၃ နီဖိုင်း ၁၅

အခန်းကြီး ၁၅

ယေရှုသည် မိမိအားဖြင့် မောရှေ၏ပညတ်တရား ပြီးပြည့်စုံပြီဖြစ်ကြောင်းကို ကြေညာ၏—နီဖိုင်းအမျိုးသားတို့သည်ကား၊ ယေရုရှလင်မြို့၌ရှိသည့် သူဟောပြောသည့် အခြားသောသိုးများ ဖြစ်ကြ၏—ဒုစရိုက်ကြောင့်၊ ယေရုရှလင်မြို့၌ရှိသည့် ကိုယ်တော်ရှင်၏လူမျိုးတို့သည် ဣသရေလအမျိုး၏ ကွဲပြားပြန့်ကျဲသောသိုးများအကြောင်းကို မသိကြ။ အေဒီ ၃၄ ခန့်။

၁ ယခုမူကား၊ အချိန်တန်လာသောအခါ၊ ယေရှုသည် ဤစကားတော်တို့ကို အဆုံးသတ်ခဲ့လေပြီးနောက်၊ လူအစုအဝေးကို မျှော်ကြည့်လျက်၊ မိန့်တော်မူလေသည်ကား၊ ရှုလော့၊ သင်တို့သည် ငါ၏ခမည်းတော်ထံသို့ ငါတက်၍မသွားမီ သွန်သင်ခဲ့သောအရာတို့ကို ကြားနာကြလေပြီ။ ထို့ကြောင့်၊ ငါဟောပြောသည့် ဤစကားတော်တို့ကို အောက်မေ့၍ ကျင့်ဆောင်သောသူမှန်သမျှကို ငါသည် နောက်ဆုံးသောနေ့၌ ထမြောက်စေတော်မူမည်။

၂ ဤသို့အားဖြင့်အချိန်တန်လာသောအခါ၊ ယေရှုသည် ဤစကားများကို မိန့်တော်မူလေပြီးနောက်၊ မောရှေ၏ပညတ်တရားနှင့်စပ်လျဉ်း၍၊ သူပြုစေလိုသည့်အရာတို့ကို အံ့ဩ၍၊ အံ့မခန်းချီးမွမ်းကြသူအချို့ သူတို့၌ ရှိသည်ကိုမြင်၏။ အကြောင်းမူကား၊ သူတို့သည် ဟောင်းသောအရာများ ကွယ်ပျောက်သွားလေပြီးလျှင်၊ ခပ်သိမ်းသောအရာတို့ အသစ်ဖြစ်လာကြောင်းကို နားလည်ခြင်းမရှိကြ။

၃ သူတို့ကိုလည်း မိန့်တော်မူသည်ကား၊ ဟောင်းသောအရာများ ကွယ်ပျောက်သွားလေပြီးလျှင်၊ ခပ်သိမ်းသောအရာတို့ အသစ်ဖြစ်လာလေကြောင်း သင်တို့အား ငါမိန့်တော်မူသည်ကို အံ့ဩခြင်းမရှိကြနှင့်။

၄ ရှုလော့၊ သင်တို့ကို ငါဆိုသည်ကား၊ မောရှေသို့ ပေးတော်မူသည့် ပညတ်တရားမှာ ပြီးပြည့်စုံပေပြီ။

၅ ရှုလော့၊ ငါသည်ကား၊ ထိုပညတ်တရားကို ပေးတော်မူသောသူဖြစ်၏၊ ငါသည်ကား၊ ငါ၏လူမျိုး ဣသရေလအမျိုးတို့နှင့် ပဋိညာဉ်ပြုသောသူပေတည်း။ ထို့ကြောင့်၊ ပညတ်တရားသည် ငါအားဖြင့် ပြီးပြည့်စုံပေပြီ။ အကြောင်းမူကား၊ ငါသည် ထိုပညတ်တရားကို ပြီးပြည့်စုံစေရန် ကြွလာတော်မူ၏။ ထို့ကြောင့်၊ ပညတ်တရား ပြီးဆုံးခြင်းသို့ ရောက်လေပြီ။

၆ ရှုလော့၊ ငါသည် ပရောဖက်တို့ကို မဖျက်ဆီး။ အကြောင်းမူကား၊ သင်တို့ကို ငါအမှန်ဆိုသည်မှာ၊ ငါအားဖြင့် ပြီးပြည့်စုံစေခြင်းမရှိသေးသောအရာမှန်သမျှ ပြီးပြည့်စုံလိမ့်မည်။

