၃ နီဖိုင်း ၈

အခန်းကြီး ၈

ခရစ်တော်အား လက်ဝါးကပ်တိုင်မှာ ကွပ်မျက်ခံရခြင်းကို မိုးသက်မုန်တိုင်းများ၊ မြေကြီးလှုပ်ခြင်းများ၊ မီးများ၊ လေပွေများနှင့် သဘာဝတရားအုံကြွခြင်းတို့က သက်သေပြ၏—များစွာသောလူတို့ပျက်စီးကြ၏—မှောင်မိုက်ခြင်းသည် ထိုပြည်ကို သုံးရက်ကြာအောင် ဖုံးလွှမ်း၏—ဆက်၍ကျန်ရှိသောသူတို့သည် မိမိတို့ကံကြမ္မာအတွက် မြည်တမ်းကြ၏။ အေဒီ ၃၃–၃၄ ခန့်။

၁ ယခုမူကား၊ အချိန်တန်လာသောအခါ၊ ငါတို့မှတ်တမ်းအရ၊ ငါတို့မှတ်တမ်း မှန်ကန်ကြောင်းကို ငါတို့သိ၏။ အကြောင်းမူကား၊ ရှုလော့၊ ထိုမှတ်တမ်းကို ရေးမှတ်သူမှာ ဖြောင့်မတ်သောသူတစ်ဦးဖြစ်၏—အကြောင်းမူကား၊ သူသည် ယေရှု၏နာမတော်အားဖြင့် အလွန်တရာအံ့ဩဖွယ်သောအမှုများစွာကို အမှန်ပင်ပြု၏။ မိမိဒုစရိုက်အလုံးစုံတို့မှ သန့်စင်သောသူမှတစ်ပါး၊ ယေရှု၏နာမတော်အားဖြင့် အလွန်တရာအံ့ဩဖွယ်အမှုကို ပြုနိုင်သောသူ တစ်စုံတစ်ဦးမျှမရှိ—

၂ ယခုမူကား၊ အချိန်တန်လာသောအခါ၊ ငါတို့၏အချိန်ကာလကို ရေတွက်ရာ၌ ဤလူအားဖြင့် အမှားအယွင်းပြုမိခြင်းမရှိလျှင်၊ သုံးဆယ်သုံးနှစ်မြောက် ကုန်လွန်လေပြီ။

၃ လူတို့သည်လည်း လာမန်အမျိုးသား၊ ပရောဖက်ရှမွေလဖော်ပြသည့် နိမိတ်လက္ခဏာကို၊ အထူးသဖြင့်၊ ထိုပြည်၏မျက်နှာပြင်ပေါ်၌ သုံးရက်ကြာအောင် မှောင်မိုက်ခြင်းရှိမည့်အချိန်ကို ကြီးစွာသောစိတ်အားထက်သန်ခြင်းဖြင့် မျှော်လင့်စပြုကြ၏။

၄ အလွန်များစွာသော နိမိတ်လက္ခဏာတို့ကို ဖော်ပြတော်မူသော်ငြားလည်း၊ လူတို့၌ ကြီးစွာသောယုံမှားသံသယဖြစ်ခြင်းနှင့် ငြင်းခုံခြင်းရှိစပြု၏။

၅ ဤသို့အားဖြင့်အချိန်တန်လာသောအခါ၊ သုံးဆယ်လေးနှစ်မြောက်၊ ပထမလ၏ လေးရက်မြောက်နေ့၌၊ ပြည်တစ်ခုလုံး၌ မတွေ့ကြုံဖူးသည့် ကြီးစွာသောမုန်တိုင်းတစ်ခု ဖြစ်ပေါ်လာ၏။

၆ ကြီးစွာသော ကြောက်မက်ဖွယ်မိုးသက်မုန်တိုင်းလည်း ဖြစ်၏။ ကြောက်မက်ဖွယ်သော မိုးချုန်းခြင်းလည်းဖြစ်၍၊ မြေကြီးတစ်ခုလုံးကို အစိတ်စိတ်ကွဲတော့မည်ကဲ့သို့ လှုပ်စေသည့်တိုင်အောင်ပင်တည်း။

၇ ထိုပြည်တစ်ခုလုံး၌ မတွေ့ကြုံခဲ့ဖူးသည့် အလွန်ထင်ရှားသော လျှပ်စီးလက်ခြင်းလည်း ဖြစ်၏။

၈ ဇရဟင်မလမြို့လည်း မီးလောင်၏။

၉ မော်ရော်နိုင်းမြို့သည်လည်း ပင်လယ်ရေနက်၌ မြုပ်၍၊ ထိုမြို့၌ နေထိုင်သောသူတို့သည်လည်း နစ်မြုပ်ကြ၏။

