Hermandat: Esta Nesesidat Nos Tin di Otro

Pa Bonnie L. Oscarson

Presidente General di Mujeres Jovenes

Nos mester stòp di konsentrá riba otro su diferensianan i mira kiko nos tin en komun.

Den e video ei nos a wak ocho país i a tende nuebo diferente idioma. Imagina kuanto mas idioma a wordu inkluí na e verso final. E ta emoshonante pa sa ku komo un hermandat di henter mundo nos por lanta nos stèmnan den testimonio di e berdad eterno ku nos ta yunan muhé di un amoroso Tata Selestial.

Ta un gran privilegio pa ta aki riba e okashon históriko aki i pa dirigí palabra na tur e muhénan di Iglesia di ocho aña di edat bai ariba. Tin forsa tremendo den nos unidat awe nochi. Manera mi ta mira nos tur reuní huntu den Sentro di Konferensha i pensa riba e míles di otronan ku ta mirando e transmishon for di lugánan rònt mundu, e poder kombiná di nos testimonionan i fe den JesuCristo ku seguridat ta forma un dje asambleanan di muhénan mas yená di fe i poderoso den historia di Iglesia, esta si no ta di mundu.

Awe nochi nos ta gosa den nos diferente ròlnan komo muhénan den Iglesia. Ounke den hopi manera nos ta diferente i úniko, nos ta rekonosé tambe ku nos tur ta yunan muhé di e mes un Tata Selestial, lokual ta hasi nos rumannan. Nos ta uní den edifiká e reino di Dios i den e kombenionan ku nos a hasi, apesar di nos sirkunstansianan. E asamblea kombiná aki ta, sin ningun duda, e hermandat mas glorioso riba mundu!¹

Pa ta rumannan muhé ta impliká ku tin un laso indestruktibel entre nos. Hermananan ta sòru pa otro, paga tinu riba otro, konsolá otro, i ta disponibel pa otro den tempu bon i malu. Señor a bisa nos pa ta un, i si nos no ta un nos no ta di Dje.²

E atversario ke pa nos kritiká i husga otro. E ke pa nos enfoká riba nos diferensianan i kompará nos mes ku otronan. Abo por ta gusta pa hasi ehersisio vigorosamente pa un ora tur dia pasobra e ta laga bo sinti bo asina bon, miéntras ku ami ta pensa ku ta un logro atlétiko hopi grandi si mi kana subi trapi enbes di usa left. Nos por keda amiga ku otro, tòg?

Nos komo muhénan por ta partikularmente duru ku nos mes. Ora nos ta kompará nos mes ku otronan, semper nos lo sinti nos inadekuá òf malkontentu ku otronan. Hermana Patricia T. Holland a bisa un bia, “E punto ta, nos simplemente no por yama nos mes Kristian i sigui husga otro—òf nos mes—asina duru.”³ E ta sigui bisa ku no tin nada ku ta bal la pena di pèrdè nos kompashon i hermandat p’e. Solamente nos tin ku relahá i gosa di nos diferensianan dibino. Nos mester realisá ku nos tur ta deseá pa sirbi den e reino, usando nos talentonan i donnan úniko na nos mes manera. E ora ei nos por gosa di nos hermandat, i nos asosiashonnan, i kuminsá sirbi.

E hecho ta ku berdaderamente i realmente nos tin mester di otro. Muhénan di naturalesa ta buska amistat, sosten, i kompañerismo. Nos tin asina hopi di siña for di otro, i mayoria bia nos ta laga barera ku nos mes a pone stroba nos di gosa di relashonnan ku por ta un dje bendishonnan di mas grandi den nos bida. Por ehèmpel, nos muhénan ku ta un poko bieu tin mester di lokual boso muchanan muhé di edat di Primaria tin pa ofresé. Nos por siña hopi di boso servisio i amor Kristian.