၇ ဟောင်းသောအရာများကွယ်ပျောက်သွားကြောင်း ငါသည်သင်တို့ကို မိန့်တော်မူသောကြောင့်၊ ငါသည် ဖြစ်လာမည့်အရာများနှင့်စပ်လျဉ်း၍၊ ဟောပြောထားသောအရာတို့ကို မဖျက်ဆီး။

၈ အကြောင်းမူကား၊ ရှုလော့၊ ငါ၏လူမျိုးတို့နှင့် ငါပြုသည့် ပဋိညာဉ်မှာ အလုံးစုံတို့ ပြီးပြည့်စုံစေခြင်းမရှိသေး။ သို့ရာတွင်၊ မောရှေသို့ ပေးတော်မူလေသည့် ပညတ်တရားသည်ကား၊ ငါအားဖြင့် ပြီးပြည့်စုံစေပြီ။

၉ ရှုလော့၊ ငါသည် ပညတ်တရားဖြစ်၏။ အလင်းလည်းဖြစ်၏။ ငါ့ကို မှီခိုအားကိုး၍၊ အဆုံးတိုင်အောင်တည်ကြည်လျှင်၊ သင်တို့သည် အသက်ရှင်ကြလိမ့်မည်။ အကြောင်းမူကား၊ အဆုံးတိုင်အောင်တည်ကြည်သောသူအား ထာဝရအသက်ကို ပေးတော်မူမည်။

၁၀ ရှုလော့၊ ငါသည် သင်တို့အား ပညတ်တော်များကို ပေးတော်မူလေပြီ။ ထို့ကြောင့်၊ ငါ၏ပညတ်တော်များကို စောင့်ထိန်းကြလော့။ ဤအရာသည်ကား၊ ပညတ်တရားနှင့် ပရောဖက်တို့၏စကားများ ဖြစ်၏။ အကြောင်းမူကား၊ ၎င်းတို့က ငါ့အကြောင်းကို အမှန်ပင်သက်သေခံ၏။

၁၁ ယခုမူကား၊ အချိန်တန်လာသောအခါ၊ ယေရှုသည် ဤစကားများကို ဟောလေပြီးလျှင်၊ သူရွေးကောက်သည့် တစ်ဆယ်နှစ်ပါးတို့ကို မိန့်တော်မူလေသည်ကား၊

၁၂ သင်တို့သည် ငါ၏တပည့်တော်များဖြစ်ပြီး၊ ယောသပ်အမျိုးသားတို့၏ ကျန်ကြွင်းသောသူများဖြစ်သည့် ဤလူမျိုးတို့အတွက် အလင်းဖြစ်ကြ၏။

၁၃ ရှုဦးလော့၊ ဤပြည်သည် သင်တို့၏အမွေခံရာပြည်ဖြစ်၏။ ခမည်းတော်က သင်တို့ကို ပေးထားတော်မူလေပြီ။

၁၄ ထိုအမှုကို ယေရုရှလင်ရှိ သင်၏ညီအစ်ကိုတို့အား ငါပြောပြရမည့်အကြောင်းကိုလည်း ခမည်းတော်သည် ငါ့ကို အဘယ်တော့မျှ မိန့်မှာလေခြင်းမရှိ။

၁၅ ထိုပြည်မှ ခမည်းတော်ဆောင်တော်မူသော ဣသရေလအမျိုးသားတို့၏ အခြားသောမျိုးနွယ်စုတို့ အကြောင်း သူတို့အား ပြောပြရမည်ကိုလည်း ခမည်းတော်သည် ငါ့ကို အဘယ်တော့မျှ မိန့်မှာလေခြင်းမရှိ။

၁၆ သူတို့အား၊ ငါပြောပြရမည့်အကြောင်း၊ ခမည်းတော်သည် ငါ့ကို ဤမျှအထိ မိန့်မှာတော်မူသည်ကား၊

၁၇ ဤသိုးခြံမှ မဟုတ်သော၊ ငါ့မှာရှိသော အခြားသိုးများဖြစ်သည့် ထိုသိုးတို့ကိုလည်း ငါဆောင်ရမည်။ သူတို့သည်လည်း ငါ့အသံကို ကြားနာလိမ့်မည်။ သိုးခြံတစ်ခု၊ သိုးထိန်းတစ်ပါးတည်း ရှိရလိမ့်မည်။

