၃ နီဖိုင်း ၁၆

အခန်းကြီး ၁၆

ယေရှုသည် ဣသရေလအမျိုးသားတို့ထံမှ ပျောက်ဆုံးသည့် အခြားသောသိုးများသို့ အကြည့်အရှု ကြွတော်မူမည်—နောက်ပိုင်းကာလများ၌၊ ဧဝံဂေလိတရားတော်သည် တပါးအမျိုးသားတို့ထံသို့၊ ထို့နောက်တွင် ဣသရေလအမျိုးသားတို့ထံသို့ ရောက်လိမ့်မည်—ကိုယ်တော်ရှင်၏လူမျိုးတို့သည် သူဇိအုန်မြို့ကို ပြန်လည်တည်ရှိစေတော်မူသောအခါ၊ ကိုယ်တိုင်မြင်ရကြလိမ့်မည်။ အေဒီ ၃၄ ခန့်။

၁ သင်တို့ကို ငါအမှန်၊ အမှန်ဆိုသည်ကား၊ ငါသည် ဤပြည်မှမဟုတ်သည့်၊ ယေရုရှလင်နယ်မြေမှလည်း မဟုတ်သည့်၊ အမှုတော်ဆောင်ရန် ငါသွားတော်မူသော ပတ်ဝန်းကျင်ပြည်တစ်စုံတစ်ခုမှလည်း မဟုတ်သည့် အခြားသောသိုးတို့ကိုလည်း ပိုင်၏။

၂ အကြောင်းမူကား၊ ငါပြောသည့်သူများမှာ၊ ငါ၏အသံကို မကြားနာရသေးသောသူများ ဖြစ်ကြ၏။ အဘယ်သောအခါကမျှလည်း သူတို့ထံသို့ ငါကိုယ်တိုင် ထင်ရှားစွာမပြရသေး။

၃ သို့ရာတွင်၊ သိုးထိန်းတစ်ပါးနှင့် သိုးခြံတစ်ခုရှိနိုင်စေခြင်းငှာ၊ ငါသည် သူတို့ထံသို့သွား၍၊ ငါ့အသံကို သူတို့ကြားနာရမည့်အကြောင်းနှင့် ငါ၏သိုးများ၌ ရေတွက်ခံရကြမည့်အကြောင်း၊ ပညတ်တော်တစ်ခုကို ခမည်းတော်ထံမှ လက်ခံရရှိ၏။ ထို့ကြောင့်၊ သူတို့ထံသို့ ငါကိုယ်တိုင် ထင်ရှားစွာပြတော်မူခြင်းငှာ သွား၏။

၄ ငါကြွသွားတော်မူပြီးနောက်၊ ဤစကားများကို သင်တို့ရေးရမည်ကိုလည်းကောင်း၊ ငါ့ကိုမြင်၍၊ ငါ၏အမှုတော်ဆောင်ခြင်း၌ ငါနှင့်အတူရှိသည့် ယေရုရှလင်မြို့ရှိ ငါ၏လူမျိုးတို့သည် သန့်ရှင်းသောဝိညာဉ်တော်အားဖြင့်၊ သင်တို့အကြောင်း၊ ထို့အတူ၊ သူတို့သိခြင်းမရှိသည့် အခြားသော မျိုးနွယ်စုတို့အကြောင်းသိခြင်းကိုလည်း လက်ခံရရှိနိုင်စေခြင်းငှာ ငါ၏နာမတော်အားဖြင့်၊ ခမည်းတော်ထံသို့ မတောင်းကြလျှင်၊ သင်တို့ရေးမည့် ဤစကားများကို သိမ်းဆည်းထား၍၊ သူတို့၏ မယုံကြည်ခြင်းကြောင့်၊ မြေကြီးမျက်နှာပြင်ပေါ်၌ ကွဲပြားပြန့်ကျဲသွားမည့် သူတို့အမျိုးအနွယ်များ၏ ကျန်ကြွင်းသောသူတို့ကို ဆောင်ယူနိုင်ခြင်းငှာ၊ သို့မဟုတ်၊ သူတို့၏ရွေးနှုတ်ရှင်၊ ငါ့အကြောင်းကိုသိခြင်းသို့ ဆောင်ယူခံရကြနိုင်စေခြင်းငှာ၊ တပါးအမျိုးသားခပ်သိမ်းတို့အားဖြင့်၊ တပါးအမျိုးသားများထံသို့ ထင်ရှားစွာပြရမည့်အကြောင်းကိုလည်းကောင်း သင်တို့ကို ငါမိန့်မှာ၏။