Resientemente mi a tende un relato maravioso di un mucha muhé chikitu ku ta yama Sarah, kende su mama tabatin e oportunidat pa yuda un otro muhé den su bario yamá Brenda, ken tabatin múltiple sclerosis. Sarah tabata gusta bai ku su mama pa yuda Brenda. E tabata pone loshon riba Brenda su mannan i duna su dedenan i brasanan masashi pasobra hopi bia e tabatin doló. Despues Sarah a siña pa suavemente rèk Brenda su brasanan riba su kabes pa duna su múskulonan ehersisio. Sarah tabata skeiru Brenda su kabei i kombersá ku n’e miéntras su mama tabata sòru pa su otro nesesidatnan. Sarah a siña e importansia i goso di sirbi otro hende i a yega di komprendé ku hasta un mucha por hasi un diferensia grandi den bida di un persona.

Mi ta gusta e ehèmpel den e promé kapítulo di Lukas ku ta deskribí e bunita relashon entre Maria, e mama di Hesus, i su prima Elisabeth. Maria tabata un muhé hóben ora el a wòrdu informá di su mishon remarkabel pa ta e mama di e Yu di Dios. Na kuminsamentu lo mester a parse di ta un responsabilidat grandi pa karga su so. Ta Señor mes ta esun ku a duna Maria un persona pa kompartí su responsabilidat. Pa medio di e mensahe di e angel Gabriel, Maria a haña sa e nòmber di un muhé konfiabel i simpátiko na kua e por bai pa sosten—su prima Elisabeth.

E muhé hóben aki i su prima ku tabata di edat grandi,⁴ a kompartí un laso komun den nan embarasonan milagroso, i mi por solamente imaginá kon importante e tres lunanan ku nan a pasa huntu tabata pa tur dos ora nan tabata por a papia huntu, simpatisá ku otro, i sostené otro den nan yamamentunan úniko. Esta un ehèmpel nan ta di nutrishon femenino entre generashonnan.

Esnan di nos ku ta un poko mas bieu por tin influensha tremendo riba e generashonnan mas hóben. Tempu mi mama tabata djis un mucha chikitu, ningun di su mayornan tabata aktivo den Iglesia. Hasta na e edat di sinku aña, e tabata kana su so pa iglesia i bishitá reunionnan di—Primaria, Skol Dominikal, i reunion sakramental—tur na diferente ora.

Resientemente mi a puntra mi mama di kon el a hasi esei durante simannan tras di otro ora e no tabata haña sosten òf estímulo di kas. Su kontesta tabata: “Mi tabatin maestranan di Primaria ku tabata stima mi.” E maestranan aki tabatin kariño p’e i a siñ’é e evangelio. Nan a siñ’é ku e tabatin un Tata den Shelu, ku ta stim’é, i ku tabata nan prekupashon p’e ku a pone ku el a keda bai siman tras i siman. Mi mama a bisa mi, “Esei tabata un di e influensianan di mas grandi den su promé añanan di bida.” Mi ta spera ku un dia lo mi por gradisí e hermanan enkantadó ei! No tin ningun barera di edat ora ta trata di servisio Kristian.

Algun siman pasá, mi a topa ku un presidente di staka di Mujeres Jovenes na California ku a bisa mi ku su mama di 81 aña di edat resientemente a wòrdu yamá pa ta un konsehera di Damitas. Mi a keda intrigá, asina ku mi a bèl su mama. Ora Hermana Val Baker su obispu a puntra pa topa ku n’e, el a spera di wòrdu yamá komo un bibliotekario òf un historiadó di bario. Ora e obispu a puntr’é pa sirbi komo un konsehera di Damitas pa e Mujeres Jovenes, su reakshon tabata, “Bo tin sigur?”

Su obispu a kontestá solemnemente, “Hermana Baker, no kiboká bo; e yamamentu aki ta di Señor.”

El a bisa ku e no tabatin ningun otro kontesta ku eksepto, “Klaro ku si.”

Mi ta gusta e inspirashon e obispu aki a sinti ku e kuater Damitas den su bario tin hopi pa siña di e sabiduria, eksperensia, i ehèmpel di bida largu di e ruman madurá aki. I rei serka ken Hermana Baker lo bai ora ku e tin mester di yudansa pa traha su página di Facebook?

