၃ နီဖိုင်း ၃

အခန်းကြီး ၃

ဂါဒျန်တန်အကြီးအကဲ ဂိဒျန်ဟိသည် လာချော်နေရုနှင့် နီဖိုင်းအမျိုးသားတို့ကို သူတို့ကိုယ်တိုင်နှင့် သူတို့၏ပြည်များကို အညံ့ခံရန် တောင်းဆို၏—လာချော်နေရုသည် ဂိဂိဒေါနိအား တပ်များ၏ဗိုလ်ချုပ်မင်းအဖြစ် ခန့်အပ်၏—နီဖိုင်းအမျိုးသားတို့သည် မိမိတို့ကိုယ်ကိုကာကွယ်ရန် ဇရဟင်မလနှင့် အလျှံပယ်၌ စည်းဝေးကြ၏။ အေဒီ ၁၆–၁၈ ခန့်။

၁ ယခုမူကား၊ အချိန်တန်လာသောအခါ၊ ခရစ်တော်ကြွလာတော်မူခြင်းမှ တစ်ဆယ်ခြောက်နှစ်မြောက်၌၊ ထိုပြည်၏ အုပ်ချုပ်သူလာချော်နေရုသည် ဤဓားပြအဖွဲ့၏ အကြီးအကဲအုပ်ချုပ်သူထံမှ အမှာစာတစ်စောင်ကို လက်ခံရရှိ၏။ ရေးထားသော ဤစကားတို့သည်ကား၊

၂ လာချော်နေရု၊ ပြည်၏ အမြတ်ဆုံးနှင့် အုပ်ချုပ်သူမင်း၊ ရှုလော့၊ ငါသည် သင့်ထံသို့ ဤအမှာစာကို ရေးပြီး၊ သင်တို့၏ အခွင့်အရေးနှင့် လွတ်လပ်ခြင်းဟု သင်တို့ထင်မြင်သောအရာကို ထိန်းသိမ်းရာ၌ သင်၏ခိုင်မြဲခြင်းနှင့် ထို့အတူ၊ သင့်လူမျိုးတို့၏ ခိုင်မြဲခြင်းကြောင့်လည်း သင့်ကို အလွန်ကြီးစွာချီးမွမ်းပါ၏။ ထိုမှတစ်ပါး၊ သင်တို့၏ လွတ်လပ်ခြင်း၊ သင်တို့၏ဥစ္စာပစ္စည်းများနှင့် သင်တို့၏ တိုင်းပြည်၊ သို့မဟုတ် ထိုကဲ့သို့သင်တို့ ခေါ်သည့်အရာကို ကာကွယ်ရာ၌ ဘုရားသခင်၏လက်တော်အားဖြင့် ထောက်မခံရသကဲ့သို့ သင်တို့ကောင်းစွာခုခံကြ၏။

၃ အမြတ်ဆုံးဖြစ်တော်မူသော လာချော်နေရု၊ သင်တို့သည် ယခုဤအချိန်တွင် သူတို့လက်ထဲ၌ လက်နက်ကို စွဲကိုင်လျက်ရှိသူ၊ ကြီးစွာသောစိတ်စောခြင်းဖြင့်—နီဖိုင်းအမျိုးသားတို့ကို သွား၍တိုက်ခိုက်ဖျက်ဆီးကြဟူသော အမိန့်ကို စောင့်နေသည့်၊ ငါ၏အုပ်ချုပ်မှု၌ရှိကြသည့် ရဲရင့်သောသူများစွာတို့ကို ခုခံနိုင်သည်ဟု ထင်မှတ်ကြသည်မှာ ငါ့အနေဖြင့် သင်တို့သည် အလွန်မိုက်မဲ၏၊ အချည်းနှီးဖြစ်၍ သနားစရာဖြစ်ပေ၏။

၄ ငါသည်လည်း သူတို့၏ အနိုင်မခံသောစိတ်ကို သိသဖြင့်၊ သူတို့ကို စစ်တလင်း၌ စမ်းသပ်၍၊ သင်တို့ သူတို့ကို ပြုလေသည့် များစွာသော ပြစ်မှားခြင်းတို့ကြောင့်၊ သင်တို့အပေါ်ရှိသည့် သူတို့၏ထာဝရတည်မြဲသောမုန်းတီးခြင်းကို သိသဖြင့်၊ ထို့ကြောင့်၊ သူတို့ဆင်းလာ၍ သင်တို့ကို တိုက်ခိုက်ကြလျှင်၊ သင်တို့ထံ ရှင်းရှင်းဖျက်ဆီးခြင်းနှင့်အတူ ရောက်လိမ့်မည်။

