၃ နီဖိုင်း ၁၀

အခန်းကြီး ၁၀

ထိုပြည်၌ နာရီပေါင်းများစွာကြာအောင် တိတ်ဆိတ်ခြင်းရှိ၏—ကြက်မသည် မိမိသားငယ်တို့ကို စုရုံးသကဲ့သို့ ခရစ်တော်၏အသံသည် သူ၏လူမျိုးတို့ကို စုရုံးမည့်အကြောင်း ကတိထားတော်မူ၏—လူတို့အထဲမှ သာ၍ဖြောင့်မတ်သောသူတို့သည် ကာကွယ်စောင့်မခံရ၏။ အေဒီ ၃၄–၃၅ ခန့်။

၁ ယခုမူကား၊ ရှုလော့၊ အချိန်တန်လာသောအခါ၊ ထိုပြည်ရှိလူခပ်သိမ်းတို့သည် ဤစကားတော်တို့ကို ကြား၍ သက်သေခံကြ၏။ ဤစကားတော်တို့ကို ဟောပြောပြီးမှ ထိုပြည်၌ နာရီပေါင်းများစွာကြာအောင် တိတ်ဆိတ်ခြင်းရှိ၏။

၂ အကြောင်းမူကား၊ လူတို့၏အံ့ဩခြင်းမှာ အလွန်ကြီးမားသဖြင့်၊ သူတို့သည် ကွပ်မျက်ခံရသော မိမိတို့၏ဆွေမျိုးများ ဆုံးရှုံးခြင်းအတွက် မြည်တမ်းခြင်းနှင့် ညည်းတွားမြည်တမ်းခြင်းများကို ရပ်တန့်ကြ၏။ ထို့ကြောင့်၊ ထိုပြည်တစ်ခုလုံး၌ နာရီပေါင်းများစွာကြာအောင် တိတ်ဆိတ်ခြင်းရှိ၏။

၃ ဤသို့အားဖြင့်အချိန်တန်လာသောအခါ၊ လူတို့ထံသို့ အသံရောက်လာ၍၊ လူခပ်သိမ်းတို့ ကြားသဖြင့်၊ သက်သေခံကြ၏။ မိန့်တော်မူသည်ကား၊

၄ အို ယာကုပ်၏အမျိုးအနွယ်များဖြစ်သူ၊ ထိုမှတစ်ပါး၊ ဣသရေလအမျိုးသားများ ဖြစ်သူ၊ ပြိုကျလေသောဤမြို့ကြီးတို့မှ အသင်လူမျိုးတို့၊ ကြက်မသည် မိမိသားငယ်တို့ကို မိမိအတောင်အောက်၌ စုရုံးသကဲ့သို့ ငါသည် သင်တို့ကို အကြိမ်ကြိမ်စုရုံး၍၊ ကျွေးမွေးလေပြီ။

၅ ထိုမှတစ်ဖန်၊ ကြက်မသည် မိမိသားငယ်တို့ကို မိမိအတောင်အောက်၌ စုရုံးသကဲ့သို့ သင်တို့ကို အကြိမ်ကြိမ်စုရုံးစေခြင်းငှာ၊ ငါအလိုရှိပြီ။ ထိုမှတစ်ပါး၊ အို ကျဆုံးသောသူ၊ အသင်ဣသရေလအမျိုးသားတို့၏လူမျိုးတို့။ ထိုမှတစ်ပါး၊ အို ကျဆုံးသောသင်တို့ကဲ့သို့၊ ယေရုရှလင်မြို့ ၌နေထိုင်သော၊ အသင်ဣသရေလအမျိုးသားတို့၏လူမျိုးတို့၊ အမှန်စင်စစ်၊ ကြက်မသည် မိမိသားငယ်တို့ကို စုရုံးသကဲ့သို့ သင်တို့ကို အကြိမ်ကြိမ်စုရုံးစေခြင်းငှာ၊ ငါအလိုရှိပြီ။ သင်တို့မူကား၊ အလိုမရှိကြ။

၆ အို ငါချမ်းသာပေးသော အသင် ဣသရေလအမျိုးသားတို့၊ သင်တို့သည် နောင်တရ၍၊ စိတ်နှလုံးမှ အကြွင်းမဲ့ဆက်ကပ်ခြင်းဖြင့် ငါ့ထံသို့ ပြန်လာကြမည်ဆိုလျှင်၊ ကြက်မသည် မိမိသားငယ်တို့ကို မိမိအတောင်အောက်၌ စုရုံးသကဲ့သို့၊ ငါသည် သင်တို့ကို အကြိမ်ကြိမ် စုရုံးမည်။