၅ ထို့နောက်တွင်၊ ငါသည် သူတို့ကို မြေကြီးလေးမျက်နှာပေါ်မှ စုဝေးစေမည်။ ထို့နောက်တွင်၊ ဣသရေလအမျိုးသားတို့၏ လူမျိုးခပ်သိမ်းတို့ထံ ခမည်းတော်ပြုတော်မူသည့် ပဋိညာဉ်ကို ပြီးပြည့်စုံစေမည်။

၆ တပါးအမျိုးသားတို့သည်လည်း ငါ့အကြောင်းနှင့် ခမည်းတော်၏အကြောင်းကို သူတို့ထံသို့ သက်သေခံသည့် သန့်ရှင်းသောဝိညာဉ်တော်အားဖြင့် ငါ့ထံသို့ရှိသည့် သူတို့၏ယုံကြည်မှုကြောင့် မင်္ဂလာရှိကြ၏။

၇ ရှုလော့၊ ငါ့ထံသို့ ရှိသည့် သူတို့၏ယုံကြည်မှုကြောင့် ခမည်းတော်မိန့်တော်မူလေသည်ကား၊ အို ဣသရေလအမျိုးသားတို့၊ သင်တို့၏မယုံကြည်မှုကြောင့်၊ နောက်ပိုင်းကာလတွင်၊ သမ္မာတရားသည် ဤအရာတို့၏ပြည့်စုံခြင်းကို ဖော်ပြရန် တပါးအမျိုးသားတို့ထံသို့ ရောက်ရှိလာလိမ့်မည်။

၈ သို့ရာတွင်၊ တပါးအမျိုးသားတို့မှ မယုံကြည်သောသူတို့သည် အမင်္ဂလာရှိကြ၏။ ခမည်းတော်မိန့်တော်မူသည်မှာ—အကြောင်းမူကား၊ သူတို့သည် ဤပြည်၏မျက်နှာပြင်ပေါ်သို့ ရောက်လာသော်ငြားလည်း၊ ဣသရေလအမျိုးသားများဖြစ်သည့် ငါ၏လူမျိုးတို့ကို ကွဲပြားပြန့်ကျဲစေကြ၏။ ဣသရေလအမျိုးသားများဖြစ်သည့် ငါ၏လူမျိုးတို့သည်လည်း သူတို့ကြားမှ နှင်ထုတ်ခံရ၍၊ သူတို့အားဖြင့် ခြေဖြင့်နင်းချေခံရကြ၏။

၉ တပါးအမျိုးသားတို့အပေါ်သို့ ခမည်းတော်၏ကရုဏာတော်များ၊ ထို့အတူ၊ ဣသရေလအမျိုးသားများဖြစ်သည့် ငါ၏လူမျိုးတို့အပေါ်၌ ခမည်းတော်၏ တရားစီရင်တော်မူခြင်းများကြောင့်၊ သင်တို့ကို ငါအမှန်၊ အမှန်ဆိုသည်ကား၊ ဤအမှုခပ်သိမ်းတို့၏နောက်၌၊ ငါသည် ဣသရေလအမျိုးသားများဖြစ်သည့် ငါ၏လူမျိုးတို့ကို၊ ပြင်းစွာအရိုက်ခံရစေ၊ ထို့အတူ ဒုက္ခရောက်စေ၊ ထို့အတူ ကွပ်မျက်ခံရစေ၊ ထို့အတူ၊ သူတို့ထံမှ နှင်ထုတ်ခံရစေ၊ ထို့အတူ၊ သူတို့၏မုန်းတီးခြင်းကို ခံလာရစေ၊ ထို့အတူ သူတို့၌ ပုံခိုင်းကဲ့ရဲ့ရာဖြစ်လာစေ၏—

