Bonbiní na [e] Konferensha

Pa Presidente Thomas S. Monson

Nos ta … uní den nos fe i den nos deseo pa skucha i siña di e mensahenan ku lo wòrdu presentá na nos.

Mi rumannan stimá, mi ta hopi komplasí pa [por] yama bosonan bonbiní na e konferensha mundial di e Iglesia di JesuCristu di e Santunan di e Delaster Dianan. Nos ta reuní komo un gran famia, mas di diesinku mion miembro, uní den nos fe i nos deseo pa skucha i siña di e mensahenan ku lo wòrdu presentá na nos.

Seis luna a pasa masha lihé miéntras e obra di e Iglesia a sigui progresá sin opstákulo. R tabata mi privilegio algu mas ku un luna pasá pa dediká e Tèmpel di Gilbert Arizona, un struktura magnífiko. E nochi promé ku e dedikashon un evento kultural a wòrdu organisá serka, na Discovery Park. Diesdos mil hóben a aktua den un programa di nobenta minüt. E baile, e kantamentu, i aktuashonnan musikal tabata tremendo.

E aria aki tabata eksperensiando un temporada di sekura, i mi ta kere hopi orashon a wòrdu mandá na Shelu e simannan promé pa e áwaseru tan nesesario. Lástimamente, el a bin djis promé ku e aktuashon i a dura dor di hinter e produkshon. Apesar di e hecho ku e hubentut tabata papa muhá dor di e áwaseru i [tabata sinti] friu di e temperatura poko friu, nos tur a sinti e spiritu di Señor. E lema di e programa, ”Biba fiel na e Fe”—pensa riba esei: ”Fiel na e Fe”—a wòrdu presentá di un forma magnífiko dor di hóbennan ku tabata smail i entusiasmá. Apesar di e friu i e áwaseru, esaki tabata un eksperensha yen di fe i inspirá ku e hóbennan aki semper lo tesorá i lo konta nan yunan i nan ñetunan den e añanan benidero.

E dia siguiente, e dedikashon di e Tèmpel di Gilbert Arizona a tuma lugá. El a bira e di shentikuarentidos tèmpel den funshon di e Iglesia. Kontrali na e nochi anterior, e dia tabata bunita i yen di lus di solo. E sekshonnan tabata realmente inspirá. Asistiendo ku mi tabata Presidente Henry B. Eyring, Elder i hermana Tad R. Callister, Elder i hermana William R. Walker i Elder i hermana Kent F. Richards.

Den mei e Tèmpel di Fort Lauderdale Florida lo wòrdu dediká. Otro tèmpelnan a wòrdu programá pa kaba i dediká mas den aña. Na 2015 nos ta antisipá ku tèmpelnan nobo lo kaba i wòrdu konstruí na hopi parti di mundu. E proseso aki lo kontinuá. Ora tur e tèmpelnan anunsiá ta kla, nos lo bai tin 170 tèmpel den funshon rònt mundu.

Maske ku aworakí nos ta konsentrando nos esfuerso riba kompletá e tèmpelnan anunsiá i lo no anunsiá niun tèmpelnan nobo den e futuro inmediato, nos lo kontinuá e proseso pa determiná e nesesidat i di haña lugánan pa tèmpel ku tin ku yega ainda. Anunsionan e ora ei lo wòrdu duná den konferenshanan general den futuro. Nos ta e hendenan ku ta konstruí i bishitá e tèmpelnan.

Awor, rumannan, nos ta ansioso pa skucha e mensahenan ku lo wòrdu presentá na nos awe i mañan. Esnan ku lo dirigí [nan mes] na nos a buska ayudo i direkshon di shelu miéntras nan tabata preparando nan mensahenan.

Ku nos—nos tur, aki i otro kaminda—por wòrdu yená ku e spiritu di e Señor i wòrdu elevá i inspirá miéntras nos la skucha i siña. den nòmber di JesuCristu, amèn.