Bo ta Drumiendo durante e Restourashon?
Pa Presidente Dieter F. Uchtdorf
Di Dos Konsehero di e Promé Presidensha
Ta demasiado importante pa nos komo individual, komo famia, i komo Iglesia di Cristo pa duna solamente esfuerso parsial na e obra sagrado aki.
Kasi dos shen aña pasá, e historia kòrtiku Merikano “Rip Van Winkle” a bira un klásiko instantanio. E protagonista, Rip, ta un hòmber sin ambishon, kende ta hopi bon evitando dos kos: trabou i su kasa.
Un dia, miéntras e tabata kana den e serunan ku su kachó, el a diskubrí un grupo di hòmber bistí di manera straño bebiendo i hungando. Despues di aseptá algun di nan bibidanan, Rip a bira kansá i a sera su wowonan pa un momento. Ora el a habri su wowonan bèk, e tabata sorprendí pa haña ku su kachó a bai, i su rifel a frusa i awor e tin un barba largu.
Rip ta regresá na e pueblo pa diskubrí ku tur kos a kambia. Su kasa a muri, su amigunan a bai, i e potrèt di Rei George e di Tres den su taberna a wòrdu remplasá pa un potrèt di un hende ku e no konosé—e General George Washington.
Rip Van Winkle a keda drumí pa binti aña! I den e proseso, el a pèrdè un di e periodo mas eksitante den e historia di su pais—el a drumi durante e Revolushon Merikano.
Den mei 1966, Dr. Martin Luther King Jr. a usa e historia aki komo un ilustrashon pa su diskurso “No Drumi Durante e Revolushon.”1
Awe mi ker a tuma e mesun tópiko i presentá e pregunta pa nos tur ku ta poseé e Saserdosio di Dios: bosonan ta drumiendo durante e Restorashon?
Nos ta Bibando den e Tempu di e Restourashon
Tin biaha nos ta pensa di e Restourashon di e evangelio komo algu ku ta kompletu, ya tras di nos—Joseph Smith a tradusí e Buki di Mormon, el a risibí e yabinan di saserdosio, e Iglesia a wòrdu organisá. Den realidat, e Restourashon ta un proseso ku ta kontinuá; nos ta bibando den dje awor aki mes. E ta inkluí “tur loke Dios a revelá, tur loke awor E ta revelá,” i e “hopi kosnan grandi i importante” ku E ta bai revelá.2 Rumannan, e desaroyo eksitante di awe ta parti di e tempu di preparashon predisí hopi tempu pasá, ku lo kulminá den e glorioso Segunda Binida di nos Salbador, JesuCristu.
Esaki ta un di e periodonan mas remarkabel di e historia di mundu! Profetanan antiguo a anhelá pa mira nos tempu.
Ora nos tempu di mortalidat ta terminá, ki eksperenshanan nos lo por kompartí tokante nos kontribushon na e periodo signifikante aki di nos bida i di e desaroyo di e obra di Señor? Nos lo ta kapas pa bisa ku nos a dobla nos manga i a obra ku hinter nos kurason, poder, mente i forsa? Òf nos lo tin ku atmití ku nos parti tabata mas esun di un opservador?
Mi ta suponé ku tin un variedat di rasonnan dikon e ta fásil pa ta ménos enbolbí ku relashon na e edifikashon di e reino di Dios. Permití mi menshoná tres prinsipal. Miéntras mi ta hasi esaki, mi ta invitá boso pa reflekshoná si algun ta aplikabel. Si bo ta mira lugá pa mehoramentu, mi ta puntra boso pa konsiderá kiko lo por wòrdu hasi pa kambia pa e mihó.
Egoismo
Promé, egoismo.
Esnan ku ta egoista ta buska nan propio interes i plaser riba tur kos. E pregunta sentral di e persona egoista ta: “Kon esaki lo benefisiá mi?”
Rumannan, mi ta sigur ku boso por mira ku e aktitut aki ta klaramente kontrali na e spiritu rekerí pa edifiká e reino di Dios.
Ora nos buska outo servisio riba servisio desinteresá, nos prioridatnan ta bira enfoká riba nos propio rekonosementu i plaser.
Generashonnan pasá tabatin nan lucha ku variashon di egoismo i narsismo, pero mi ta kere [ku] awendia nos ta dunando nan kompetensha serio. Ta koinsidensia ku e Oxford Dictionary resientemente a proklamá e palabra “selfie” (potrèt ku a wòrdu tuma di nos mes) komo e palabra di aña?3
Naturalmente, nos tur tin e deseo pa rekonosementu, i no tin nada malu ku relahá i disfrutá di nos mes. Pero ora buska e “ganashi i atmirashon di mundu”4 ta un parti sentral di nos motivashon, nos lo faya e eksperenshanan ku ta redimí i felis ku ta bini ora nos duna generosamente di nos mes na e obra di Señor.
