Protekshon for di Pornografia—un Hogar Sentrá riba Cristo
Pa Linda S. Reeves
Di Dos Konsehera den e Presidensia General di Sosiedad di Sokoro
E filtro mas efektivo di mundu … ta e filtro personal internu ku ta bini for di un testimonio profundu i permanente.
Rumannan stimá, awe mi ta bendishoná pa tin 13 di mi nietonan mas grandi den e kongregashon. Esaki a kausa mi pa puntra, “Kiko mi kier pa mi nietonan sa?” Awe mainta mi kier papia frankamente na mi famia i na esun di boso.
Nos komo lidernan ta mas i mas preokupá tokante e destrukshon ku pornografia ta kausa den e bidanan di miembronan di Iglesia i nan famianan. Satanas ta atakando ku un furia sin presedente.
Un rason nos ta aki riba tera ta pa siña pa kontrolá e pashonnan i sentimentunan di nos kurpanan mortal. E sentimentunan ei, duná di Dios, ta yuda nos desea pa kasa i pa tin yu. E relashon intimo matrimonial entre un homber i un muhé kua ta trese yunan den mortalidat tambe tin e proposito pa ta un eksperensia bunita i amoroso ku ta mara huntu dos kurasonnan devotó, ta uni spiritu ku kurpa, i ta trese un plenitut di goso i felisidat mientras ku nos ta siña pa pone otro promé. President Spencer W. Kimball a siña ku den matrimonio, “e kasá … ta bira preèminente den e bida di e esposo of esposa, i … [niun] otro interes [of] persona [of] kos mester yega di tuma presedensia riba e kasá kompañero. …
“Matrimonio ta presuponé lealdat kompletu i fidelidat kompletu.”1
Hopi aña pasa un di nos yunan tabata notablemente angustiá. Mi a drenta su kamber, unda el a habri su kurason i a splika mi ku e tabata na kas di un amigo i a mira sin kier imagennan i akshonnan sobresaltadó i turbadó riba televishon entre un homber i un muhe sin paña bistí. El a kuminsa yora i a ekspresá kon horibel el a sinti tokante loke el a mira i tabata deseá ku e por a kita esaki for di su mente. Mi tabata tan agradisí ku el a konfiá den mi, dunando mi un oportunidat pa kalma su kurason inosente i yen di doló i pa yud’e sa kon pa haña alivio dor di e Expiashon di e Salbador. Mi ta korda e sentimentunan sagrado ku mi tabatin ora nos a hinka rudiya huntu, komo mama i yu muhé, i a pidi pa e ayudo di nos Tata Selestial.
Hopi muchanan, hobennan, i adultonan ta inosentamente eksponí na pornografia, pero un number kresiente di tur dos hende hòmber i hende muhé ta skohe pa mir’é i ta atraé bek repetidamente te ku e ta bira un adikshon. E individuonan aki por tin e deseo ku henter nan kurason pa sali for di e trampa aki pero hopi biaha nan no por vens’é riba nan mes. Kon agradisí nos ta ora e sernan kerí aki ta skohe pa konfia den nos komo mayornan of un lider di Iglesia. Nos lo ta sabió pa no reakshoná ku shòk, rabia, of rechaso, lokual por causa nan pa bai keto atrobe.
Nos komo mayornan i lidernan mester konsehá huntu ku nos muchanan i hobennan riba un basis regular, skuchando ku amor i entendimentu. Nan mester sa e peliger di pornografia i kon e ta tuma over bidanan, causando e perdida di e Spiritu, sentimentunan maldirigí, desepshon, relashonnan kibrá, perdida di kontrol riba su mes, i kasi konsumo kompletu di tempo, pensamentu, i energiá.
Pornografia ta mas baho, malu, i grafiko ku nunka. Ora nos ta konsehá ku nos yunan, huntu nos por kreá un plan di famia ku standardnan i limitnan, siendo proaktivo pa proteha nos hogarnan ku e filtronan riba aparatonan elektroniko. Mayornan, nos sa ku aparatonan mobil ku kapasidat di Internet, no komputadornan, ta e kulpabel mas grandi?2
Hende hoben i adultonan, si bo ta atrapá den Satanas su trampa di pornografia, korda kon miserikordioso nos Salbador stimá ta. Bo ta realisá kon profundamente Señor ta stima i kier bo, asta awor? Nos Salbador tin e poder pa hasi bo limpi i pa sana bo. E por kita e doló i e pesar ku bo ta sinti i hasi bo limpi atrobe dor di e poder di Su Expiashon.
Nos komo lidernan tambe ta hopi preokupa pa e kasanan i famianan di esnan ku ta sufri di un adikshon na pornografia. Elder Richard G. Scott a implorá: “Si bo ta libra di pika serio bo mes, no sufri e konsekuensianan di e pikanan di un otro. … Bo por sinti kompashon. … Tog bo no mester tuma riba bo mes e sentimentu di responsabilidat pa e aktunan ei.”3 Sa ku bo no ta bo so. Ayudo tei. Reunionnan di rekuperashon di adikshon pa kasánan ta disponibel, inkluso reunionnan via telefon, kua ta permiti kasánan pa yama na un reunion i partisipa for di nan hogarnan.
