၃ နီဖိုင်း ၂၄

အခန်းကြီး ၂၄

ကိုယ်တော်ရှင်၏တမန်တော်သည် ဒုတိယအကြိမ်ကြွလာတော်မူခြင်းအတွက် လမ်းကို ပြင်ဆင်လိမ့်မည်—ခရစ်တော်သည် တရားစီရင်တော်မူရာ၌ ထိုင်တော်မူလိမ့်မည်—ဣသရေလအမျိုးတို့သည် ဆယ်ဖို့တစ်ဖို့နှင့် ပူဇော်သက္ကာတို့ကို ပေးရန် မိန့်မှာခံရ၏—အောက်မေ့ဖွယ်ရာစာအုပ်ကို သိမ်းဆည်းထား၏—မာလခိအခန်းကြီး ၃ နှင့် နှိုင်းယှဉ်ပါ။ အေဒီ ၃၄ ခန့်။

၁ ဤသို့အားဖြင့်အချိန်တန်လာသောအခါ၊ သူတို့ကို ပြောပြရမည်ဖြစ်သော၊ ခမည်းတော် မာလခိကို ဖော်ပြတော်မူသည့် စကားများကို သူတို့ရေးရမည့်အကြောင်း မိန့်မှာ၏။ ဤသို့အားဖြင့် အချိန်တန်လာသောအခါ၊ ထိုအမှုတို့ကို ရေးလေပြီးနောက်၊ ရှင်းပြတော်မူ၏။ သူတို့ကို ပြောပြသည့် ဤစကားများသည်ကား၊ ခမည်းတော် မာလခိကို မိန့်တော်မူသည်မှာ—ရှုလော့၊ ငါသွားရာလမ်းကို ပြင်ဆင်ရသောငါ၏တမန်တော်ကို ငါစေလွှတ်မည်။ သင်တို့ရှာသော ကိုယ်တော်ရှင်၊ သင်တို့မွေ့လျော်သည့် ပဋိညာဉ်တမန်တော်သည် မိမိဗိမာန်တော်သို့ ရုတ်တရက်လာလိမ့်မည်။ ရှုလော့၊ ထိုသူလာလိမ့်မည်ဟု ကောင်းကင်ဗိုလ်ခြေကိုယ်တော်ရှင် မိန့်တော်မူ၏။

၂ သို့ရာတွင်၊ သူ၏ကြွလာတော်မူရာနေ့၌ အဘယ်သူသည် တည်တံ့နိုင်လိမ့်မည်နည်း။ သူပေါ်ထွန်းတော်မူသောအခါ အဘယ်သူသည် ခံရပ်နိုင်မည်နည်း။ အကြောင်းမူကား၊ သူသည် သန့်စင်အောင်ပြုသောသူ၏မီးကဲ့သို့ဖြစ်တော်မူ၍၊ ခဝါသည်၏ဆပ်ပြာကဲ့သို့ ဖြစ်တော်မူ၏။

၃ သူသည် ငွေကိုသန့်စင်အောင်ပြုသောသူ၊ စင်ကြယ်စေသောသူကဲ့သို့ ထိုင်၍၊ လေဝိ၏သားတို့အား၊ ကိုယ်တော်ရှင်ထံသို့ ဖြောင့်မတ်ခြင်းပူဇော်သက္ကာကို သူတို့ပူဇော်နိုင်ကြစေခြင်းငှာ၊ သူတို့ကို စင်ကြယ်စေတော်မူလိမ့်မည်၊ ရွှေနှင့် ငွေကို ကဲ့သို့လည်း သူတို့ကို သန့်ရှင်းစေတော်မူလိမ့်မည်။

၄ ထို့နောက်တွင်၊ ယုဒပြည်နှင့် ယေရုရှလင်မြို့မှ ပူဇော်သက္ကာသည် ရှေးနေ့ရက်များနှင့် လွန်လေပြီးသောနှစ်တို့၌ ဖြစ်လေသကဲ့သို့ ကိုယ်တော်ရှင်နှစ်သက်တော်မူဖွယ် ဖြစ်လိမ့်မည်။