၁၀ ထိုကဲ့သို့အားဖြင့်၊ ခမည်းတော်သည် သင်တို့ကို ငါဆိုရမည့်အကြောင်း၊ မိန့်တော်မူသည်ကား၊ တပါးအမျိုးသားတို့သည် ငါ၏ဧဝံဂေလိတရားတော်ကို ဆန့်ကျင်၍အပြစ်ပြုကြမည့်၊ ငါ၏ဧဝံဂေလိတရားတော်အပြည့်အစုံကို ငြင်းပယ်ကြမည့်၊ ပြည်သားခပ်သိမ်းတို့အထက်၌လည်းကောင်း၊ မြေကြီးတစ်ခုလုံး၌ရှိသည့် လူမျိုးခပ်သိမ်းတို့ အထက်၌လည်းကောင်း၊ မိမိမာနစိတ်နှလုံးဖြင့် ဘဝင်မြင့်မည့်၊ ထို့အတူ၊ အမျိုးမျိုးသော မုသားပြောခြင်း၊ ထို့အတူ လှည့်ဖြားခြင်း၊ ထို့အတူ မကောင်းသောအကြံ၊ ထို့အတူ အမျိုးမျိုးသော သူတော်ကောင်းယောင်ဆောင်ခြင်း၊ ထို့အတူ လူ့အသက်ကိုသတ်ခြင်း၊ ထို့အတူ ဘာသာရေးဖြင့်ကိုယ်ကျိုးရှာခြင်း၊ ထို့အတူ မတရားသောမေထုန်အမှု၊ ထို့အတူ လျှို့ဝှက်သော စက်ဆုပ်ရွံရှာဖွယ်အမှုတို့နှင့်ပြည့်မည့်ကာလ၌၊ ထိုအမှုခပ်သိမ်းတို့ကို ပြု၍၊ ငါ၏ဧဝံဂေလိတရားတော်အပြည့်အစုံကို ငြင်းပယ်ကြမည်ဆိုလျှင်၊ ရှုလော့၊ ခမည်းတော်မိန့်တော်မူသည်ကား၊ ငါသည် ငါ၏ဧဝံဂေလိတရားတော်အပြည့်အစုံကို သူတို့ထံမှ နှုတ်ယူတော်မူမည်။

၁၁ ထို့နောက်တွင်၊ ငါသည် ငါ၏လူမျိုးများထံ ပြုတော်မူသည့် ငါ၏ပဋိညာဉ်ကို အောက်မေ့တော်မူမည်။ အို ဣသရေလအမျိုးသားတို့၊ ငါသည် ငါ၏ဧဝံဂေလိတရားတော်ကို သူတို့ထံသို့ ဆောင်ယူတော်မူမည်။

၁၂ သင်တို့ကိုလည်း ပြတော်မူမည်၊ အို ဣသရေလအမျိုးသားတို့၊ တပါးအမျိုးသားတို့ သင်တို့အပေါ်၌ အစိုးရခြင်းရှိလိမ့်မည် မဟုတ်။ သို့ရာတွင် ငါသည် သင်တို့အပေါ်ရှိ ငါ၏ပဋိညာဉ်ကို အောက်မေ့တော်မူမည်၊ အို ဣသရေလအမျိုးသားတို့၊ သင်တို့သည် ငါ၏ ဧဝံဂေလိတရားတော်အပြည့်အစုံကို သိခြင်းသို့လည်း ရောက်ကြလိမ့်မည်။

၁၃ သို့ရာတွင်၊ တပါးအမျိုးသားတို့သည် နောင်တရ၍၊ ငါ့ထံသို့ပြန်လာကြမည်ဆိုလျှင်၊ ခမည်းတော် မိန့်တော်မူသည်ကား၊ ရှုလော့ သူတို့သည် ငါ၏လူမျိုးတို့၌ ရေတွက်ခံရကြမည်၊ အို ဣသရေလအမျိုးသားတို့။