၅ ထို့ကြောင့်၊ သင်တို့ မှန်ကန်သည်ဟု ယုံကြည်သည့်အရာ၌ သင်တို့၏ခိုင်မြဲခြင်းနှင့် စစ်တလင်း၌ သင်တို့၏မြတ်သောစိတ်ကြောင့်၊ ငါသည် သင်တို့၏ကောင်းကျိုးအတွက် ခံစားမိသဖြင့်၊ ဤအမှာစာကို ရေးလေပြီးလျှင်၊ ငါ့လက်ဖြင့်ပိတ်၏။

၆ ထို့ကြောင့်၊ ငါသည် သူတို့ သင်တို့ကို ဓားဘေးဖြင့် ဒဏ်ခတ်၍ သင်တို့အပေါ်သို့ ဖျက်ဆီးခြင်းကို ရောက်စေမည့်အစား၊ ငါ၏ဤလူတို့ထံသို့ သင်တို့၏မြို့များ၊ သင်တို့၏ပြည်များနှင့် သင်တို့၏ပိုင်ဆိုင်ရာတို့ကို သင်တို့ပေးအပ်မည့်အကြောင်း တောင်းဆို၍ ရေး၏။

၇ သို့မဟုတ်၊ တစ်နည်းအားဖြင့်၊ သင်တို့ကိုယ်ကို ငါတို့ထံသို့ အရှုံးပေး၍၊ ငါတို့နှင့် ပူးပေါင်း၍၊ ငါတို့၏လျှို့ဝှက်သောအမှုများနှင့် အကျွမ်းဝင်လာကြ၊ ထို့အတူ ငါတို့၏ညီအစ်ကိုများ ဖြစ်လာ၍ သင်တို့သည် ငါတို့ကဲ့သို့ဖြစ်လာကြ—ငါတို့၏ကျွန်များမဟုတ်၊ ငါတို့၏ခပ်သိမ်းသော ဥစ္စာပစ္စည်းများကိုပိုင်သည့် ငါတို့၏ညီအစ်ကိုများနှင့် အပေါင်းအဖော်များသာ ဖြစ်လာကြစေလို၏။

၈ ရှုဦးလော့၊ ငါသည် သင့်ကို ကျိန်ဆိုခြင်းဖြင့် ကျိန်ဆိုသည်မှာ သင်တို့သည် ဤအမှုကို ပြုလျှင်၊ အဖျက်ဆီးခံရမည်မဟုတ်။ သို့ရာတွင်၊ သင်တို့သည် ဤအမှုကို မပြုလျှင်၊ ငါသည် သင့်ကို ကျိန်ဆိုခြင်းဖြင့် ကျိန်ဆိုသည်မှာ၊ ငါ၏တပ်များ ဆင်းလာပြီး သင်တို့ကို တိုက်ခိုက်စေရန် နောက်တစ်လ၌ ငါအမိန့်ပေးမည်။ သူတို့သည်လည်း လက်ကို မရုပ်သိမ်းဘဲ၊ သင်တို့ကို ကွပ်မျက်၍ သင်တို့ ဆိတ်သုဉ်းသွားသည့်တိုင်အောင်ပင် ဓားကို သင်တို့အပေါ် ကျရောက်စေလိမ့်မည်။

၉ ရှုဦးလော့၊ ငါသည် ဂိဒျန်ဟိဖြစ်၏။ ငါသည် ဤလျှို့ဝှက်သော ဂါဒျန်တန်အဖွဲ့၏ အုပ်ချုပ်သူလည်းဖြစ်၏။ ထိုအဖွဲ့နှင့် အဖွဲ့၏အမှုတို့ကောင်းမြတ်ကြောင်းကို သိ၏။ ထိုအရာတို့သည်လည်း ရှေးအခါကတည်းက ရှိ၍၊ ငါတို့ထံသို့ လက်ဆင့်ကမ်း၍ ပေးခဲ့၏။

၁၀ ငါသည် ဤအမှာစာကို အသင် လာချော်နေရုထံသို့ ရေး၏၊ သင်တို့သည် အသွေးမသွန်းလောင်းဘဲနှင့် သင်တို့ပြည်များနှင့် သင်တို့၏ပိုင်ဆိုင်ရာတို့ကို ပေးအပ်မည်ဟု ငါမျှော်လင့်၏၊ သူတို့အာဏာစက်၏အခွင့်အရေးများကို ထိန်းသိမ်းထားရာ၌ သင်တို့၏ဆိုးညစ်ခြင်းကြောင့်၊ သင်တို့ထံမှ ခွဲထွက်လေသူ ငါ၏လူမျိုးတို့သည် သူတို့၏အခွင့်အရေးများနှင့် အာဏာစက်ကို ပြန်လည်ရယူနိုင်၏။ သင်တို့သည် ဤအမှုကို မပြုလျှင်၊ ငါသည် သူတို့ခံစားရသော မတရားမှုအတွက် လက်တုံ့ပြန်မည်။ ငါသည်ဂိဒျန်ဟိဖြစ်၏။

