”Mi a Duna Bosonan un Ehèmpel”

Pa Elder Richard G. Scott

Di e Quorum di e Diesdos Apòstel

E ehèmpel di mas grandi ku a yega di biba na mundu ta nos Salbador, JesuCristu. … El a invitá nos pa sigui Su ehèmpel perfekto.

Segun mi tabata reflekshoná riba mi deber di kompartí e Evangelio, mi a meditá riba sernan kerí, ku nan ehèmpel tierno a yuda mi haña e kaminda divinamente apuntá ku a yuda mi progreso spiritual. Na momentonan vital den mi bida, Tata Selestial tabata bendishoná mi ku un hende ku tabata preokupá sufisientemente pa mi pa yuda influenshá mi desishonnan den e direkshon apropiá. Nan tabata warda e palabranan aki di e Salbador: “Paso Mi a duna boso ehèmpel, pa bosonan hasi meskos ku Mi a hasi na boso.”¹

Tempu mi tabata un mucha chikitu, mi tata no tabata miembro di Iglesia i mi mama a bira ménos aktivo. Nos tabata biba na Washington, D.C., i e mayornan di mi mama tabata biba 2.500 mia (2.000 kilometer) alehá den e estado di Washington. Algun luna despues ku mi a hasi ocho aña, abuela Whittle a bin di otro banda di e pais pa bishitá nos. Abuela tabata preokupá ku ni ami ni mi ruman hòmber mas bieu a wòrdu boutisá. Mi no sa ta kiko el a bisa mi mayornan di esaki, pero mi sa si ku riba un mainta el a hiba ruman hòmber i ami na e parke i a kompartí su sentimentunan di e importansha di wòrdu boutisá i asistí na e reunionnan di Iglesia regularmente. Mi no ta kòrda e detayenan di loke el a bisa, pero su palabranan a hasi algu ku mi kurason i pronto despues mi ruman hòmber i ami a wòrdu boutisá.

Abuela a sigui sostené nos. Mi ta kòrda ku kada biaha ku mi ruman òf ami wòrdu asigná pa duna un diskurso na Iglesia, nos tabata yam’é na telefon pa sugerensha. Despues di un par di dia un diskurso, skirbí na man, ta yega via pòst. Despues di algun tempu su sugerenshanan a kambia den puntonan di atenshon rekeriendo mas esfuerso di nos parti.

Abuela tabata usa e kantidat korekto di kurashi i rèspèt pa yuda mi tata rekonosé e importansha di e kore i hiba nos na Iglesia pa nos reunionnan. Di tur manera apropiá, el a yuda nos sinti e nesesidat di e Evangelio den nos bida.

Mas importante ainda, nos tabata sa ku abuela tabata stima nos i ku e tabata stima e Evangelio. E tabata un ehèmpel maravioso! Kon gradesí mi ta pa e testimonio ku el a kompartí ku mi tempu mi tabata hopi yòn. Su influensha a kambia e direkshon di mi bida.

Despues, ora mi tabata kasi kabando e universidat, m’a namorá di un mucha bunita ku yama Jeanene Watkins. Mi a pensa ku el a kuminsá di tin sentimentu profundo pa mi tambe. Riba un anochi nos tabata papiando di futuro, el a hinka koutelosamente un deklarashon den e kombersashon ku a kambia mi bida pa semper. El a bisa, “Dia mi kasa, e lo ta ku un misionero regresá ku ta fiel, den un tèmpel.”

Mi no a pensa masha riba un mishon promé ku esei. E anochi ei e motivashon pa konsiderá sirbi un mishon a kambia dramátikamente. Mi a bai kas i mi no por a pensa riba nada mas. Hinter anochi mi a keda lanta. Mi tabata kompletamente distraí di mi estudio e siguiente dia. Despues di hopi orashon mi a tuma e desishon pa reuní ku mi obispu i kuminsá mi aplikashon pa bai riba mishon.

