Bo Kuater Minüt
Pa Obispo Gary E. Stevenson
Obispo Presidente
E milager di e Ekspiashon por yuda nos imperfekshonnan durante nos prestashonnan.
E ultimo Weganan Olímpico di Winter a emoshoná e mundu mientras atletanan representando 89 pais a hasi konkurso na 98 diferente eventonan. Notablemente, 10 di e atleta ta miembronan di e Iglesia di JesuCristo di e Delaster Dianan, tres di nan a gana medaya ku a wórdu mentioná resientamente den e Church News: Christopher Fogt, Noelle Pikus-Pace, i Torah Bright.1 Nos ta ofresí nos felisitashonan na tur esnan kende a partisipá. Bon hasí!
Mi ta papia di e weganan aki awe mainta i ta dirigí mi pensamentunan na hómbernan hoben, muhénan hoben, i e soltero adultonan hoben—esnan kende ta den añanan krítiko ku ta forma e kurso di boso bida. Mi ta sinti un sentido grandi di urgensia papiando na bosonan.
Pa bosonan sinti e urgensia ei, mi ta kompartí promé e storia di Noelle Pikus-Pace, un di e atletanan ei ku ta un Santu di e Delaster Dianan. Den e evento di Noelle, e skeleton, atletanan ta subi momento mientras ku nan ta sprint i despues bula den un slee chikitu. Ku na kara hopi serka di e suelu, nan ta baha riba un track yin di bocht i ijs ku un velosidat mas ku 90 miya (145 km) pa hora.
Remarkablemente, añanan di preparashon lo wòrdu konsiderá of un éksito òf un desepshon dependiendo riba kiko ta sosodé durante kuater períodonan intenso di karedanan di 60 sekònde kada un.
Noelle su soñonan Olímpiko di 2006 a kai for di otro ora un aksidente teribel a lag’é ku un pia kibrá. Na e Olimpiada di 2010 su soñonan atrobe tabata inalkansabel ora net un tiki mas ku un désimo sekònde a strob’é di yega e podio di medaya.2
Boso por imaginá e ansiedat ku el a sinti miéntras e tabata wardando pa kuminsá su promé kareda durante e Olimpiada di 2014? Añanan di preparashon lo kulminá den solamente un tempu chikitu. Kuater minüt en total. El a tuma añanan preparando pa e kuater minüt ei i e lo tuma henter su bida despues pa reflehá riba nan.
Noelle su karedanan final tabata kasi perfekto! Nunka nos lo no lubidá su salto pa brasa su famia despues di a krusa e linea final, sklamando, “Nos a logra!” Añanan di preparashon a duna nan fruta. Nos a mira su medayon di Mujeres Jovenes na su garganta ora e medaya di plata a wordu poni einan banda di dj’e.3
E lo por parse inhustu ku tur e deseonan Olímpiko di Noelle a dependé riba loke el a hasi durante djis kuater minüt kortiku. Pero e tabata sa esei, i ta p’esei el a prepará asina diligentemente. El a sinti e magnitut, e urgensia di su kuater minütnan, i loke nan lo nifika pa e restu di su bida.