၁၁ ယခုမူကား၊ အချိန်တန်လာသောအခါ၊ လာချော်နေရုသည် ဤအမှာစာကို လက်ခံရရှိလျှင်၊ နီဖိုင်းအမျိုးသားတို့၏ပြည်ကို ပိုင်ဆိုင်ခွင့်တောင်းဆိုခြင်း၌လည်းကောင်း၊ လူတို့ကို ခြိမ်းခြောက်ရာ၌လည်းကောင်း၊ ထိုဆိုးညစ်၍၊ စက်ဆုပ်ရွံရှာဖွယ်ကောင်းသည့် ဓားပြများထံသို့ ခွဲထွက်သွားခြင်းအားဖြင့်၊ သူတို့ကိုယ်တိုင်မတရားပြုလေသည်မှတစ်ပါး၊ မတရားမှုကို မခံစားရသူတို့နှင့်စပ်လျဉ်း၍၊ မတရားမှုအတွက် လက်စားချေရာ၌လည်းကောင်း၊ ဂိဒျန်ဟိ၏ရဲရင့်ခြင်းကြောင့် လွန်စွာအံ့ဩ၏။

၁၂ ယခုတွင်၊ ရှုလော့၊ အုပ်ချုပ်သူ ဤလာချော်နေရုသည် ဖြောင့်မတ်သောလူတစ်ဦးဖြစ်၏၊ ဓားပြတစ်ဦး၏ တောင်းဆိုခြင်းများနှင့် ခြိမ်းခြောက်ခြင်းများအားဖြင့် ကြောက်လန့်ခြင်းမရှိနိုင်။ ထို့ကြောင့်၊ သူသည် ဓားပြတို့၏အုပ်ချုပ်သူ ဂိဒျန်ဟိ၏အမှာစာကို စေ့စေ့နားမထောင်၊ ဓားပြများ ဆင်းလာ၍တိုက်ခိုက်မည့် အချိန်၌ ခွန်အားအတွက် သူ၏လူမျိုးတို့ကို၊ ကိုယ်တော်ရှင်ထံသို့သာ တောင်းလျှောက်စေ၏။

၁၃ ထိုမှတစ်ပါး၊ သူသည် လူမျိုးခပ်သိမ်းတို့၌ ကြေညာချက်ကို ထုတ်ပြန်သည်မှာ သူတို့၏မိန်းမများ၊ ထို့အတူ၊ သူတို့၏သားသမီးများ၊ သူတို့၏သိုးစုများနှင့် သူတို့၏နွားစုများ၊ ထို့အတူ သူတို့၏မြေမှတစ်ပါး၊ သူတို့၏ခပ်သိမ်းသော ဥစ္စာပစ္စည်းများကို တစ်ခုသောအရပ်သို့ အတူတကွ စုဝေးစေရမည့်အကြောင်းပေတည်း။

၁၄ ခံတပ်များကိုလည်း သူတို့၏ပတ်လည်၌ တည်ဆောက်စေ၏၊ ထိုခံတပ်များကို အလွန်အားကြီးစေ၏။ နီဖိုင်းအမျိုးသားတို့နှင့် လာမန်အမျိုးသားတို့ နှစ်မျိုးစလုံး၊ သို့မဟုတ် နီဖိုင်းအမျိုးသားတို့၌ ရေတွက်ခြင်းခံရလေသူခပ်သိမ်းတို့၏ တပ်များကိုလည်း သူတို့ကို စောင့်ကြည့်ရန်နှင့် သူတို့ကို ဓားပြတို့၏ရန်မှ နေ့ရော ညပါ ကာကွယ်ရန် ပတ်လည်၌ အစောင့်များအဖြစ်ချထားစေ၏။

၁၅ ထိုမှတစ်ပါး၊ သူတို့ကို ဆိုလေသည်ကား၊ ကိုယ်တော်ရှင် အသက်ရှင်တော်မူသည့်အတိုင်း၊ သင်တို့သည် သင်တို့၏ခပ်သိမ်းသောဒုစရိုက်များမှ နောင်တရခြင်းနှင့် ကိုယ်တော်ရှင်ထံသို့ တောင်းလျှောက်ခြင်းမရှိလျှင်၊ ထိုဂါဒျန်တန်ဓားပြတို့၏လက်မှ အလျှင်းကယ်လွှတ်မခံရ။