Kiko ta e remedi?
E kontesta, manera semper, ta den e palabranan di Cristu:
“Esun ku sigui Mi, lag’é nenga su mes, tuma su krus i sigui Mi.
“Pasó esun ku ke salba su bida, lo pèrd’é; pero esun ku pèrdè su bida pa Mi kousa i pa e Evangelio, esei lo salba [su bida].”5
Esnan ku sinseramente entregá na bida na nos Salbador i sirbi Dios i nan próhimo, ta diskubrí un rikesa i plenitut den bida ku esun egoista nunka lo eksperenshá. Esun ku ta generoso ta duna di su mes. Esakinan por ta regalonan chikitu di karidat ku lo tin un impakto grandi pa bon: un sonrisa, un “duna man,” un abraso, tempu dediká pa skucha, un palabra di kurashi, òf un gesto di kuido. Tur e aktonan aki di gentilesa por kambia kurasonnan i bidanan. Ora nos tuma bentaha di e oportunidatnan ilimitá pa stima i sirbi nos próhimo, inkluyendo nos kasa i famia, nos kapasidat pa stima Dios i otro lo krese den gran forma.
Esunnan ku ta sirbi otro lo no drumi durante e Restourashon.
Adikshonnan
Un otro kos ku por kousa nos pa kana na soño den e temporada signifikante di mundu aki ta adikshon.
Adikshonnan hopi biaha ta kuminsá di un manera sutil. Adikshon ta hilunan fini di akshonnan ripití ku ta resultá den tela diki di kustumber. Kustumbernan negativo tin e potensial pa bira adikshonnan ku ta konsumí.
E kadenanan ku ta mara di adikshon por tin diferente forma, manera pornografia, alkohòl, sèks, droga, tabako, wega di plaka, kuminda, trabou, e Internet, òf realidat virtual. Satanas, nos enemigu komun, tin hopi instrumento favorito ku e ta usa pa hòrta nos di nos potensial divino pa kumpli ku nos mishon den e reino di Señor.
E ta hasi nos Tata Selestial tristu pa wak kon boluntariamente algun di Su yunan noble ta ekstendé nan mannan pa aseptá e kadenanan di adikshonnan debastador.
Rumannan, nos ta poseé e saserdosio eterno di e Dios Todopoderoso. Nos ta berdaderamente yunan di e Esun di mas Haltu i nos ta inbestí ku inkreibel potensial. Nos ta diseñá pa bula libremente den shelu. Nos no mester ta mara na tera, enkarselá den kamisa di forsa ku nos mes a traha.
Kiko ta e remedi?
E promé kos ku nos mester komprondé ta ku adikshon ta muchu mas fásil pa evitá ku e ta pa kura. Den e palabranan di e Salbador, “No permití ningun di e kosnan aki drenta boso kurason.”6
Hopi aña pasa, Presidente Thomas S.Monson i ami tabatin e oportunidat pa biaha den Air Force One—e avion magnífiko ku ta transportá e presidente di Merka. Tabatin puntonan di seguridat hopi detayá dor di Servisio Sekreto, i mi a smail un tiki ora e agentenan tabata listra nos profeta stimá promé ku e abordá.
E ora e piloto na mando a invitá mi pa sinta den e stul di kapitan. E tabata un eksperensha remarkabel pa sinta un biaha mas na timon di un mashin maravioso ku ta bula, meskos ku tiponan ku mi a bula pa asina tantu aña. Memorianan di buelo krusando oseannan i kontinentenan a yena mi kurason i mente. Mi a imaginá mi mes kon e avionnan ta lanta i aterisá na e diferente aeropuerto rònt mundu.
Kasi inkonsiente, mi a pone mi mannan na e kuater valfnan ku ta regulá di e 747. Nèt na e momentu ei, un bos stimá i ku no por wòrdu konfundí a bin di patras—e bos di Thomas S. Monson.
“Dieter,” el a bisa, “ni sikiera pensa riba e kos ei.”
Mi no ta atmitiendo nada, pero kisas por ta ku Presidente Monson a lesa mi pensamentu.
Ora nos ta tentá pa hasi kosnan ku nos no mester hasi, laga nos tende di e atvertensia amoroso i di konfiansa di famia i amigunan, nos profeta stimá, i semper e Señor.
E mihó defensa kontra adikshon ta nunka kuminsá.
Pero kon ta para di esnan ku ta enkontrá nan mes den e gara di adikshon?
Por fabor sa, promé ku tur kos, ku tin speransa. Buska ayudo serka di esnan ku nos stima, lidernan di Iglesia, i konseheronan profeshonal. E Iglesia ta proveé ayudo pa rekuperá di adikshon dor di e lidernan di Iglesia, e Internet,7 i den sierto aria, LDS Family Services.