Jeanene nunka a pidi mi sirbi un mishon p’e. E tabata stima mi sufisiente pa kompartí su konvikshon i despues duna mi e oportunidat pa elaborá e direkshon di mi propio bida. Nos tur dos a sirbi mishon i despues nos a seya den Tèmpel. Jeanene su balentia i kompromiso na su fe a hasi e diferensha den nos bida huntu. Mi tin sigur ku nos lo no a haña e felisidat ku nos ta gosa di dje sin su fe grandi den e prinsipionan di sirbi e Señor promé. E ta un ehèmpel maravioso i hustu!

Tantu Abuela Whittle ku Jeanene tabata stima mi sufisiente pa kompartí nan konvikshon ku e ordenansanan di e Evangelio lo bendishoná mi bida. Ningun di nan dos a forsa mi òf laga mi sinti mi malu pa e persona ku mi tabata. Simplemente nan a stima mi i stima e Tata Selestial. Tur dos tabata sa ku E por hasi mas ku mi bida, ku ami lo por riba mi mes. Kada unu a yuda mi di un manera amoroso pa haña e kaminda di mayor felisidat.

Kon kada unu di nos por yega na ta un ehèmpel asina signifikante? Nos mester di sigurá nos mes di stima esnan sinseramente ku nos ke yuda di un den hustisia, p’asina nan por kuminsá desaroyá konfiansa den e amor di Dios. Pa hopi den mundu, e promé desafio pa aseptá e Evangelio ta desaroyá fe den un Tata Selestial, ku ta stima nan di un manera perfekto. Ta mas fásil pa desaroyá e fe ei ora nan tin amigunan òf miembronan di famia ku ta trata nan ku un amor similar.

Dunando nan konfiansa di bo amor por yuda nan desaroyá fe den e amor di Dios. Despues dor di bo komunikashon amoroso i ku konsiderashon, nan bisa lo ta bendishoná dor di bo kompartiendo lèsnan ku bo a siña, eksperenshanan ku bo tabata tin, i prinsipionan ku bo a sigui pa haña solushonnan pa bo mes desafionan. Mustra bo interes sinsero den nan bienestar; despues kompartí bo testimonio di e Evangelio di JesuCristu.

Bo por yuda na e maneranan ku ta basá den prinsipionan i doktrina. Enkurashá esnan ku bo ta stima pa buska pa komprondé kiko e Señor ke pa nan hasi. Un manera pa hasi esaki ta pa hasi nan preguntanan ku ta laga nan pensa i despues permití nan sufisiente tempu—sea oranan, dianan, lunanan, òf mas—pa [nan] reflekshoná i buska pa yega na e kontestanan pa nan mes. Kisas bo tin ku siña nan ta kon pa hasi orashon i kon pa rekonosé e kontestanan riba nan orashon. Yuda nan pa sa ku e skrituranan ta un fuente vital pa risibí i rekonosé e kontestanan. Asina bo ta yuda nan prepará pa oportunidat i desafionan den futuro.

E propósito di Dios ta ”Realisá e inmortalidat i bida eterno di hòmber.”² Esaki ta fundamental den tur kos ku nos hasi. Tin biaha nos ta asina enbolbí den kosnan ku ta fasiná nos òf [nos] ta wòrdu konsumí pa responsabilidatnan mundano ku nos ta pèrdè bista di e ophetivonan di Dios. Si konsistentemente bo ta sentrá bo bida riba e prinsipionan mas básiko, lo bo gana un entendimentu di kiko lo bo tin ku hasi, i lo bo produsí mas fruta pa e Señor.

Si bo sentrá bo bida riba e prinsipio básiko di e plan di Salbashon, lo bo konsentrá mihó riba kompartí loke bo sa, pasó bo ta komprondé e importansha eterno di e ordenansanan di e Evangelio. Lo bo kompartí loke bo sa di un manera ku ta atraé bo amigunan pa ke ta spiritualmente fortalesé. Lo bo yuda bo sernan kerí ku nan ta deseá di komprometé nan mes pa obedesé tur Su mandamentunan i tuma riba nan mes e nòmber di JesuCristu.