Mi ta pensa riba e gran yudansa ku e rumannan den Sosiedat di Sokoro por ta den duna bon biní na e rumannan ku resientemente tabata serka e Mujeres Jovenes. Nos rumannan hóben ku frekuensia ta sinti komo si fuera nan no ta pertenesé ei i no tin nada komun ku esunnan den Sosiedat di Sokoro. Promé ku nan kumpli 18 aña, nan tin mester di lidernan di Mujeres Jovenes i mamanan ku ke tèstifiká ku alegria di e gran bendishonnan di Sosiedat di Sokoro. Nan mester sinti entusiasmo pa bira parti di un organisashon asina glorioso. Ora hóbennan kuminsá bishitá Sosiedat di Sokoro, lokual nan mester mas tantu ta un amiga pa sinta banda di dje, un brasa rònt di nan skoudernan, un oportunidat pa siña i sirbi. Laga nos aserká pa yuda otro dor di e transishonnan i momentunan importante den nos bida.

Danki na tur e muhénan den Iglesia kende ta aserká otronan sin importá edat pa bendishoná i sirbi otronan. Mujeres jovenes ta sirbi muchanan di Primaria i ansianonan. Rumannan soltero di tur edat ta dediká hopi tempu pa keda alerta pa e nesesidatnan di esunnan rònt di nan. Nos ta rekonosé míles di muhénan hóben ku ta entregando 18 luna di nan bida pa kompartí e evangelio ku e mundu. Tur e kosnan aki ta evidensia ku, manera nos kantika stima ta bisa, “E mandato di angelnan ta wòrdu duná na muhénan.”⁵

Si tin opstákulonan, ta pa motibu ku nos mes a krea nan. Nos mester stòp di konsentrá riba nos diferensianan i wak kiko nos tin en komun; e ora ei nos por kuminsá na realisá nos potensial grandi i logra e bondat di mas grandi den e bida aki. Hermana Marjorie P. Hinkley a bisa un bia, “O, esta mester di otro nos tin. Esunnan di nos ku ta bieu mester di boso ku ta hóben. I ta di spera ku boso ku ta hóben tin mester di nos ku ta bieu. Ta un hecho sosiológiko ku muhénan mester di otro. Nos tin mester di amistatnan profundamente i satisfaktorio i leal ku otro.”⁶ Hermana Hinkley tabatin rason; o, esta mester nos tin di otro!

Rumannan, no tin otro grupo di muhénan den mundu ku tin akseso na bendishonnan mas grandi ku nos tin komo muhénan Santunan di delaster dianan. Nos ta miembronan di Señor su Iglesia, sin importá nos sirkunstansianan individual, nos tur por gosa e bendishonnan kompletu di e poder di saserdosio dor di warda e kombenionan ku nos a hasi na nos boutismo i den tèmpel. Nos tin profetanan bibu pa guia nos i siña nos, i nos por gosa di e gran don di e Spiritu Santu, ku ta sirbi komo un konsolador i ta guia nos bida. Nos ta bendishoná pa traha huntu ku hermanonan rekto ora nos ta fortalesé nos kasnan i famianan. Nos tin akseso na e forsa i poder di ordenansanan di tèmpel i asina tantu mas.

Adishonalmente na disfrutá di tur e bendishonnan magnífiko aki, nos tin—otro hermananan den evangelio di JesuCristo. Nos a wòrdu bendishoná ku kualidatnan tierno i karitativo ku ta permití nos pa duna amor i servisio Kristian na esunnan rònt di nos. Ora nos ta wak mas leu ku nos diferensianan di edat, kultura, i sirkunstansianan pa nutri i sirbi otro, nos lo wòrdu yená ku e amor puru di Kristu i e inspirashon ku ta guia nos pa sa ki ora i kon pa sirbi.

Mi ta ekstendé boso e invitashon ku a wòrdu hasí un bia kaba pa un presidente general di Sosiedat di Sokoro ku a bisa, “Mi ta invitá boso pa no solamente stima otro mas pero pa stima otro mihó.”⁷ Mi ta spera ku nos ta realisá esta kon hopi nos tin mester di otro, i ku nos tur por stima otro mihó, ta mi orashon, den e nòmber di JesuCristo, amèn.