Nos tambe ta kòrda Christopher Fogt, un miembro di e team ku a gana un medaya di bròns den e kareda di bobslee ku kuater hende homber. Aunke e por a entrega despues di un dalmentu duru durante e Olimpiada di 2010, el a skohe pa perseverá. Despues di un kareda fantástiko i redentadó, el a gana e premio ku el a buska ku tantu diligensia.4
Awor, konsiderá kon boso kaminda na e bida eterno ta similar na “prestashon di kuater minüt” di e atletanan aki. Boso ta un ser eterno. Promé ku boso a nase, boso a eksistí komo spiritu. Den e presensia di un Tata Selestial amoroso, boso a trein i prepará pa bini na mundu pa un momentu kortiku i, wel, presta. E bida aki ta boso kuater minüt. Mientras boso ta aki, boso akshonnan lo determiná si boso lo gana e premio di bida eterno. E profeta Amulek a deskribí, “E bida aki ta e tempu pa hende prepará ba bai serka Dios, si, wak e dia di bida aki, ta e tempu pa …efektuá [boso] obranan.”5
Di un manera, boso kuater minüt a kuminsá kaba. E oloshi ta tik. E palabranan di e Apòstel Pablo ta parse hopi apropiá: pa kore e kareda, pa boso por optené e premio.6
Den e mesun manera ku sierto pasonan ta esenshal durante e prestashon hopi kortiku di un atleta Olímpiko—bulamentunan of maniobranan pa e skidónan di ijs i snowboarders, negoshando e bueltanan di un kareda di bobslee, of tayando entre e portonnan di un kaminda di slalom—asina e ta ku nos bida, kaminda tin sierto kosnan ku ta absolutamente esenshal—punto nan di kontròl ku ta guia nos durante nos prestashon spiritual riba mundu. E markadónan spiritual aki ta e ordenansanan esenshal di e evangelio duná di Dios: boutismo, risibimentu di e don di e Spiritu Santu, ordenansanan di saserdosio, ordenansanan di tèmpel, i partisipashon di e santa sena kada siman.
Den e ordenansanan aki, e poder di Dios ta wórdu manifestá.7
I den e mesun manera ku e disiplína di treining ta prepará un atleta pa efektuá elementnan den nan deporte na e nivel mas haltu, wardando e mandamentunan ta kalifika boso pa risibi e ordenansanan salvadó aki.
Bosonan ta sinti e urgensia?
Mi amigunan hoben, na unda ku boso ta den boso “prestashon di kuater miñut,” mi ta roga bosonan pa pensa, “Kiko mi mester hasi awor pa sigurá mi medaya?” Kisas durante e konferensia aki, e Spíritu a susurá na bosonan kiko e por ta: pa prepará mas pensativo pa un ordenansa den boso futuro of pa risibí un ordenansa ku bosonan mester a risibí hopi tempu pasa kaba. Kual kier kos ku e por ta, hasi’é awor. Boso kuater miñut lo pasa lihé, i boso lo tin eternidat pa pensa riba loke boso a hasi durante e bida aki.8
Outo-disiplina ta nesesario. Orashon diario, studio di skritura, i atendensia na Iglesia mester ta e fundeshi di boso treining. Un patronshi konsistente di wardando e mandamentunan, wardando e konbenionan ku boso a hasí, i siguiendo e standardnan di Señor hañá den For the Strength of Youth ta rekirí.
Kisas boso ta konsiente di kosnan den boso bida ku ta amenasá pa tarda of para boso progreso spíritual. Si e ta asina, sigui e konseho di skritura aki: Laganos pone na un banda kada kargo, i e piká ku ta bini tan fàsil na nos, i laga nos koré ku pasenshi e kaminda ku ta na nos dilanti.9
Ainda e no ta demasiado laat pa arepentí. Pero kisas pronto e lo ta, pasobra ningun hende realmente sa ki ora boso kuater miñut lo ta bai kaba.
Awor, boso por ta ta pensando na boso mes, “Mi a daña kos kaba. Mi kuater minütnan ta un desaster kaba. Mi por lag’é numa.” Si ta asina, stòp di pensa esei, i hamas pens’é atrobe. E milager di e Ekspiashon por kompensá imperfekshonnan den nos prestashon. Manera Elder Jeffrey R. Holland a siña:
“Na esnan di boso …kende kisas ainda ta keda pa’tras, … mi ta testifiká di e poder renobadó di e amor di Dios i e milager di Su grasia. …
“…Nunka e ta demasiado laat mientras ku e Maestro … ta bisa ku tin tempu ainda. … No tarda.”10
Korda, bosonan no ta riba boso so. E Señor a primintí ku E no lo laga boso sin konsuelo.11 Boso tambe tin miembronan di famia, amigunan, i lídernan kende ta animá bosonan.