Kòrda ku e kombershon di personanan ta solamente parti di e obra. Semper buska pa fortalesé famianan. Siña ku e vishon di e importansha pa famianan wòrdu seyá den Tèmpel. Ku algun famia e por tuma [diferente] aña. Esaki tabata e kaso ku mi mayornan. Hopi aña despues ku mi a wòrdu boutisá, mi tata a wòrdu boutisá, i despues mi famia a seya den tèmpel. Mi tata a sirbi komo seyador di e tèmpel, i mi mama a sirbi einan ku n’e. Ora bo tin e vishon di e ordenansanan seyador di e tèmpel ei, lo bo yuda edifiká e reino di Dios na mundu.

Kon bo ta hasi esaki? Stima nan. Esei ta e influensha mas poderoso. E influensha di mi abuela Whittle i di mi kasá, Jeanene, lo tabata insignifikante si no tabata ku promé mi a haña sa ku nan stima mi i tabata deseá pa mi tin e mihó di bida.

Kompañando e amor ei, konfia nan. Den sierto kasonan lo e parse difísil pa konfia, pero buska un manera pa konfia nan. E yunan di nos Tata Selestial por hasi kos nan asombroso ora nan sinti ku nan ta wòrdu konfia. Tur yu di Dios den mortalidat a skohe pa e plan di e Salbador. Konfia ku, si nan haña e oportunidat, nan lo hasi esei atrobe.

Kompartí prinsipionan ku ta yuda esnan ku bo ta stima pa pusha bai dilanti riba e kaminda pa eternidat. Kòrda, nos tur ta krese linia riba linia. Bo a sigui e mesun patronchi den bo komprendimentu di e Evangelio. Tene e kompartimentu di Evangelio simpel.

Bo testimonio personal di e Ekspiashon di JesuCristu ta un instrumento poderoso. Rekursonan pa kompañá [esaki] ta orashon, e Buki di Mormon i otro skrituranan, i bo kompromiso na e ordenansanan di Saserdosio. Tur esakinan lo fasilitá e direkshon di e Spiritu, ku ta [di un] importansha asina krusial pa konfia den dje.

Pa ta efikas i hasi meskos ku Cristu a hasi,³ konsentrá riba e prinsipio básiko di e Evangelio: e Ekspiashon di JesuCristu ta hasi posibel pa nos bira mas manera nos Tata Selestial, p’asina nos por biba huntu eternamente den unidatnan di famia.

No tin doktrina mas fundamental den nos obra ku e Ekspiashon di JesuCristu. Na kada oportunidat apropiá testifiká di e Salbador i di e poder di Su sakrifisio Ekspiatorio. Usa skritura ku ta siña di Dje i dikon E ta e patronchi perfekto pa tur hende den [nan] bida. ⁴Lo bo mester studia diligentemente. Bo no mester ta tan okupá ku kosnan di poko importansha ku bo ta pèrdè oportunidat pa siña e doktrina i enseñansanan di e Señor.. Ku un fundamentu sólido di doktrina personal, lo bo por ta un fuente poderoso pa kompartí bèrdatnan vital ku otronan ku desesperadamente mester di nan.

Nos por sirbi nos Tata Selestial mihó dor di influensha di un manera hustu i sirbiendo nan.⁵ E ehèmpel di mas grandi ku a yega di kana riba e mundu aki, ta nos Salbador JesuCristu. Su ministerio mortal tabata yen di enseñansa, servisio i amor. El a sinta ku hendenan ku a wòrdu huzgá di ta indigno di Su kompania. El a stima kada un di nan. El a diserní nan nesesidatnan i a siña nan Su Evangelio. E ta invitá nos pa sigui Su ehèmpel perfekto aki.

Mi sa ku Su Evangelio ta e kaminda pa pas i felisidat den e bida aki. Ku nos por kòrda di hasi meskos ku e a hasi. Ku nos lo kompartí amor, konfiansa i konosementu di bèrdat ku otronan ku ainda no a brasa e lus briante di e Evangelio. Den e nòmber di JesuCristu, amèn.