanyinganyinga, ne musunyi wanyi neunyanguka, ne bukola buanyi nebuteketa, bua bualu bua ntatu yanyi?

27 Ne bua tshinyi nendilekela kudi mibi, bua bualu bua musunyi wanyi anyi? Eyowa, bua tshinyi nempesha matêtshibua njila, bua ne muena bubi apeta muaba mu mutshima wanyi bua kunyangakaja ditalala dianyi ne kutatshisha anyima wanyi anyi? Bua tshinyi ndi mufîka tshiji bua bualu bua muena lukuna wanyi?

28 Bika, anyima wanyi! Kutshifuataladi mu mibi to. Sanka, Ô mutshima wanyi, ne kupeshi kabidi muena lukuna wa anyima wanyi muaba to.

29 Kufîki tshiji kabidi bua bualu bua bena lukuna banyi to. Kutekeshi bukola buanyi bua bualu bua ntatu yanyi to.

30 Sanka, Ô mutshima wanyi, ne bila kudi Mukalenga, ne amba: Ô Mukalenga, nenkusamuna bua kashidi; eyowa, anyima wanyi neasankila kûdi, Nzambi wanyi, ne dibua dia lupandu luanyi.

31 Ô Mukalenga, neusungila anyima wanyi? Neumpatuisha mu bianza bia bena lukuna banyi anyi? Newenza ne mbukuka ku dimueneka dia mibi?

32 Bibuelelu bia ngena bikangibua diba dionsu kumpala kuanyi, bualu bua mutshima wanyi udi mutshibuluka ne nyuma wanyi udi munyingalala! Ô Mukalenga, kukangi bibuelelu bia buakana bueba kumpala kuanyi to, bua ne ngendela mu kajila ka mu tshibanda tshipuekela, bua ngikala mululama mu njila mulandakana!

33 Ô Mukalenga, unjingulula ne nkanzu wa buakana bueba! Ô Mukalenga, ungenzela njila bua dinyema dianyi kumpala kua bena lukuna banyi! Wenza kajila kanyi kalulama kumpala kuanyi! Kuteki dibua dia kulendukila mu njila wanyi to—kadi utokesha njila wanyi kumpala kuanyi, ne kujiki njila wanyi to, kadi njila ya muena lukuna wanyi.

34 Ô Mukalenga, ndi mueyemena kûdi, ne nengeyemena kûdi bua kashidi. Ntshiakuteka tshieyemenu tshianyi ku diboku dia musunyi to; bualu ndi mumanya ne mutshipibua ngewu udi uteka tshieyemenu tshienda ku diboku dia musunyi. Eyowa, mutshipibua ngewu udi uteka tshieyemenu tshienda kudi muntu anyi udi wenza musunyi diboku dienda.

35 Eyowa, ndi mumanya ne Nzambi neapesha ne kalolo kudi udi ulomba. Eyowa, Nzambi wanyi neampesha, mema ntshiyi mulomba bibi to; bua nanku nembandula dîyi dianyi kûdi; eyowa, nembila kûdi, Nzambi wanyi, dibua dia buakana buanyi. Mona, dîyi dianyi nedibanda kûdi bua kashidi, dibua dianyi ne Nzambi wanyi wa tshiendelela. Amena.