Kòrda semper, ku ayudo di e Salbador, bo por liberá bo mes di adikshon. E por ta un kaminda largu i difísil, pero e Señor lo no laga bo kai. E ta stima bo. JesuCristu a sufri e Ekspiashon pa yuda bo kambia, pa liberá bo di e koutiverio di piká.
E kos di mas importante ta sigui purba—tin biaha e ta tuma diferente intento promé ku hende logra éksito. Asina ta ku no entregá. No pèrdè speransa. Mantené bo kurason serka di Señor, i E lo duna bo e poder di liberashon. E lo hasi bo liber.
Mi rumannan stimá, semper keda leu for di kustumbernan ku por kondusí na adikshon. Esnan ku ta hasi esei lo por dediká nan kurason, poder, mente i forsa na e servisio di Dios.
Nan no lo drumi durante e Restourashon.
Prioridatnan ku ta Kompetí.
E di tres opstákulo ku ta prevení nos pa ta kompletamente involukrá den e obra aki, ta e hopi prioridatnan ku ta kompetí ku nos ta enfrentá. Tin di nos ta asina okupá, ku nos ta sinti manera un garoshi ku ta wòrdu halá dor di un dosein di animalnan—kada un halando den diferente direkshon. Hopi energia ta wòrdu konsumí, pero e garoshi no ta bai niun kaminda.
Hopi biaha nos ta dediká nos mihó esfuerso den búskeda di hòbi, un deporte, interes vokashonal òf den temanan polítiko. Tur e kosnan aki por ta bon i honorabel, pero nan ta laga nos sobra tempu i energia pa loke ta nos prioridatnan di mas haltu?
Kiko ta e remedi?
Un biaha mas, e ta bin di e palabranan di e Salbador:
“Boso lo stima E Señor boso Dios, ku hinter boso kurason, i ku hinter boso alma, i ku tur boso mente.
“Esaki ta e promé i gran mandamentu.
“I e di dos ta igual ku e promé, Boso lo stima bo próhimo manera bo mes.”8
Tur otro kos den bida mester ta na di dos lugá kompará ku e dos prioridatnan grandi aki.
Asta den servisio den Iglesia, e ta fásil pa dediká hopi tempu djis hasiendo sin pensa kiko nos ta hasiendo sin kurason ni e sustansha di disípulado.
Rumannan, nos komo poseedornan di saserdosio a komprometé nos mes di ta hendenan ku ta stima Dios i nos próhimo i ku nos ta dispuesto di demostrá ku amor dor di palabra i hecho. Esei ta e esensia di ken nos ta komo disipelnan di JesuCristu.
Esnan ku ta biba e prinsipionan aki lo no drumi durante e Restourashon.
Un Yamada pa Lanta
E Apòstel Pablo a skirbi, “Lanta bosonan ku ta drumí i lanta for di morto, i Cristo lo duna boso lus.”9
Mi amigunan stimá, sa ku bosonan ta yunan di lus.
No permití egoismo! No permití kustumbernan ku por kondusí na adikshon! No permití prioridatnan ku ta kompetí pa kondusí bo na indiferensha òf kita bo for di e disípulado bendishoná i servisio di saserdosio noble!
Ta demasiado importante pa nos komo individual, komo famia, i komo Iglesia di Cristo pa duna solamente esfuerso parsial na e obra sagrado aki.
Pa ta un disipel di JesuCristu no ta algu ku ta pasa un biaha pa siman òf un biaha pa dia. E ta un esfuerso di un biaha pa semper.
E promesa di Señor na Su berdadero poseedornan di saserdosio ta kasi demasiado grandi pa komprondé.
Esnan ku ta fiel Saserdosio Aaróniko i di Melchizedek i magnifiká nan yamamentu “ta santifiká dor di e Spiritu pa renobashon di nan kurpa.” P’esei, tur loke nos Tata tin lo wòrdu duná na nan.10
Mi ta testifiká ku e poder limpiadó di e Ekspiashon di JesuCristo i e poder ku ta transformá di e Spiritu Santu por saná i reskatá humanidat. Ta nos privilegio, nos deber sagrado, i nos goso pa tende e yamada di Salbador; pa sigui’É ku un mente dispuesto i íntegro propósito di kurason. Laga nos “sakudí e kadenanan ku kua [nos] ta mará, i Sali for di skuridat, i lanta for di suela.”11
Laga nos lanta i no kansa di hasi bon, pasó nos “ta poniendo e fundeshi di un gran obra,”12 ku ta preparando e regreso di e Salbador. Rumannan, ora nos añadí e lus di nos ehèmpel komo testigu di e bunitesa i poder di e bèrdat restourá, nos lo no drumi durante e Restourashon. Di esaki mi ta testifiká i laga mi bendishon pa boso den e nòmber sagrado di nos Maestro JesuCristu, amen.