Maneho fiarahabana avy aty Kiribati!

Fantaro ireo zanaky ny Ray any An-danitra manerana izao tontolo izao.

I Kiribati (kee-ruh-bas) dia nosy iray izay firenena ao amin’ny Ranomasimbe Pasifika. Olona eo amin’ny 120.000 eo no mipetraka ao.

Nosy 33

Sary nataon’i Robyn Brimley

Ireo nosy kely mandrafitra an’i Kiribati dia mivelatra hatrany amin’ny 3,5 tapitrisa km² eo amin’ny ranomasimbe! Ny toerana misy azy eto amin’ity tany ity dia mametraka azy ho ao anatin’ny zarakisan’ora voalohany mahita ny hazavana isaky ny andro vaovao iray.

Moron-dranomasina tsara tarehy

Feno torapasika sy hazo voaniho i Kiribati. Mafana ny andro any mandritra ny taona.

Ohatra tena miavaka

Ny 20 isan-jaton’ny mponina eo ho eo dia mpikamban’ny Fiangonana. Ohatra tsara ho an’ireo olona hafa mipetraka eo amin’ireo nosy izy ireo.

Mandehana manjono!

Noho ny ranomasimbe manodidina azy ireo dia mihinana hazan-dranomasina betsaka ny olona. Fihinana mahazatra koa ny voaniho, ny vary ary ny voatavo.

Tempoly vao haorina

Tamin’ny ôktôbra 2020 dia nanambara ny Filoha Russell M. Nelson fa hisy tempoly haorina any Kiribati! Toy izao ny mety ho endrik’izany.

Fiaraha-mientana

Dihy fanaon’ny biby

Ampahan-javatra iray manan-danja eo amin’ny fiainana any Kiribati ny fandihizana. Ny dihin’izy ireo dia nosintonina avy amin’ny vorom-pirenen’izy ireo dia ny vorona bomomandry (frégate). Mamelatra ny sandrin’izy ireo tahaka ny elatra ireo mpandihy rehefa mihetsika izy ireo.

Inona no biby tena tianao indrindra? Eritrereto ny fomba fihetsik’izany. Mamoròna dihy nosintonina avy amin’izany biby izany avy eo. Mangataha namana vitsivitsy mba hiaraka handihy aminao!

Nahandro

Lasopy voatavo sy voaniho

1. Mandraraha menaka voaniho kely ao anaty vilany. Arotsahy ny tongolo iray notetehina madinika ary andrahoy amin’ny afo antonony mandra-panombohan’ireo tongolo ho mendimendy.

2. Arotsahy ny voatavo nopotsehina 400 grama, ny rononona voaniho 473 mililitatra, ary ny ron’akoho 946 mililitatra. Afangaroy tsara.

3. Avelao hangotraka ilay lasopy, dia ataovy malefaka ny afo avy eo ary avelao hiketrika mandritra ny 20 minitra izany.

4. Raha tianao dia asio sira, dipoavatra, sakamalaho, na zava-manitra hafa.

Ataovy izay hahazoana fanampiana avy amina olon-dehibe iray!

Torohevitra mahasoa

Mihetsiketseha

Mihazona ny fonao sy ny hozatrao ary ny taolanao ho salama ny fanaovana fampiasam-batana. Afaka manao zavatra mahafinaritra toy ny fandihizana, ny fanaovana fanatanjahan-tena na ny fitaingenana bisikileta, na izay zavatra tianao ianao isan’andro mba hampihetsehana ny vatanao sy hampidobodoka ny fonao!