၅ ငါသည် တရားစီရင်တော်မူခြင်းငှာ သင်တို့အနီးသို့ လာမည်။ ပြုစားတတ်သောသူ၊ သူ့သားမယားအား ပြစ်မှားသောသူ၊ မမှန်သောကျိန်ဆိုခြင်းကို ပြုသောသူ၊ သူငှားကို အခမပေး၊ ညှဉ်းဆဲသောသူ၊ အဘမရှိသောသူငယ်နှင့် မုဆိုးမကို ညှဉ်းဆဲသောသူ၊ သူတစိမ်းကို ငြင်းပယ်သောသူ၊ ငါ့ကိုမကြောက်ရွံ့သောသူတို့တစ်ဖက်၌ ငါသည် လျင်မြန်သောသက်သေဖြစ်မည်ဟု ကောင်းကင်ဗိုလ်ခြေကိုယ်တော်ရှင်မိန့်တော်မူ၏။

၆ အကြောင်းမူကား၊ ငါသည် ကိုယ်တော်ရှင်ဖြစ်၏။ ပြောင်းလဲခြင်းမရှိ။ ထို့ကြောင့်၊ ယာကုပ်အမျိုးသားတို့ သင်တို့သည် လောင်မြိုက်ခြင်းသို့ မရောက်ကြ။

၇ သင်တို့၏ဘိုးဘေးတို့လက်ထက်မှစ၍ပင် သင်တို့သည် ငါ၏ဘိသိက်မင်္ဂလာများကိုမစော့င်။ တိမ်းရှောင်ကြပြီ။ ငါ့ထံသို့ ပြန်လာကြလော့။ ငါသည်လည်း သင်တို့ဆီသို့ ပြန်လာမည်ဟု ကောင်းကင်ဗိုလ်ခြေကိုယ်တော်ရှင်မိန့်တော်မူ၏။ အကျွန်ုပ်တို့သည် အဘယ်သို့ ပြန်လာရပါမည်နည်းဟု သင်တို့မေးကြသည်တကား။

၈ လူသည် ဘုရားသခင်၏ဥစ္စာတော်ကို လုယူရမည်လော။ သို့သော်လည်း၊ သင်တို့သည် ငါ့ဥစ္စာတော်ကို လုယူကြပြီ။ အကျွန်ုပ်တို့သည် အဘယ်သို့ လုယူပါသနည်းဟု သင်တို့မေးလျှင်၊ ဆယ်ဖို့တစ်ဖို့ကိုလည်းကောင်း၊ ပူဇော်သက္ကာတို့ကိုလည်းကောင်း လုယူကြပြီ။

၉ သင်တို့သည် ကျိန်ခြင်းအမင်္ဂလာဖြင့် အကျိန်ခံရကြ၏။ အကြောင်းမူကား၊ သင်တို့ပြည်သားခပ်သိမ်းတို့သည်ပင် ငါ့ဥစ္စာကို လုယူကြပြီ။

၁၀ သင်တို့သည် ဆယ်ဖို့တစ်ဖို့ ရှိသမျှကို ဘဏ္ဍာတိုက်ထဲသို့ သွင်း၍၊ ငါ့အိမ်တော်၌ စားစရာရှိစေခြင်းငှာ ပြုကြလော့။ ငါသည် ကောင်းကင်ဘုံ ပြတင်းပေါက်တို့ကိုဖွင့်၍ ကောင်းချီးမင်္ဂလာကို လက်ခံစရာနေရာ အလုံအလောက်မရှိသည့်တိုင်အောင် သွန်းလောင်းမည်မသွန်းလောင်းမည်ကို ဤနည်းအားဖြင့် ယခုစုံစမ်းကြလော့ဟု ကောင်းကင်ဗိုလ်ခြေကိုယ်တော်ရှင် မိန့်တော်မူ၏။