၁၆ အလွန်ကြီးမြတ်၍၊ အံ့ဩဖွယ်ကောင်းသည်မှာ လာချော်နေရု၏ စကားများနှင့် ပရောဖက်ပြုဟောချက်များဖြစ်လေရာ၊ ကြောက်ရွံ့ခြင်းကို လူတို့အပေါ်ကျရောက်လာစေ၏။ သူတို့သည်လည်း လာချော်နေရု၏စကားများအတိုင်း ပြုရန် သူတို့၏အစွမ်းရှိသမျှဖြင့် သူတို့ကိုယ်တိုင် ကြိုးပမ်းအားထုတ်ကြ၏။

၁၇ ဤသို့အားဖြင့်အချိန်တန်လာသောအခါ၊ လာချော်နေရုသည် ဓားပြများ တောရိုင်းထဲမှ ထွက်၍ဆင်းလာပြီးလျှင် မိမိတို့ကို တိုက်ခိုက်မည့်အချိန်၌ နီဖိုင်းအမျိုးသားတို့၏ ခပ်သိမ်းသောတပ်များကို အမိန့်ပေးစေရန် သူတို့အပေါ်၌ ဗိုလ်ချုပ်မင်းများကို ခန့်အပ်ထား၏။

၁၈ ယခုတွင်၊ ဗိုလ်ချုပ်မင်းခပ်သိမ်းနှင့် နီဖိုင်းအမျိုးသားတပ်ခပ်သိမ်း၏ တပ်မှူးကြီးတို့၌ အကြီးဆုံးသောသူကို ခန့်အပ်ထား၏၊ ထိုသူ၏အမည်မှာ ဂိဂိဒေါနိဖြစ်၏။

၁၉ ယခုတွင်၊ နီဖိုင်းအမျိုးသားခပ်သိမ်းတို့၌ (သူတို့၏ဆိုးညစ်ရာအချိန်များ၌ မှတစ်ပါး) ဗျာဒိတ်တော်နှင့် ပရောဖက်ပြုဝိညာဉ် ရှိသောတစ်စုံတစ်ဦးကို သူတို့၏ဗိုလ်ချုပ်မင်းအဖြစ် ခန့်အပ်ထားရန်မှာ ထုံးစံဖြစ်၏။ ထို့ကြောင့်၊ ဤဂိဂိဒေါနိသည် သူတို့၌ ပရောဖက်တစ်ပါးဖြစ်၏၊ တရားသူကြီးချုပ်လည်းဖြစ်၏။

၂၀ ယခုတွင်၊ လူတို့က ဂိဂိဒေါနိကို ဆိုကြလေသည်ကား၊ ကိုယ်တော်ရှင်ထံသို့ ဆုတောင်းပါလော့။ ထို့အတူ၊ ငါတို့သည် ဓားပြများကို တိုက်ခိုက်၍ သူတို့နေရင်းပြည်၌ ဖျက်ဆီးနိုင်ကြခြင်းငှာ၊ ငါတို့အား တောင်များပေါ်သို့တက်၍၊ တောရိုင်းထဲသို့သွားရန် အခွင့်ပေးပါလော့။

၂၁ သို့ရာတွင်၊ ဂိဂိဒေါနိက သူတို့ကို ဆိုလေသည်ကား၊ ကိုယ်တော်ရှင်တားမြစ်တော်မူ၏။ အကြောင်းမူကား၊ ငါတို့သည် တက်သွား၍ သူတို့ကို တိုက်ခိုက်မည်ဆိုလျှင်၊ ကိုယ်တော်ရှင်သည် ငါတို့ကို သူတို့၏လက်ထဲသို့ အပ်တော်မူလိမ့်မည်။ ထို့ကြောင့်၊ ငါတို့သည် ငါတို့ကိုယ်တိုင် ငါတို့ပြည်၏အလယ်၌ ပြင်ဆင်၍၊ ငါတို့၏တပ်များကို အတူတကွစုဝေးလျက်၊ သူတို့ကို သွား၍မတိုက်၊ သူတို့လာ၍တိုက်သည့်တိုင်အောင်သာ စောင့်ကြမည်။ ထို့ကြောင့်၊ ကိုယ်တော်ရှင်အသက်ရှင်တော်မူသည့်အတိုင်း၊ ငါတို့သည် ဤကဲ့သို့ ပြုလျှင်၊ သူတို့ကို ငါတို့လက်ထဲသို့ အပ်တော်မူလိမ့်မည်။