Rumannan, kon nos ta protehé nos muchanan i hobennan? Filtronan ta hermentnan util, pero e filtro mas efektivo di mundu, e uniko ku lo traha ultimamente, ta e filtro personal internu ku ta bini for di un testimonio profundu i permanente di e amor di nos Tata Selestial i e sakrifisio ekspiadó di nos Salbador pa kada un di nos.
Kon nos ta guiá nos muchanan na konvershon profundu i pa tin akseso na nos Salbador su Ekspiashon? Mi ta stima e deklarashon di e profeta Nefi di kiko su hendenan a hasi pa fortalesé e hobennan di su tempu: “Nos ta papia di Cristo, nos ta regosihá den Cristo, nos ta prediká di Cristo, [i] nos ta profetisá di Cristo … pa nos yunan por sa na kua fuente nan mester mira pa un remishon di nan pikánan.”4
Kon nos por hasi esaki den nos hogarnan? Algun di boso a tende mi konta kon abrumadó mi kasá, Mel, i ami a sinti komo mayornan di kuater yunan chikitu. Mientras ku nos a enfrenta e retunan di kria nos yunan i mantene e demandanan di bida, nos tabata desesperá pa ayudo. Nos a hasi orashon i a implora pa haña sa kiko pa hasi. E kontesta ku a bini tabata kla: “E ta oké si e kas ta un desaster i e yunan ainda ta den nan pijama i algun responsabilidatnan ta keda deshasí. E uniko kosnan ku berdaderamente mester wòrdu hasí den e hogar ta studio di skritura i orashon kada dia i nochi di hogar kada siman.”
Nos tabata tratando pa hasi e kosnan aki, pero nan no semper tabata e prioridat i, den e kaòs, nan tin biaha a wòrdu neglishá. Nos a kambia nos enfoke i a trata pa no preokupa tokante e kosnan menos importante. Nos enfoke a bira pa papia, regosiha, predika, i testifika di Cristo dor di trata pa hasi orashion i studia e skrituranan kada dia i pa tin nochi di hogar kada siman.
Un amigo recientemente a cautelá, “Ora bo ta puntra e hermananan pa lesa e skrituranan mas i pa hasi orashon mas, e lo bai duna nan mas stres. Ya kaba nan ta sinti manera nan tin di mas pa hasi.”
Rumannan, pasobra mi sa di mi mesun eksperensianan, i esunnan di mi kasa, mi ta testifika di e bendishonnan di studio di skritura i orashon diario, i nochi di hogar kada siman. Esaki ta net e praktikanan ku ta yuda pa kita e stres, ta duna direkshon den nos bidanan, i ta añadi protekshon na nos hogarnan. E ora ei si pornografia of otro retunan ta dal nos famianan, nos por implora Señor pa ayudo i spera gran direkshon for di e Spiritu, sabiendo ku nos a hasi loke nos Tata a pidi nos pa hasi.
Rumannan, si esakinan no tabata praktikanan den nos hogarnan ainda, nos tur por kuminsa awor. Si nos yunan ta mas grandi i nenga pa uni ku nos, nos por kuminsa riba nos mes. Segun nos ta hasi’é, e influensia di e Spiritu lo kuminsa yena nos hogarnan i nos bidanan i, ku tempu, yunan lo respondé.
Korda ku Apostelnan bibu tambe a primiti ku segun nos ta buska nos antepasadonan i prepara nombernan di nos mesun famia pa e tempel, nos lo wòrdu protehé awor i durante nos bidanan tantin ku nos ta mantené nos mes digno di un rekomendashon di tempel.5 Ki promesa!
Hobennan, tuma responsabilidat pa boso propio bienestar spiritual. Paga boso cellular si ta nesesario, kanta un kantika di Primaria, hasi orashon pa ayudo, pensa riba un skritura,, sali di un pelikula, visualisá e Salbador, tuma di e santa sena dignamente, studia For the Strength of Youth, sea un ehempel pa boso amigunan, konfia den un mayor, bai wak bo obispo, puntra pa ayudo, i buska guía profeshonal, si ta nesesario.
Kiko mi kier pa mi nietonan sa? Mi kier pa nan i boso sa ku e mi sa ku e Salbador ta biba i ta stima nos. El a paga e presio pa nos pikanan, pero nos mester hinka rodiya dilanti nos Tata na Shelu, den humilidat profundu, konfesando nos pikanan, i implorando E pa perdòn. Nos mester deseá pa kambia nos kurasonnan i nos deseonan i mester ta sufisientamente humilde pa buska e ayudo i pordòn di esnan ku nos por a hasi doló of a abandoná.
Mi sa ku Jose Smith a mira Dios, nos Tata Selestial, i nos Salbador JesuCristo. Mi ta testifika ku nos tin un profeta bibu riba e tera, President Thomas S. Monson. Mi tambe ta testifika ku no lo nunka wordu guiá for di e kaminda si nos ta sigui e konseho di e profeta di Dios. Mi ta testifika di e poder di nos kombenionan i e bendishonnan di e tempel.
Mi sa ku e Buki di Mormon ta berdad! Mi no por splika e poder di e gran buki aki. Mi si sa ku, huntu ku orashon, e Buki di Mormon ta karga e poder pa protehé famianan, fortalesé relashonnan, i ta duna konfiansa personal dilanti Señor. Mi ta testifika di e kosnan aki den e sagradu nomber di JesuCristo, amen.