Aunke e mayoria di mi observashonnan a wòrdu dirigí na e hobennan di Iglesia, pa mayornan i abuelonan, mi ta ofrese lo siguiente:
Resientemente, Elder David A. Bednar a deskribí un manera símpel pa dirigí un éskamen di famia pa wak e progreso riba e kaminda di kombenio dor di ordenansanan esensial. Tur kos ku boso mester ta un papel ku dos kolumna: “nòmber” i “plan pa e ordenansa siguiente of nesesario.” Mi a hasi esaki resientemente, skirbiendo kada miembro di mi famia. Entre nan, mi a nota un nietu infante, ku pronto lo wòrdu bendishoná; otro nietu di seis aña, kende su preparashon pa su boutismo tabata esenshal; i un yu ku pronto lo kumpli 18 aña, kende su preparashon pa e saserdosio i investidura di tèmpel tabata yegando. Tur hende riba e lista tabatin mester di e ordenansa di Santa Sena. E ehersisio simpel aki a yuda Lesa i ami kumpli nos ròl pa yuda kada miembro di nos famia riba e kaminda di kombenio, ku un plan di akshon pa kada un di nan. Kisas esaki ta un idea pa boso ku lo krea diskushon di famia, lèsnan di nochi di hogar, preparashon, i asta invitashonnan pa ordenansanan esenshal den boso famia.12
Komo mi mes ta un skidó i snowboarder, mi tabata profundamente impreshoná ku e prestashon di “kuater minüt” ganadó di e medaya di plata di e atleta Oustraliano Santu di Delaster Dia i snowboarder Torah Bright den e kompetensha di half-pipe. El a deslumbra e mundu miéntras ku el a kaba un kareda kasi perfekto ku a kulminá den un backside rodeo 720. Sinembargo, asta mas impreshonante i sorprendente pa e mundu tabata e manera ku el a ekstende man i a mustra amor di Cristo na su kompetidónan. El a nota ku e snowboarder Amerikano Kelly Clark, ku tabatin un promé kareda malu den su ròndu final, tabata parse nervioso pa su di dos kareda. “El a duna mi un braso,” Clark ta kòrda. “El a djis wanta mi te ora ku realmente mi a kalma sufisiente i mi a baha mi respirashon. Tabata bon pa tin un braso di un amiga.” Kelly Clark mas despues lo djòin Torah Bright riba e podio di ganadó komo medayista di bròns.
Ora nan a puntr’é tokante e akto eksepshonal di bondat na su oponente, lo kual por a riska e medaya di plata di su mes, Torah a respondé simplemente, “Mi ta un kompetidor—mi ke hasi mi bèst—pero mi ke pa mi kompetidornan tambe hasi nan bèst.”13
Ku esaki den mente, tin algun hende ku mester di boso animashon? un miembro di famia? un amigo? un kompañero di klas òf miembro di quorum? Kon boso por yuda nan ku nan kuater minüt?
Amigunan stimá, bosonan ta mei mei di un biahe eksitante. Den algun manera, boso ta bahando e kareda di e half-pipe òf sled track i e por ta difísil pa hasi kada elemento bon òf nabegá kada buèlta riba e kaminda. Pero kòrda, bosonan a prepará pa esaki pa milenionan largu. Awor ta boso momento pa presta. Esaki ta boso kuater minüt! E tempu ta awor mes!!
Mi ta ekspresá tur mi konfiansa den boso abilidatnan. Boso tin e Salbador di mundu pa yuda boso. Si boso ta buska i sigui Su direkshon, kon boso por frakasá?
Mi ta konkluí ku mi testimonio di e bendishon ku nos tin den un profeta bibu, Presidente Thomas S. Monson; i di JesuCristo; i Su ròl komo nos Salbador i Redentor, den Su nòmber sagradu, JesuCristo, amèn.