၂၂ ဤသို့အားဖြင့်အချိန်တန်လာသောအခါ၊ တစ်ဆယ်ခုနစ်နှစ်မြောက်နှစ်၏ နောက်ဆုံးပိုင်းကာလ၌၊ လာချော်နေရု၏ ကြေညာချက်သည် ထိုပြည်၏မျက်နှာပြင်တစ်လျှောက် ပျံ့နှံ့သွား၍၊ သူတို့သည် မိမိတို့၏မြင်းများ၊ ထို့အတူ မိမိတို့၏မြင်းရထားများ၊ ထို့အတူ မိမိတို့၏တိရစ္ဆာန်များ၊ ထို့အတူ မိမိတို့၏ခပ်သိမ်းသော သိုးစုများ၊ ထို့အတူ မိမိတို့၏နွားစုများ၊ ထို့အတူ မိမိတို့၏စပါး၊ ထို့အတူ မိမိတို့၏ဥစ္စာများကို ယူ၍၊ ထောင်ပေါင်းများစွာတို့အားဖြင့်လည်းကောင်း၊ သောင်းပေါင်းများစွာတို့အားဖြင့်လည်းကောင်း သူတို့အားလုံးသည် မိမိတို့၏ရန်သူများတစ်ဖက်၌ မိမိတို့ကိုယ်ကိုကာကွယ်ရန် သူတို့ကိုယ်သူတို့ အတူတကွစုဝေးရမည်ဟု သတ်မှတ်ထားသောနေရာသို့တိုင်အောင် ထွက်သွား၍ ချီတက်ကြ၏။

၂၃ သတ်မှတ်ထားသောပြည်သည်ကား၊ ဇရဟင်မလပြည်ဖြစ်၏၊ ဇရဟင်မလပြည်နှင့် အလျှံပယ်ပြည် နှစ်ခုကြားရှိ၊ အမှန်စင်စစ်၊ အလျှံပယ်ပြည်နှင့် လူဆိတ်ညံရာပြည်နှစ်ခုကြားရှိ နယ်ခြားစည်းသို့တိုင်အောင်ပင်တည်း။

၂၄ နီဖိုင်းအမျိုးသားများဟု ခေါ်သောသူ၊ ဤပြည်၌ သူတို့ကိုယ်သူတို့ အတူတကွစုဝေးသူ၊ အလွန်များသည့် ထောင်ပေါင်းများစွာသောလူတို့ ရှိ၏။ ယခုတွင်၊ မြောက်ဘက်လားရာပြည်ရှိ ကြီးစွာသောကျိန်ခြင်းကြောင့်၊ လာချော်နေရုသည် တောင်ဘက်လားရာပြည်၌ သူတို့ကိုယ်သူတို့ အတူတကွစုဝေးစေ၏။

၂၅ သူတို့သည်လည်း မိမိတို့ရန်သူများတစ်ဖက်၌ သူတို့ကိုယ်သူတို့ အင်အားခိုင်မာစေကြ၏။ ထို့အတူ၊ သူတို့သည် တစ်ပြည်တည်း၌ တစ်စုတည်းနေ၍၊ လာချော်နေရုပြောသောစကားများကို ကြောက်ရွံ့ကြသဖြင့် သူတို့၏ ခပ်သိမ်းသောအပြစ်များမှ နောင်တရကြသည့်တိုင်အောင်ပင်တည်း။ သူတို့၏ရန်သူများ သူတို့ထံသို့ဆင်းလာ၍စစ်တိုက်မည့်အချိန်၌ သူတို့ကို သူတို့၏ဘုရားသခင်ကိုယ်တော်ရှင် ကယ်လွှတ်တော်မူပါမည့်အကြောင်းကိုလည်း ဆုတောင်းကြ၏။

၂၆ သူတို့သည် မိမိတို့ရန်သူများကြောင့် အလွန်ဝမ်းနည်းကြ၏။ ဂိဂိဒေါနိကလည်း သူတို့ကို မိမိ၏သွန်သင်ခြင်းအတိုင်း၊ စစ်တိုက်ရာလက်နက်အမျိုးမျိုးကို ပြု၍၊ ချပ်ဝတ်တန်ဆာဖြင့်၊ ထို့အတူ ဒိုင်းများဖြင့်၊ ထို့အတူ အကွယ်အကာတို့ဖြင့် အားကြီးစေ၏။