Hasta ver

Pa Presidente Thomas S. Monson

Ku e Spiritu ku nos a sinti durante e lastu dos dianan aki lo ta i keda ku nos ora nos bai hasi e kosnan ku ta tene nos okupá tur dia.

Mi rumannan, ki konferensha maravioso esaki tabata. Nos a wòrdu alimentá spiritualmente ora nos tabata skucha e palabranan inspirá di e hòmber i muhénan ku a dirigí [nan mes] na nos. E muzik tabata ekselente, e mensahenan a wòrdu prepará i duná bou di inspirashon di e Spiritu Santu, i e orashonnan a laga nos sinti nos mas serka di Shelu. Nos a wòrdu elevá di tur manera ora nos a partisipá huntu.

Mi ta spera ku nos lo tuma e tempu pa lesa e mensahenan di konferensha ora nan wòrdu imprimí den e siguiente edishon di e revistanan di Ensign i Liahona, pasó nan ta meresé nos repaso i estudio kouteloso.

Mi sa ku boso ta uni ku mi pa ekspresá nos sinsero gratitut na e rumannan ku a wòrdu relevá durante e konferensha. Nan a sirbi bon i a duna un kontribushon signifikante na e obra di e Señor. Nan dedikashon tabata kompletu.

Tambe nos a sostené, lantando nos man, rumannan ku a wòrdu yamá na posishonnan nobo di responsabilidat. Nos ta yama nan bonbiní i ke pa nan sa ku nos ta ansioso pa sirbi ku nan den e kousa di e Maestro.

Miéntras ku nos ta reflekshoná riba e mensahenan ku nos a skucha, laga nos ta determiná pa hasi un tiki mihó ku nos a hasi den pasado. Nos mester ta amabel i amoroso ku esnan ku no ta kompartí nos kreensha i nos normanan. Salbador a trese un mensahe den e mundu aki di amor i bon boluntat pa tur hende hòmber i muhé/ Laga nos semper sigui Su ehèmpel.

Nos ta enfrentá hopi desafionan serio den e mundu di awendia, pero mi ta sigurá bosonan ku nos Tata Selestial ta preokupá pa nos. el lo guia i bendishoná nos ora nos pone nos fe i konfiansa den Dje, i lo yuda nos dor di kua difikultat ku nos ta eksperensha.

Ku e bendishonnan di Shelu lo ta ku kada unu di nos. Ku nos hogarnan lo ta yen di amor i kortesia i ku e Spiritu di Señor. Ku nos konstantemente por nutri nos testimonio di e evangelio, ku nan lo ta di protekshon pa nos kontra e bòftanan di e atversario. Ku e Spiritu ku nos a sinti durante e último dos dianan keda ku nos ora nos ta bai hasi e kosnan ku ta [tene] nos okupá tur dia, i ku semper nos lo ta hasiendo e obra di e Señor.

Mi ta duna mi testimonio ku e obra aki ta berdadero, ku nos Salbador ta biba, i ku e ta guia i dirigí Su Iglesia aki na mundu. Mi ta laga ku bosonan mi testimonio ku Dios, nos Eterno Tata ta biba i ta stima nos. E ta [di bèrdat] nos Tata, i E ta personal i real. Ku nos por realisá kon serka di nos E ta dispuesto di bin, kon leu E ta dispuesto di bai pa yuda nos, i kuantu e ta stima nos.

Mi rumannan, ku Dios bendishoná bosonan. Ku Su pas prometé por ta ku boso awor i semper.

Mi ta despedí di boso te ora nos topa atrobe aki seis luna, i mi ta hasi esaki den e nòmber di JesuCristu, nos Señor i Salbador, amèn.