၁၈ ယခုမူကား၊ လည်ပင်းခိုင်မာခြင်းနှင့် မယုံကြည်ခြင်းတို့ကြောင့်၊ သူတို့သည် ငါ၏စကားကို နားလည်ခြင်းမရှိကြ။ ထို့ကြောင့်၊ ငါသည် သူတို့ထံသို့ ဤအမှုနှင့်စပ်လျဉ်း၍ မပြောစေတော့ရန် ခမည်းတော်၏ မိန့်မှာတော်မူခြင်းကို ခံရ၏။

၁၉ သို့ရာတွင်၊ သင်တို့ကို ငါ၊ အမှန် ဆိုသည်ကား၊ ခမည်းတော် ငါ့ကို မိန့်တော်မူလေ၍၊ ငါသည် ထိုအမှုကို သင်တို့အား ပြောပြ၏၊ သူတို့၏ဒုစရိုက်ကြောင့်၊ သင်တို့သည် သူတို့ထံမှ ကွဲပြားကြောင်း ပေတည်း။ ထို့ကြောင့်၊ သူတို့သည် ဒုစရိုက်ကြောင့် သင်တို့အကြောင်းကို သိခြင်းမရှိကြ။

၂၀ ထို့အတူ၊ သင်တို့ကို ငါတစ်ဖန် အမှန်ဆိုသည်ကား၊ အခြားသောမျိုးနွယ်စုတို့ကို ဘုရားသခင်သည် သူတို့ထံမှ ခွဲခွာတော်မူ၏။ သူတို့၏ဒုစရိုက်ကြောင့် မျိုးနွယ်စုတို့အကြောင်းကို သိခြင်းမရှိကြ။

၂၁ ထို့အတူ၊ သင်တို့ကို ငါအမှန်ဆိုသည်မှာ၊ သင်တို့သည်ကား၊ ဤသိုးခြံမှ မဟုတ်သော၊ ငါ့မှာရှိသော အခြားသိုးများဖြစ်သည့် ထိုသိုးတို့ကိုလည်း ငါဆောင်ရမည်။ သူတို့သည်လည်း ငါ့အသံကို ကြားနာလိမ့်မည်။ သိုးခြံတစ်ခု၊ သိုးထိန်းတစ်ပါးတည်း ရှိရလိမ့်မည်ဟု ငါမိန့်တော်မူလေသောသူများ ပေတည်း။

၂၂ သူတို့သည်ငါ့ကိုလည်း နားလည်ခြင်းမရှိကြ။ အကြောင်းမူကား၊ သူတို့သည် အခြားသိုးများမှာ တပါးအမျိုးသားများဖြစ်သည်ဟု ထင်မှတ်ကြ၏။ သူတို့သည် တပါးအမျိုးသားတို့ သူတို့၏ဟောပြောခြင်းအားဖြင့် ပြောင်းလဲလိမ့်မည်ဖြစ်ကြောင်းကိုလည်း နားလည်ခြင်းမရှိကြ။

၂၃ ငါ့အသံကို သူတို့ကြားနာရမည်ဖြစ်ကြောင်း မိန့်တော်မူသည်ကိုလည်း ငါ့ကို နားလည်ခြင်းမရှိကြ။ ငါ၏အသံကို တပါးအမျိုးသားတို့ အဘယ်တော့မျှ ကြားနာလိမ့်မည်မဟုတ်ကြောင်းကိုလည်း ငါ့ကို နားလည်ခြင်းမရှိကြသည်မှာ—ငါသည် သန့်ရှင်းသောဝိညာဉ်တော်အားဖြင့်မှတစ်ပါး၊ သူတို့အား ငါကိုယ်တိုင် ထင်ရှားစွာ ပြတော်မူလိမ့်မည်မဟုတ်ကြောင်းပေတည်း။

၂၄ သို့ရာတွင်၊ ရှုလော့၊ သင်တို့သည် ငါ့အသံကို ကြားနာ၍၊ ငါ့ကို မြင်ကြပြီ။ သင်တို့သည် ငါ၏သိုးများဖြစ်ကြ၏၊ ငါ့အား ခမည်းတော်ပေးထားတော်မူသည့်သူတို့၌လည်း ရေတွက်ခံရကြ၏။