၁၀ မြေကြီးသည်လည်း မော်ရော်နိဟမြို့ပေါ်သို့ ရောက်၍ ထိုမြို့နေရာ၌ ကြီးစွာသော တောင်ဖြစ်လာ၏။

၁၁ တောင်ဘက်လားရာပြည်၌လည်း ကြီးစွာသောကြောက်မက်ဖွယ်ပျက်စီးခြင်းဖြစ်၏။

၁၂ သို့ရာတွင်၊ ရှုလော့၊ မြောက်ဘက်လားရာပြည်၌ ပို၍ကြီးစွာသောကြောက်မက်ဖွယ်ပျက်စီးခြင်း ဖြစ်၏။ အကြောင်းမူကား၊ ရှုလော့၊ မိုးသက်မုန်တိုင်းနှင့် လေပွေ၊ ထို့အတူ မိုးချုန်းခြင်းနှင့် လျှပ်စီးလက်ခြင်း၊ ထို့အတူ မြေကြီးတစ်ခုလုံး၏ အလွန်ကြီးစွာသောလှုပ်ခြင်းတို့ကြောင့်၊ ထိုပြည်၏မျက်နှာပြင်တစ်ခုလုံးသည် ပြောင်းလဲ၏။

၁၃ လမ်းမများလည်း ပြိုကျလျက်၊ ညီညာသောလမ်းတို့သည် ပျက်စီး၍၊ ချောမွေ့သောနေရာများစွာသည် ကြမ်းတမ်းလာ၏။

၁၄ ထူးမြတ်သော မြို့ကြီးများစွာတို့လည်း နစ်မြုပ်၍၊ များစွာတို့သည် လောင်မြိုက်၍၊ များစွာတို့သည် ၎င်းတို့၌ရှိသည့် အဆောက်အအုံများ မြေကြီးသို့ ပြိုကျသည့်တိုင်အောင် တုန်လှုပ်၍၊ ထိုအဆောက်အအုံတို့၌ နေထိုင်သူများ ကွပ်မျက်ခံရပြီးလျှင်၊ ထိုအရပ်တို့သည် လူဆိတ်ညံရာအဖြစ် ကျန်ရစ်၏။

၁၅ အချို့သောမြို့များလည်း ဆက်၍ကျန်ရှိ၏။ သို့ရာတွင်၊ ထိုမြို့တို့၌ ပျက်စီးခြင်းမှာ အလွန်ကြီးမား၏၊ ကွပ်မျက်ခံရသူများစွာရှိ၏။

၁၆ ထို့အတူ၊ လေပွေထဲ၌ သယ်ဆောင်သွားခံရသူ အချို့ရှိ၏။ ထိုသူတို့သည်လည်း သယ်ဆောင်သွားခံရကြောင်း သိသည်မှတစ်ပါး၊ အဘယ်အရပ်သို့ သွားသည်ကို အဘယ်သူမျှမသိ။

၁၇ ထိုကဲ့သို့အားဖြင့်၊ မိုးသက်မုန်တိုင်း၊ မိုးချုန်းခြင်း၊ လျှပ်စီးလက်ခြင်းနှင့် မြေကြီးလှုပ်ခြင်းတို့ကြောင့်၊ မြေကြီးတစ်ခုလုံး၏မျက်နှာပြင်သည် ပုံသဏ္ဌာန်ပျက်လာ၏။

၁၈ ရှုဦးလော့၊ ကျောက်တို့သည် နှစ်ခြမ်းကွဲ၏။ မြေကြီးတစ်ခုလုံး၏မျက်နှာပြင်ပေါ်၌ ကျိုးပဲ့၍၊ ကျိုးပဲ့သော အပိုင်းအစများ၊ အအက် အကွဲများအဖြစ် ထိုပြည်၏မျက်နှာပြင်တစ်ခုလုံးပေါ်၌ တွေ့ရသည့်တိုင်အောင်ပင်တည်း။

၁၉ ဤသို့အားဖြင့်အချိန်တန်လာသောအခါ၊ မိုးချုန်းခြင်း၊ လျှပ်စီးလက်ခြင်း၊ မုန်တိုင်း၊ မိုးသက်မုန်တိုင်းနှင့် မြေကြီးလှုပ်ခြင်းတို့ ရပ်တန့်လျှင်—အကြောင်းမူကား၊ ရှုလော့၊ ၎င်းတို့သည် သုံးနာရီခန့်ကြာ၏။ ထိုအချိန်မှာ၊ ပို၍ပင်ကြာသည်ဟု အချို့ကဆို၏။ သို့သော်လည်း၊ ဤကြီးစွာသောကြောက်မက်ဖွယ်သောအရာအားလုံးသည် သုံးနာရီခန့်ကြာသောအချိန်အတွင်း၌ ဖြစ်ခဲ့၏—ထို့နောက်၌၊ ရှုလော့၊ ထိုပြည်၏မျက်နှာပြင်ပေါ်၌ မှောင်မိုက်ခြင်းရှိ၏။