၇ သို့ရာတွင်၊ ထိုသို့မပြုလျှင်၊ အို ဣသရေလအမျိုးသားတို့၊ သင်တို့နေထိုင်ရာအရပ်တို့သည် သင်တို့ဘိုးဘေးတို့ထံပြုခဲ့သည့် ပဋိညာဉ်ကို ပြီးပြည့်စုံစေသည့် ကာလတိုင်အောင် လူဆိတ်ညံရာဖြစ်လာလိမ့်မည်။

၈ ယခုမူကား၊ အချိန်တန်လာသောအခါ၊ လူတို့သည် ဤစကားများကို ကြားလေပြီးနောက်၊ ရှုလော့၊ သူတို့၏ဆွေမျိုးများနှင့် အဆွေခင်ပွန်းများ ဆုံးရှုံးရသောကြောင့်၊ တစ်ဖန် ငိုကြွေး၍ ညည်းတွားမြည်တမ်းစပြုကြ၏။

၉ ဤသို့အားဖြင့်အချိန်တန်လာသောအခါ၊ ထိုနည်းအားဖြင့် သုံးရက်ကုန်လွန်သွား၏။ နံနက်ခင်းအချိန်ဖြစ်၍၊ မှောင်မိုက်သည် ထိုပြည်၏မျက်နှာပြင်မှ ပြန့်လွင့်သွား၏၊ မြေကြီးသည်လည်း အတုန် ရပ်၍၊ ကျောက်တို့သည်လည်း အကွဲရပ်၍၊ ကြောက်မက်ဖွယ်သော ညည်းတွားခြင်းတို့သည်လည်း ရပ်၏၊ ခပ်သိမ်းသော အုတ်အုတ်ကျက်ကျက်အသံဗလံများလည်း ကွယ်ပျောက်သွား၏။

၁၀ မြေကြီးသည်လည်း တစ်ဖန်ပေါင်းစပ်၍ တည်မြဲ၏။ အသက်ချမ်းသာရသောသူတို့၏ ငိုကြွေးမြည်တမ်းခြင်း၊ ငိုကြွေးခြင်းနှင့် ငိုကြွေးတမ်းတခြင်းတို့သည်လည်း ရပ်တန့်၏။ ထို့အတူ၊ သူတို့၏ ငိုကြွေးမြည်တမ်းခြင်းသည် ဝမ်းမြောက်ခြင်းသို့လည်းကောင်း၊ သူတို့၏မြည်တမ်းခြင်းသည် သူတို့၏ရွေးနှုတ်ရှင်၊ ကိုယ်တော်ရှင်ယေရှုခရစ်တော်ကို ချီးမွမ်းခြင်းနှင့် ကျေးဇူးတော်ချီးမွမ်းခြင်းသို့လည်းကောင်း ပြောင်းလဲသွားလေ၏။

၁၁ ဤရွေ့ကား၊ ပရောဖက်တို့အားဖြင့် ဟောပြောသည့် ကျမ်းစာများပြီးပြည့်စုံခြင်းပေတည်း။

၁၂ ကယ်တင်ခြင်းသို့ ရောက်သောသူတို့မှာ လူတို့အထဲမှ သာ၍ဖြောင့်မတ်သောသူများ ဖြစ်၏၊ သူတို့သည်ကား၊ ပရောဖက်တို့ကို လက်ခံ၍၊ ကျောက်ခဲနှင့်ပစ်ခြင်းမရှိသော သူများဖြစ်၏။ သူတို့သည်ကား၊ သန့်ရှင်းသူတို့၏အသွေးကို မသွန်းလောင်းသောသူ၊ ချမ်းသာရသောသူများလည်းဖြစ်၏—

၁၃ သူတို့သည် ချမ်းသာရ၍၊ မြေကြီးထဲ၌မြုပ်၍ အဖို့မခံရလေသောသူများလည်းဖြစ်၏။ ပင်လယ်ရေနက်၌လည်း မနစ်မြုပ်ကြ။ မီးလည်း မလောင်မြိုက်ကြ။ သူတို့အပေါ်သို့ ကျရောက်သည့်အရာမရှိ၍ သေခြင်းသို့လည်း မရောက်ကြ။ လေပွေဖြင့် သယ်ဆောင်သွားသည်ကိုလည်း မခံရ။ မီးခိုးနှင့် အမှောင်ထုတို့၏လွှမ်းမိုးခြင်းကိုလည်း မခံရ။

