Unda Boso Tesoro Ta

Pa Elder Michael John U. Teh

Di e Setenta

Si nos no tin kuidow, nos lo kuminsá pa desea e kosnan temporal mas ku e kosnan di Dios.

Despues ku mi a papia na konferensia general na 2007, un di mi rumanan a bisa mi ku lo ta bandi shete aña prome ku lo mi tin e eksperiensia difisil aki atrobe. Mi a sinti alibiá i a bisa’le ku mi lo konsidere’le mi “shete aña di abundansia.” Bon, aki mi ta, shete aña di abundansia a yega na su fin.

Januari pasá mi esposa, Grace i a mi a risibi un asignashon pa bishitá e miembronan na Filipinas ken tabata ruiná dor di un teremoto i un typhoon grandi. Nos a regosijá pasobra e asignashon tabata un kontesta riba nos orashon i un testamentu di e miserikorida i bondat di un Tata na Shelu amoroso. El a duna algun logro pa ekspresá personalmente na nan nos amor i preokupashon.

E mayoria di miembronan ku nos a topa ainda tabata biba den refugio temporal manera den tent, sentro komunitario, i kapiyanan di Iglesia. E kasnan ku nos a bishita tabatin un dak parshal of no tabatin dak mes. E hendenan no tabatin hopi kos prome ku e disaster, i e tiki ku nan tabatin a wordu perdἱ. Tabatin lodo i eskombro tur kaminda. Tog, nan tabata yen di gratitut pa e ayuda chikí ku nan a risibí i nan tabata kontentu i den bon spiritu a pesar di nan sirkunstansia difisil. Ora nos a puntrá kon nan tabata dil ku e situashon, tur hende a kontestá ku un definitibo, “Nos ta OK.” Obiamente, nan fe den JesuCristu a duna nan esperansa ku tur kos ebentualmente lo tin bon resultado. Na tur kas, tent, ku Hermana Teh, i ami a bishita, nos a wὸrdu sinjá pa e miembronan fiel aki.

Den tempu di kalamidat of tragedia, e Señor tin un manera pa renfoka nos i nos prioridatnan. Di ripiente, tur e kosnan material ku nos a traha hopi duru pa cumpra no ta importá. Tur loke ta importá ta e famia, i nos relashon ku otronan. Un bon hermana a bisa di e manera aki: “Despues ku e awa a stop di kai i ku e tabata e tempu pa kuminsá limpia, mi a mira rond di mi kas i a pensa, ‘Wow, ma akumulá hopi basura tur e añanan aki.’”

Mi ta sospecha ku e hermana aki a gana un perspektiba mihá i en adelante lo ta mas kuidadoso pa disidí kua kosnan ta nesesario i kua kosnan e por berdaderamente biba sin nan.

Trahando ku hopi miembronan den e añanan, nos ta komplasí di observa un abundansia di forsa spiritual. Nos tambe a mira tantu un abundansia i falta di poseshonan material entre e miembronan fiel.

Dor ku ta nesesario, kasi tur di nos ta involukra pa gana sèn i adquiri algun di e produktonan di mundu pa por ta kapas di sostene nos famia. E ta rekeri un bon parti di nos tempu i atenshon. No tin fin pa loke e mundu tin pa ofrese, pesei e ta kritiko pa nos sinja rekonose ora nos tin sufisiente. Si nos no tin kuidow, nos lo kuminsá pa desea e kosnan temporal mas ku e kosnan di Dios. Nos buskeda pa e spiritual i eterno lo tuma di dos lugá, enbes di ta e prioridat principal. Tristemente, tin un fuerte inklinashon pa adkirí mas i mas i pa kumpra lo ultimo i mas sofistiká.

Kon nos por asegura ku nos no ta wὸrdu tentá den e kaminda aki? Jacob a duna e konseho aki: “Awor anto, no gasta sen na loke no tin balor, ni boso trabou na loke no por trese satisfakshon. Skuchami diligentemente, i kὸrda e palabranan ku mi a papia; i bin na Esun Santu di Israel. I partisipá di loke no ta peresé, ni por wὸrdu korumpí, i laga bo alma deleita den abundansia.¹

Mi ta spera ku niun di nos ta gasta sèn na loke no tin balor ni traha pa loke no por trese satisfakshon.

E Salbador a sinjá e siguiente na tantu e Hudiunan i e Nefitanan:

“No warda pa boso mes tesoronan riba tera, kaminda mot i frus ta korumpí, i ladronan ta kibra drenta i horta:

“Pero warda pa boso mes tesoronan na shelu, kaminda ni mot ni frus ta korumpí, i kaminda ladronan no ta kibra drenta ni horta:

“Pasobra kaminda boso tesoro ta, einan boso kurason lo ta tambe.”²

Den otro okashon, e Salbador a duna e parábola aki:

“E kunuku di un homber riku a duna bon kosecha;

“I el a pensa den su mes, bisando, “Kiko lo mi hasi, pasobra mi no tin luga pa koloka tur mi kosecha?

