E Karga Alegre di Disipulado

Pa Elder Ronald A. Rasband

Di e Presidensia di e Setenta

Pa sostené nos lidernan ta un privilegio; e ta bini kompañá di un responsabilidat personal pa kompartí nan karganan i pa ta disípulonan di Señor.

Riba binti di mei di aña pasá, un tornado masivo a hasi daño na e suburbionan di Suidat di Oklahoma, den e parti sentral di Amérika, destruyendo un área mas ku un punto seis kilometer hanchu i bintishete kilometer largu. E tormenta aki, un number grandi di tornadonan destruktivo, a alterá e paisahe i e bidanan di e hendenan den su kaminda.

Solamente un siman despues ku e tormenta masivo a pasa, mi tabata asigná pa bishitá e área na unda kasnan i pertinensianan tabata plamá rònt di e besindarionan plat, i destruí.

Promé ku mi a bai, mi a papia ku nos profeta stimá, Presidente Thomas S. Monson, ku ta gosa hopi di e tipo di enkargonan aki di Señor. Ku rèspèt duná no solamente pa su ofisio i tambe pa su bondat mi a puntra, “Kiko bo ke pa mi hasi? Kiko bo ke pa mi bisa?

Ku tèrnura el a tuma mi man, manera ku lo el a hasi ku kada un di e víktimanan i kada un di esunnan yudando ku e destrukshon ku tabatin aya, i a bisa:

“Di promé, bisa nan mi ta stima nan.

“Di dos, bisa nan mi ta hasiendo orashon pa nan.

“Di tres, por fabor gradisí tur esunnan ku ta yudando.”

Komo un miembro di e Presidensia di e Setenta, mi por a sinti e peso riba mi skourunan den e palabranan ku e Señor a bisa na Moisés:

“Reuní pa mi setenta hòmber for di e ansianonan di Israel, ku bo sa ku ta ansianonan di e pueblo, i nan lidernan riba nan; …

“I mi lo baha y papia ku bo aya: i lo mi tuma e spiritu ku ta den bo [Moisés], i poné den nan; i nan lo hiba e karga di e pueblo huntu ku bo, di manera ku bo so no tin mester di karg’é.”¹

Esakinan ta palabranan di tempunan antiguo, sinembargo Señor su maneranan no a kambia.

Aktualmente den Iglesia, Señor a yama treshentidieshete Setenta, sirbiendo den ocho quorum, pa asistí e Diesdos Apòstelnan den hibamentu di e karganan poné riba e Promé Presidensia. Ku alegria mi ta sinti e responsabilidat aki den profundidat di mi alma, meskos ku mi Hermanonan. Sinembargo nos no ta e úniko nan ku ta asistí den e obra glorioso aki. Komo miembronan di Iglesia mundialmente, nos tur tabatin e oportunidat maravioso pa bendishoná e bidanan di otronan.

Mi a siña for di nos profeta stimá kiko e hendenan afektá pa e tormenta tabatin mester—amor, orashon, i apresio pa mannan ku ta yuda.

E atardi aki kada un di nos lo lanta nos man drechi na haltu i sostené e Promé Presidensia e Quorum di e Diesdos Apòstelnan komo profetanan, videntenan, i reveladónan di E Iglesia di JesuCristo di e Santunan di e Delaster Dianan. Esaki no ta simplemente un formalidat,tampoko e ta reservá pa esunnan yamá pa sirbi komo outoridatnan general di Iglesia. Ta un privilegio pa nos sostené nos lidernan; e ta bini huntu ku un responsabilidat personal pa kompartí nan karga i pa ta disípulonan di Señor JesuCristo.

Presidente Monson a bisa:

“Nos ta rondoná pa esunnan den nesesidat di nos atenshon, nos stimulashon, nos sosten, nos konsuelo, nos amabilidat—sea ku nan ta miembronan di famia, konosínan, òf stranheronan. Nos ta e mannan di Señor aki riba mundu, ku e mandato pa sirbi i pa elevá Su yunan. E ta dependiente di kada un di nos. …

“‘… Tur kos ku boso a hasi pa un di ménos importansia … , boso a hasié na ami’ [Mateo 25:40].”²

Nos lo respondé ku amor ora un oportunidat ta presentá na nos pa hasi un bishita, hasi un yamada, skibi un nota, òf pasa un dia pa kumpli ku un otro hende su nesesidatnan? Òf nos lo ta manera e hòmber yòn ku a ta testiguá di sigui tur Dios su mandamentunan:

“Mi a tenemi na tur e kosnan aki for di mi hubentut: kiko mi falta ainda?

“Jesus a bisé, Si bo ke ta perfekto, bai i bende tur kos ku bo tin, i duna na e pober, i lo bo haña tesoro den shelu: i bini i sigui mi.”³

E hòmber yòn tabata wòrdu yamá pa un servisio mas grandi na banda di Señor pa hasi e obra di e reino di Dios na tera, sinembargo el a bira bai, “pasobra e tabatin hopi poseshon.”⁴

Kiko di nos poseshonnan mundano? Nos por mira kiko un tornado por hasi ku nan den djis un par di minüt. Ta masha importante pa kada un di nos pa hasi esfuerso pa montoná tesoronan spiritual den shelu—usando nos tempu,talentonan, i nos albedrio den servisio di Dios.