၂၀ ဤသို့အားဖြင့်အချိန်တန်လာသောအခါ၊ ထိုပြည်၏မျက်နှာပြင်တစ်ခုလုံးပေါ်၌၊ ထူထပ်သောမှောင်မိုက်ရှိရာ၊ ထိုပြည်၌ နေထိုင်သည့် မကျဆုံးသောသူတို့ အမှောင်ထုကို ခံစားနိုင်သည့်တိုင်အောင်ပင်တည်း။

၂၁ မှောင်မိုက်ကြောင့်၊ အလင်းလည်း မရှိနိုင်၊ မီးခွက်လည်းမရှိ၊ မီးရှူးလည်းမရှိ။ သူတို့၏ အကောင်းဆုံးဖြစ်၍၊ အလွန်ခြောက်သွေ့သည့် ထင်းကိုလည်း မီးညှိ၍မရနိုင်သဖြင့်၊ အလင်းတစ်စုံတစ်ခုမျှပင် မရှိနိုင်။

၂၂ ထို့အတူ၊ အလင်းတစ်စုံတစ်ခုကိုမျှ မြင်ရခြင်းမရှိ၊ မီးလည်းမရှိ၊ မှုန်ပျပျအလင်းလည်းမရှိ၊ နေလည်းမရှိ၊ လလည်းမရှိ၊ ကြယ်လည်းမရှိ။ အကြောင်းမူကား၊ ထိုပြည်၏မျက်နှာပြင်ပေါ်၌ရှိသော အမှောင်ထုမှာ အလွန်ကြီးမား၏။

၂၃ ဤသို့အားဖြင့်အချိန်တန်လာသောအခါ၊ အလင်းကိုမမြင်ရသည်မှာ သုံးရက်ကြာ၏။ ထို့အတူ၊ လူခပ်သိမ်းတို့၌ ကြီးစွာသော ငိုကြွေးမြည်တမ်းခြင်း၊ ညည်းတွားမြည်တမ်းခြင်းနှင့် ငိုကြွေးခြင်းတို့ အစဉ်မပြတ်ရှိ၏။ ထိုမှတစ်ပါး၊ သူတို့အပေါ် ကျရောက်သည့် မှောင်မိုက်နှင့် ကြီးစွာသောပျက်စီးခြင်းတို့ကြောင့် လူတို့၏ညည်းတွားခြင်းမှာ ကြီးမား၏။

၂၄ တစ်ခုသောအရပ်၌၊ သူတို့၏အော်ဟစ်သံကိုကြားရ၍၊ ဆိုကြလေသည်ကား၊ အို ငါတို့သည် ဤကြီးစွာသောကြောက်မက်ဖွယ်နေ့မတိုင်မီ နောင်တရခဲ့မည်သာဆိုလျှင်၊ ငါတို့၏ညီအစ်ကိုတို့ ချမ်းသာရလိမ့်မည်။ ထိုဇရဟင်မလမြို့ကြီး၌ သူတို့လောင်မြိုက်လိမ့်မည်မဟုတ်။

၂၅ ထို့အတူ၊ တခြားသောအရပ်၌ သူတို့အော်ဟစ်၍၊ ငိုကြွေးမြည်တမ်းသံကိုကြားရပြီးလျှင်၊ အို ငါတို့သည် ဤကြီးစွာသောကြောက်မက်ဖွယ်နေ့မတိုင်မီ နောင်တရခဲ့မည်သာဆိုလျှင်၊ ပရောဖက်တို့ကို ကျောက်ခဲနှင့်ပစ်ခြင်းနှင့် နှင်ထုတ်ခြင်းတို့ကိုသာ မပြုခဲ့မည်ဆိုလျှင်၊ ငါတို့၏မိခင်များနှင့် ငါတို့၏ ချောမောသောသမီးများ၊ ထို့အတူ ငါတို့၏သားသမီးများ ချမ်းသာရလျက် ထိုမော်ရော်နိဟမြို့ကြီး၌ အဖို့ခံခဲ့ရလိမ့်မည်မဟုတ်ဟု ဆိုကြ၏။ ထိုကဲ့သို့အားဖြင့်၊ လူတို့၏ ညည်းတွားမြည်တမ်းခြင်းမှာ ကြီးစွာသောကြောက်မက်ဖွယ် ဖြစ်လေသတည်း။