“I el a bisa, Esaki mi lo hasi: Mi lo tumba mi mangasinanan i traha otro mas grandi ainda, i eiden lo mi pone tur mi kosecha i produkto.

“I mi lo bisa na mi alma, Alma, abo tin hopi produkto reservá pa hopia aña; sosega bo kurpa numa, kome, bebe, i gosa!

“Ma Dios a bis’e, Hende bobo, awe nochi bo mester entrega bo bida: anto di ken e kosnan ku bo a pone un banda lo keda?

“Asina aki ta pasa ku un hende ku ta atesora rikesa pa su mes, ma no ta riku den bista di Dios.”³

Presidente Dieter F. Uchtdorf a duna e siguiente konseho no hopi tempu pasá:

“Nos Tata Selestial ta mira nos potenshal real. E sa kosnan tokante nos ku nos no ta konose di nos mes. E ta inspira nos durante nos tempu di bida pa kumpli ku e proposito di nos kreashon, pa biba un bon bida, i pa bai bek na Su presensia.

“Dikon, anto, nos ta dedika hopi di nos tempu i energia pa kosnan ku ta masha temporal, inkonsequente, i hopi superficial? Nos ta ninga pa mira e insignifikansia den e buskeda di kosnan trivial i temporal?”⁴

Nos tur sa ku nos lista di tesoronan terrenal ta konsisti di orguyo, rikesa, kosnan material, poder, i honornan di homber. Nan no ta merese mas tempu ni atenshon, pesei mi lo enfoka enbes riba e kosnan ku lo konstitui nos tesoronan den shelu.

Kua ta algun di e tesornan den shelu ku nos por warda pa nos mes? Pa kuminsá, e lo ta bon pa nos adquiri e atributonan Cristián di fe, esperansa, humildat i karidat. Nos a wὸrdu konsehá hopi bia pa despohá e homber natural i bira komo un mucha.”⁵ E admonishon di e Salbador ta pa nos esforsa pa ta perfecto manera Dje i nos Tata Selestial.⁶

Di dos, nos mester koloka mas tempu di kalidat i esfuerso den fortalesimentu di relashonan di famia. Na final di kuenta, “e famia ta ordená di Dios. E ta e unidat mas importante den tempu i den eternidat.”⁷

Di tres, servisio na otronan ta un karakteristiko di un berdadero disípulo di Cristu. El a bisa, “al grado ku lo bo a hasi na un di e mas chiki di mi rumannan, boso lo a hasi na Ami.”⁸

Di kuarter, komprenshon di e doktrina di Cristu i fortalesimentu di nos testimonio ta un obra ku lo trese goso real i satisfakshon. Nos mester studia konsistentemente e palabranan di Cristu manera nan ta wὸrdu hanjá den e skrituranan i e palabranan di profetanan bibiente. “Pasobra mira, e palabranan di Cristu lo bisa boso tur loke boso tin ku hasi.”⁹

Lagami konklui ku e historia di una viuda di 73 aña ken nos a topa durante nos biahe na e Filipinas:

Ora ku e teremoto a dal e isla di Bohol, e kas ku e i su esposo fayecido a traha hopi duru pa konstrui, a kai na tera i mata su yu muhe i nietu. Awor e ta su so, i mester a traha pa provee pa su mes. El a kuminsá laba paña (ku e ta laba ku su man) i e tin ku subi i baha den un seru basta haltu hopi bia pa dia pa buska awa. Ora nos a bishete’le, ainda e tabata biba den un tent.

Esaki ta su palabranan: Elder, mi ta asepta tur kos ku e Señor ta pidi pa mi eksperimentá. Mi no tin sentimentunan malu. Mi ta atesora mi rekomendashon di tempel i warde’le abou di mi kusinshi. Por fabor sa ku mi ta paga diesmo kompletu di mi gananshi chiki dor di laba paña. Sin importa loke ta pasa, semper mi lo paga diesmo.”

Mi ta duna mi testimonio ku nos prioridatnan, tendensianan, inklinashionan, deseonan, apetitonan, i pashonan lo tin efecto direkto den nos siguiente estado. Laga nos semper korda e palabranan di e Salbador: “Pasobra kaminda boso Tesoro ta, einan boso kurason lo ta tambe.” Laga nos kurason wordu hanjá den e kaminda korekto ta mi orashon den e nomber di JesuCristu, amen.