JesuCristo ta sigui ekstendé e yamada “Bini i sigui mi.”⁵ El a kana rònt riba Su pais ku su siguidonan den un manera desinteresá. E ta sigui kana huntu ku nos, para huntu ku nos, i ta guia nos. Pa sigui Su ehèmpel perfekto ta pa rekonosé i honra e Salbador, ku a sufri tur nos karganan pa medio di Su Ekspiashon sagrado i salbadó, e akto supremo di servisio. Lokual e ta pidi di kada un di nos ta pa ta apto i dispuesto pa tuma e “karga” alegre di disipulado.

Miéntras mi tabata na Oklahoma, mi tabatin e oportunidat pa reuní ku algun di e famianan ruiná pa e tornadonan poderoso. Ora mi tabata di bishita serka e famia Sorrels, mi tabata partikularmente konmoví pa e eksperensia di nan yu muhé, Tori, e tempu ei e tabata studiante di klas sinku na Skol Básiko Plaza Towers. E ku su mama ta aki ku nos awe.

Tori i un man yen di su amigunan a buk huntu den baño pa skonde ora e tornado tabata destruí e skol. Skucha ora mi ta lesa, den Tori su mes palabranan, e relato di e dia ei:

“Mi a tende un kos dal e dak. Mi a pensa ku tabata simplemente hagel. E sonido a bira mas i mas duru. Mi a hasi un orashon pa Tata Selestial por protehá nos tur i tene nos safe. Diripiente nos a tende un sonido duru manera di un stòfzùiger, i e dak a disparsé dirèkt riba nos kabes. Tabatin hopi bientu i ruina bulando rònt i dal tur parti di mi kurpa. Pafó tabata mas skur i tabata parse ku e shelu tabata pretu, pero no tabata asina—tabata e paden di e tornado. Mi a simplemente sera mi wowonan, sperando i hasiendo orashon ku lo e pasa pronto.

“Diripiente tabata ketu.

Ora mi a habri mi wowonan, mi a mira un bòrchi ku señal pa stòp presis dilanti mi wowonan! E tabata mishi kasi ku mi nanishi.”⁶

Tori, su mama, tres di su rumannan, i kantidat grandi di amigunan tambe tabata den e skol ku n’e, milagrosamente a sobreviví e tornado; shete otro kompañero di skol no.

E wikènt ei e rumannan si saserdosio a duna hopi bendishon na miembronan ku a sufri den e tormenta. Mi tabata humilde pa duna Tori un bendishon. Ora mi a pone mi mannan riba su kabes, mi tabata pensa di un skritura favorito unda Señor ta bisa nos ku E lo bai dilanti nos kara, ku E lo ta na nos man drechi i na nos man robes i Su spiritu lo ta den nos kurason, i Su angelnan rònt di nos pa sostené nos.⁷

Mi a konsehá Tori pa kòrda e dia ora un sirbidó di Señor a pone su mannan riba su kabes i a pronunsiá ku el a wòrdu protehá pa angelnan durante di e tormenta.

Duna man pa reskatá otro, durante kualke kondishon, ta un midí eterno di amor. Esaki ta e servisio ku mi a presensiá na Oklahoma e siman aya.

Hopi biaha, e oportunidat ta wòrdu duna na nos pa yuda otronan den nan tempu di nesesidat. Komo miembronan di Iglesia, kada un di nos tin e responsabilidat sagrado”pa aliviá otro su karganan, pa nan por ta lihé,”⁸ “pa rou ku esunnan ku ta rou,”⁹ pa lanta e mannan ku ta kologá abou, i fortalesé e rudianan suak.”¹⁰

Rumannan, Señor ta hopi agradesido pa kada un i boso tur, pa e oranan i aktonan di servisio inkontabel, sea grandi òf chikitu; ku boso ta duna generosamente i ku miserikòrdia kada dia.

Rei Benjamin a siña den e Buki di Mormon, “Ora bo ta den sirbishi di bo próhimo bo ta únikamente den sirbishi di Dios.”¹¹

Pone énfasis na sirbimentu di nos rumannan por guia nos pa tuma desishonnan dibino den nos bida diario i ta prepará nos pa duna balor i stima lokual Señor ta stima. Ora nos hasi esaki, nos ta testigu di nos mes bidanan ku nos ta Su disípulonan. Ora nos ta okupá den Su obra, nos ta sinti Su Spiritu huntu ku nos. Nos ta krese den testimonio, fe, konfiansa, i amor.

Mi sa ku mi Redentor ta biba, JesuCristo; ku E ta papia ku i pa medio di Su profeta, estimado Presidente Thomas S. Monson, den esaki, nos dianan.

Mi ta spera ku nos tur lo haña e alegria ku ta bini for di e servisio sagrado di aliviá otronan su karga, hasta esunnan simpel i chikitu, ta mi orashon den e nòmber di JesuCristo, amèn.