1 Monayi, biakalua ne mema, Nefi, ngakela mbila ya bungi kudi Mukalenga Nzambi wanyi, bua bualu bua tshiji tshia bana betu ba baluma.

2 Kadi monayi, tshiji tshiabu kundi tshiakavulangana, mua ne bakakeba bua kuangata moyo wanyi.

3 Eyowa, bakannungena, bamba ne: Muakunyetu wa baluma udi wela meji bua kutukôkesha; ne tudi bapeta ditêta dikola bua bualu buenda; bua nanku, mpindiewu tumushipayi, bua katutatshishibu kabidi ku mêyi enda to. Bualu monayi, katuena basua ne ikala mukôkeshi wetu to; bualu mbuetu tuetu, badi bikala bakulu, bua kukôkesha bantu aba.

4 Mpindiewu ntshiena mfunda pa bitata ebi mêyi onsu akannungenabu to. Kadi bidi bikumbana bua mema kuamba ne, bakakeba bua kuangata moyo wanyi.

5 Ne biakalua ne Mukalenga wakandimuisha ne, mema, Nefi, mvua ne tshia kubashiya ne kunyemena mu tshipela, ne bonsu bakasua kuya nanyi.

6 Bua nanku, biakalua ne mema, Nefi, ngakangata dîku dianyi, ne kabidi Zolama ne dîku dienda, ne Sama, mukulu wanyi wa baluma, ne dîku dienda, ne Yakoba ne Yosefe, bakunyi banyi ba baluma, ne kabidi bana betu ba bakaji, ne bonsu bakasua kuya nanyi. Ne bonsu bakasua kuya nanyi bavua abu bavua bitabuija madimuisha ne mabuluila a Nzambi; bua nanku, bakumvuila mêyi anyi.

7 Ne tuakangata ntenta yetu ne bintu bionsu bituvua mua kuambula, ne tuakenza luendu mu tshipela bua mutantshi wa matuku a bungi. Ne kunyima kua tuetu benza luendu bua mutantshi wa matuku a bungi tuakâsa ntenta yetu.

8 Ne bantu banyi bakasua ne tuinyika dîna dia muaba ewu ne Nefi; bua nanku, tuakawinyika ne Nefi.

9 Ne bonsu bavua nanyi bakitaba bua kudibikila ne bantu ba Nefi.

10 Ne tuakatangila bua kulama mêyi, ne mikandu, ne mikenji ya Mukalenga mu malu onsu, bilondeshila ku mikenji ya Mose.

11 Ne Mukalenga uvua netu; ne tuakalubuluka menamena; bualu tuakakuna mamînu, ne tuakapola kabidi bia bungi. Ne tuakabanga kumuna bisumbu bia bimuna bikesa ne bia bimuna binena, ne bia nyama ya mishindu yonsu.

12 Ne mema, Nefi, mvua kabidi mutuala miandiku ivua mikanunyibua pa bitata bia kalabi; ne kabidi dibulungu, anyi kaleji njila, kavua kalongolodibua bua tatuanyi kudi tshianza tshia Mukalenga, bilondeshila ku tshidi tshifundibua.

13 Ne biakalua ne tuakabanga kulubuluka menamena, ne kuvulangana mu bulaba.

14 Ne mema, Nefi, ngakangata muela wa mvita wa Labana, ne ku mushindu wawu ngakenza miela ya mvita ya bungi, bua ne bantu bavua mpindiewu babikidibua ne Bena Lamana kabalu kutuluila mu mushindu mukuabu ne kutubutula; bualu mvua mumanya lukinu luabu kundi ne bana banyi ne bavua babikidibua ne bantu banyi.

15 Ne ngakalongesha bantu banyi bua kuibaka nzubu, ne bua kuenza mudimu wa mishindu yonsu ya mabaya, ne wa tshiamua tshifika, ne wa tshiamua tshia kabanda, ne wa tshiamua tshia kalabi, ne wa tshiamua tshikolesha, ne wa ngolo, ne wa mpalata, ne wa mabua a bimua a mushinga, bivua bikala bipita bungi.