၁၁ ကိုက်စားတတ်သောအကောင်ကို သင်တို့အတွက် ငါဆုံးမ၍၊ ၎င်းသည် သင်တို့မြေမှ အသီးအနှံကို မဖျက်ဆီးရ။ သင်တို့၏ စပျစ်ဥယျာဉ်သည်လည်း အသီးကို အချိန်မတိုင်မီ မကြွေရဟု ကောင်းကင်ဗိုလ်ခြေကိုယ်တော်ရှင်မိန့်တော်မူ၏။

၁၂ လူမျိုးခပ်သိမ်းတို့သည် သင်တို့ကို မင်္ဂလာရှိသောသူဟူ၍ ခေါ်ဝေါ်ကြလိမ့်မည်။ အကြောင်းမူကား၊ သင်တို့ပြည်သည် နှစ်သက်ဖွယ်သောပြည် ဖြစ်လိမ့်မည်ဟု ကောင်းကင်ဗိုလ်ခြေကိုယ်တော်ရှင်မိန့်တော်မူ၏။

၁၃ သင်တို့သည် ငါ့ကိုဆန့်ကျင်၍ရဲရင့်စွာပြောကြပြီဟု ကိုယ်တော်ရှင်မိန့်တော်မူ၏။ သို့သော်လည်း၊ အကျွန်ုပ်တို့သည် ကိုယ်တော်ကိုဆန့်ကျင်၍ အဘယ်အရာကို ပြောမိပါသနည်းဟု သင်တို့မေးကြသည်တကား။

၁၄ သင်တို့ပြောကြလေသည်ကား၊ ဘုရားသခင်ကို အစေခံသော်လည်း အကျိုးမရှိ။ ငါတို့သည် သူ၏ဘိသိက်မင်္ဂလာများကို စောင့်၍ ကောင်းကင်ဗိုလ်ခြေကိုယ်တော်ရှင်ရှေ့၌ ညှိုးငယ်စွာ ကျင့်ကြံပြုမူခြင်းအားဖြင့် အဘယ်ကျေးဇူးရှိသနည်း။

၁၅ မာနထောင်လွှားသောသူတို့ကို ပျော်ရွှင်သောသူဟု ငါတို့ခေါ်ဝေါ်ကြ၏။ အကယ်စင်စစ်၊ ဆိုးညစ်ခြင်းကိုပြုသောသူတို့သည် အောင်တတ်ကြ၏။ ထိုမှတစ်ပါး၊ ဘုရားသခင်ကို စုံစမ်းသောသူတို့သည် ကယ်လွှတ်ခြင်းကို အမှန်ခံရကြ၏ဟု သင်တို့ပြောကြပြီ။

၁၆ ထိုအခါ ကိုယ်တော်ရှင်ကို ကြောက်ရွံ့သောသူတို့သည် တစ်ယောက်ကိုတစ်ယောက် အကြိမ်ကြိမ်ပြောဆိုကြ၏။ ကိုယ်တော်ရှင်သည်လည်း စေ့စေ့နားထောင်၍ ကြားတော်မူ၏။ ကိုယ်တော်ရှင်ကို ကြောက်ရွံ့၍ နာမတော်ကို အောက်မေ့သောသူတို့အဖို့ သူ၏ရှေ့တော်၌ အောက်မေ့ဖွယ်ရာစာအုပ်၌ မှတ်ထားလေ၏။

၁၇ ငါ၏ရတနာများကို ငါစုဆောင်းသောနေ့၌ ထိုသူတို့သည် ငါပိုင်သောသူများ ဖြစ်ကြလိမ့်မည်ဟု ကောင်းကင်ဗိုလ်ခြေကိုယ်တော်ရှင်မိန့်တော်မူ၏။ လူသည် မိမိကို အစေခံသည့် မိမိသားကို ချမ်းသာပေးသကဲ့သို့ ငါသည်လည်း ထိုသူတို့ကို ချမ်းသာပေးမည်။

၁၈ ထို့နောက်တွင်၊ သင်တို့သည် ပြောင်းလဲကြ၍၊ ဖြောင့်မတ်သောသူနှင့် ဆိုးညစ်သောသူ၊ ဘုရားသခင်ကို အစေခံသောသူနှင့် အစေမခံသောသူတို့ကို ပိုင်းခြား၍သိမြင်ကြရလိမ့်မည်။