၁၄ ယခုမူကား၊ ဖတ်သူမှန်သမျှအား နားလည်စေလော့။ ကျမ်းစာများရှိသောသူအား စေ့စေ့ဖတ်၍၊ မီးလျှံဖြင့်လည်းကောင်း၊ မီးခိုးဖြင့်လည်းကောင်း၊ မိုးသက်မုန်တိုင်းများဖြင့်လည်းကောင်း၊ လေပွေတို့ဖြင့်လည်းကောင်း၊ သူတို့ကို လက်ခံခြင်းငှာမြေကြီးအက်ကွဲခြင်းဖြင့်လည်းကောင်းဖြစ်လေသည့် ဤခပ်သိမ်းသော သေခြင်းနှင့် ပျက်စီးခြင်းတို့ ရှိမရှိကို ကြည့်၍ သိမြင်စေလော့။ ဤအရာခပ်သိမ်းတို့သည်ကား၊ သန့်ရှင်းသည့်ပရောဖက်များစွာတို့၏ ပရောဖက်ပြုဟောချက်များကို ပြီးပြည့်စုံစေသည့်တိုင် မဟုတ်သေး။

၁၅ ရှုလော့၊ သင်တို့ကို ငါဆိုသည်ကား၊ အမှန်စင်စစ်၊ ခရစ်တော်ကြွလာတော်မူရာ၌ များစွာသောသူတို့သည် ဤအရာတို့အကြောင်းကို သက်သေခံကြ၏။ ဤအရာတို့အကြောင်းကို သက်သေခံသောကြောင့်လည်း ကွပ်မျက်ခံရကြ၏။

၁၆ ထိုမှတစ်ပါး၊ ပရောဖက်ဇေနုတ်သည် ဤအရာများအကြောင်းကို သက်သေခံ၏။ ဇေနော့ကလည်း ဤအရာများအကြောင်းကို ပြောခဲ့သည်မှာ အထူးသဖြင့် သူတို့အမျိုးအနွယ်၏ ကျန်ကြွင်းသောသူများဖြစ်သည့် ငါတို့အကြောင်းကို သူတို့သက်သေခံကြသောကြောင့်ပေတည်း။

၁၇ ရှုလော့၊ ငါတို့အဘယာကုပ်ကလည်း ယောသပ်အမျိုးအနွယ်၏ ကျန်ကြွင်းသောသူတို့အကြောင်းကို သက်သေခံ၏။ ရှုဦးလော့၊ ငါတို့သည် ယောသပ်အမျိုးအနွယ်၏ ကျန်ကြွင်းသောသူများ မဟုတ်သလော။ ငါတို့အကြောင်းကို သက်သေခံသည့် ဤအရာတို့ကိုလည်း ငါတို့အဘလေဟိသည် ယေရုရှလင်မှဝေးရာသို့ ဆောင်ယူခဲ့သည့် ကြေးပုရပိုက်ပြားများပေါ်၌ ရေးမထားသလော။

၁၈ ဤသို့အားဖြင့်အချိန်တန်လာသောအခါ၊ သုံးဆယ်လေးနှစ်မြောက်အဆုံးပိုင်း၌၊ ရှုလော့၊ ချမ်းသာရသောသူ နီဖိုင်းအမျိုးသားတို့နှင့်အတူ၊ ချမ်းသာရသောသူ လာမန်အမျိုးသားဟုခေါ်သောသူတို့သည် ကြီးစွာနှစ်သက်ခံရလျက်၊ သူတို့၏ဦးခေါင်းများအပေါ် ကြီးစွာသောကောင်းချီးမင်္ဂလာများ သွန်းလောင်းတော်မူခြင်းခံရ၍၊ ကောင်းကင်ဘုံသို့ ခရစ်တော်တက်၍သွားတော်မူပြီး မကြာမြင့်မီ သူတို့ထံသို့ သူကိုယ်တိုင် အမှန်ပင်ထင်ရှားစွာပြတော်မူသည့်တိုင်အောင်ဖြစ်ကြောင်း သင်တို့ကို ငါပြောပြမည်—

၁၉ သူ၏ကိုယ်ခန္ဓာကို သူတို့ထံသို့ ပြတော်မူ၍၊ သူတို့ကို အမှုတော်ဆောင်လျက်ရှိ၏။ သူ၏အမှုတော်ဆောင်ခြင်းအကြောင်း မှတ်တမ်းကိုလည်း နောင်ကာလမှရေးဦးမည်။ ထို့ကြောင့်၊ ယခုကာလ၌၊ ငါသည် ငါ၏စကားများကို လက်စသတ်၏။