16 Ne mema Nefi ngakibaka ntempelo; ne ngakamuasa ku mushindu wa ntempelo wa Solomo amu kumbusha kavua muibakibua ne bintu bia mushinga bia bungi kupita to; bualu kabivua bisanganyibua mu bulaba to, bua nanku, kavua mua kuibakibua bu mudi ntempelo wa Solomo to. Kadi mushindu wa diashibua uvua bu mudi wa ntempelo wa Solomo; ne mudimu wa bianza wenda uvua muimpa menamena.

17 Ne biakalua ne mema, Nefi, ngakavuija bantu banyi bikala benji ba mudimu bikola, ne bua kukuata mudimu ne bianza biabu.

18 Ne biakalua ne bakasua ne ngikala mfumu wabu. Kadi mema, Nefi, ngakajinga ne kabikadi ne mfumu to; nansha nanku, ngakabenzela bilondeshila ku tshivua mu bukôkeshi buanyi.

19 Ne monayi, mêyi a Mukalenga avua makumbana kudi bana betu, avuaye muakula bibatangila, ne nengikala mukokeshi wabu ne mulongeshi wabu. Pananku, mvua muikala mukokeshi wabu ne mulongeshi wabu bilondeshila ku mikenji ya Mukalenga, tô ne ku diba diakakebabu bua kuangata moyo wanyi.

20 Pananku, dîyi dia Mukalenga diakakumbana diakakulaye kundi, wamba ne: Bu mudibu bapanga kumvuila mêyi eba, nebakoshibua ku mpala kua Mukalenga. Ne monayi, bavua bakoshibua ku mpala kuenda.

21 Ne uvua muvuija mulawu pa mutu pabu, eyowa, mena mulawu mukola, bua bualu bua malu mabi abu. Bualu monayi, bavua bamupapishila mitshima yabu, bua ne yakalua bu mudi lusoka, pananku, bualu muvuabu batoka, ne bimpa kumona menamena ne balengela, bua ne kabalobeshi bantu banyi to, Mukalenga Nzambi wakenzeja ne dikoba dia bufîkuluka dilua pa mutu pabu.

22 Ne nanku Mukalenga Nzambi udi wamba: Nengenzeja ne nebikala bendesha ku moyokudi bantu beba, amu bobu bakudimuna mutshima ku malu a bubi abu.

23 Ne mitshipibua neikala ndelanganyi ya udi udisangisha ne ndelanganyi yabu; bualu neitshipibua mena ne mutshipu wa momumua. Ne Mukalenga wakamba nanku, ne biakenzeka.

24 Ne bua bualu bua mutshipu wabu uvua muikala kudibu bakalua bantu bafuba, buwula ne mafi ne budimu; ne bakakeba mu tshipela nyama idi idia mikuabu.

25 Ne Mukalenga Nzambi wakangambila ne: Nebikala munyasu kudi ndelanganyi yeba, bua kubasonsola ku dimvuluka; ne bu mudibu bapanga kumvuluka, ne kumvuila mêyi anyi, nebabanyasula mena ne ku dibutuka.

26 Ne biakalua ne mema, Nefi, ngakajidila Yakoba ne Yosefe, bua ne bikala bakuidi ne balongeshi pa mutu pa bulaba bua bantu banyi.

27 Ne biakalua ne tuvua basomba mushindu wa disanka.

28 Ne bidimu makumi asatu bivua bipita katshia ku tshikondu tshituakumbuka ku Yelushalema.

29 Ne mema, Nefi, mvua mulama miandiku ya bantu banyi tô ne apa, pa bitata bianyi, bimvua muenza.

30 Ne biakalua ne Mukalenga Nzambi wakangambila ne: Enza bitata bikuabu; ne neukanunapu malu a bungi adi mimpa ku mesu anyi, bua tshipeta tshimpa tshia bantu beba.

31 Bua nanku, mema, Nefi, bua kuikala ne ditumikila ku mikenji ya Mukalenga, ngakaya ne ngakenza bitata ebi bindi mukanunapu malu â.

32 Ne ngakanunyi bidi bisankisha Nzambi. Ne biasanka bantu banyi ne malu a Nzambi nebasanka bua mikanunu yanyi idi pa bitata ebi.

33 Ne biajinga bantu banyi bua kumanya tshitupa tshidi tshilonda bikola malu a kala a bantu banyi badi ne tshia kukebulula bitata bianyi bikuabu.

34 Ne bidi bikumbana bua mema kuamba ne bidimu makumi anayi bivua bipita, ne tukavu bapeta mvita ne makokangana ne bana betu.