၁၄ ငါသည် ဣသရေလအမျိုးသားများဖြစ်သည့် ငါ၏လူမျိုးတို့အား ထိုသူတို့ကြားသို့ ဖြတ်၍သွားရန်နှင့် ထိုသူတို့ကို နင်းချေရန် အခွင့်ပေးတော်မူမည်မဟုတ်ဟု ခမည်းတော်မိန့်တော်မူ၏။

၁၅ သို့ရာတွင်၊ ထိုသူတို့သည် ငါ့ထံသို့ပြန်မလာကြ၊ ငါ၏အသံကို စေ့စေ့နားမထောင်ကြလျှင်၊ ငါအခွင့်ပေးတော်မူမည်။ အထူးသဖြင့်၊ အို ဣသရေလအမျိုးသားတို့၊ ငါသည် ငါ၏လူမျိုးတို့အား၊ ထိုသူတို့ကြား၌ ဖြတ်သွား၍၊ ထိုသူတို့ကို နင်းချေရန် အခွင့်ပေးတော်မူမည်ဖြစ်၍၊ ထိုသူတို့သည်လည်း အရသာကင်းပျောက်သည့် ဆားကဲ့သို့ ဖြစ်လိမ့်မည်၊ ထိုအချိန်မှစ၍ ဆားသည် ပြင်သို့အပစ်ခံရရန်နှင့် ငါ့လူမျိုးတို့၏ ခြေအောက်၌ နင်းချေခံရရန်မှတစ်ပါး၊ အဘယ်အသုံးမျှမဝင်၊ အို ဣသရေလအမျိုးသားတို့။

၁၆ သင်တို့ကို ငါအမှန်၊ အမှန်ဆိုသည်ကား၊ ထိုကဲ့သို့ ခမည်းတော်သည် ငါ့ကို မိန့်တော်မူလေသည်မှာ—ငါသည် ဤလူမျိုးတို့အား ဤပြည်ကို သူတို့၏အမွေခံရာအဖြစ် ပေးရမည့်အကြောင်းပေတည်း။

၁၇ ထို့နောက်တွင်ကား၊ ပရောဖက်ဟေရှာယ၏စကားများ ပြီးပြည့်စုံလိမ့်မည်၊ ဆိုလေသည်ကား၊

၁၈ သင်၏ကင်းစောင့်တို့သည် ကြွေးကြော်၍၊ တညီတညွတ်တည်းသောအသံဖြင့်၊ သီဆိုကြလိမ့်မည်။ အကြောင်းမူကား၊ ကိုယ်တော်ရှင် ဇိအုန်မြို့ကို ပြန်လည်တည်ရှိစေတော်မူသောအခါ၊ သူတို့သည် ကိုယ်တိုင်မြင်ကြရလိမ့်မည်။

၁၉ ဝမ်းမြောက်စွာကြွေးကြော်ကြလော့၊ အတူတကွ သီချင်းဆိုကြလော့၊ ယေရုရှလင်မြို့ရှိ ပြိုပျက်ရာအရပ်တို့။ အကြောင်းမူကား၊ ကိုယ်တော်ရှင်သည် မိမိလူမျိုးတို့ကို နှစ်သိမ့်စေတော်မူလေပြီ၊ ယေရုရှလင်ကို ရွေးနှုတ်တော်မူလေပြီ။

၂၀ ကိုယ်တော်ရှင်သည် သူ၏သန့်ရှင်းသောလက်တော်ကို ခပ်သိမ်းသောပြည်သားတို့ရှေ့၌၊ ဖွင့်ပြတော်မူ၏။ မြေကြီးစွန်းသား ခပ်သိမ်းတို့သည်လည်း ဘုရားသခင်၏ ကယ်တင်ခြင်းကို မြင်ရလိမ့်မည်။