E Generashon di Eskoho

Pa Randall L. Ridd

Di Dos Konsehero di e Presidensha General di Hombres Jovenes

Bosonan a wòrdu skohé pa partisipá den Su Obra den e tempu aki pasó e ta konfia ku boso lo tuma e bon desishon

Hóbennan, probablemente bosonan a yega di tende ku bosonan ta un “generashon eskohí”, loke ta nifiká ku Dios a skohe i prepará boso pa bin mundu den e tempu aki pa un gran propósito. Mi sa ku esaki ta bèrdat. Sinembargo e anochi aki, lo mi ke dirigí mi mes na boso komo e “generashon di eskoho” pasó nunka ántes den historia e hendenan tabata asina bendishoná ku asina tantu eskoho. Mas eskoho ta nifiká mas oportunidat, mas oportunidat ta nifiká mas potensial pa hasi bon i, lástimamente, hasi malu. Mi ta kere ku Dios a manda bosonan aki den e tempu aki pasó E ta konfia ku boso korektamente lo diserní den e asombroso eskohonan disponibel.

Den 1974 Presidente Spencer W. Kimball a bisa, “mi ta kere ku e Señor lo ta ansioso pa pone na nos disposishon inventonan ku nos komo laiko ni sikiera por a imaginá nos” (“When the World Will Be Converted,” Ensign, Okt. 1974, 10)

I El a hasi esaki! Bosonan ta kresiendo ku un di e instrumentonan pa bon di mas grandi den e historia di hende: E Internet. Ku n’e ta bin un bufèt di eskoho. E abundansha di eskoho, sinembargo, ta trese ku n’e un porshon igual di responsabilidat. E ta fasilitá boso akseso na tantu e mihó komo e pió ku mundu ta ofresé. Ku esaki lo bo por logra kosnan grandi den un periodo kòrtiku òf bo por kai den un sirkulo sin fin di kosnan di ménos importansha ku ta laga bo pèrdè bo tempu i disminuí bo potensial. Dor di tek un kònòpi bo por tin akseso hopi lihé i efikas na loke bo kurason ta deseá. Esei ta e yabi—Kiko bo kurason ta deseá? Kiko ta loke ta atraé bo? Na unda bo deseonan ta kondusí?

Kòrda ku Dios “ta duna na hòmbernan konforme nan deseo” (Alma 29:4) i ku E “lo husga tur homber di akuerdo ku nan obra, di akuerdo ku e deseonan di nan kurason” (D&C 137:9; wak tambe Alma 41:3)

Elder Bruce R. McConkie a bisa: “Den un sentido figurativo, pero real, e buki di bida ta un registro di e aktonan di hende manera esaki ta registrá den nan mes kurpa. Esei ta, kada pensamentu, palabra i akto ku tin un [efekto] riba e kurpa humano; tur esakinan ta laga nan markanan, markanan ku por wòrdu lesá dor di Dje, ku ta eterno, mes fásil ku e palabranan di un buki por wòrdu lesá.” (Mormon Doctrine, di dos edishon. [1966], 97)

E Internet tambe ta registrá bo deseonan, ekspresá den e forma di loke bo ta buska òf loke bo ta habri. Tin legionnan sperando pa kubri e nesesidatnan ei. Segun bo ta sùrf riba Internet, bo ta laga evidensia atras—loke ku bo ta komuniká, riba kua página bo tabata, kuantu tempu bo a keda riba esaki, i e tipo di kosnan ku ta interesá bo. Di e manera aki, e Internet ta krea un profil sibernétiko pa bo—den un sentido, bo ”buki di bida sibernétiko.” Meskos ku den bida, e Internet lo duna bo bèk mas i mas di loke bo ta buska. Si bo deseonan ta puru, e Internet lo magnifiká nan, hasiendo e hopi mas fásil pa entamá [un] búskeda digno. Sinembargo, e kontrali tambe ta bèrdat.

Elder Neal A. Maxwell ta pone asina aki:

”Loke nos ta deseá insistentemente, segun tempu, ta loke nos finalmente lo bira i ta loke nos lo risibí den eternidat. …

”… Solamente dor di edukashon i treinen nos deseonan lo por bira nos aliado na lugá di nos enemigu!” (“According to the Desire of [Our] Hearts,” Ensign, Nov. 1996, 21, 22)

Mi rumannan hóben, si bosonan no ta proaktivo den edukashon di boso deseonan, e mundu lo hasié pa bo. Tur dia, e mundu ta buska pa influenshá boso deseonan, tentando boso pa kumpra algu, primi un boton, hunga algu, lesa òf wak algu. Finalmente e desishon ta di bosonan. Boso tin e albedrio. E ta e poder pa no solamente aktua riba boso deseonan, pero tambe pa refiná, purifiká i elevá boso deseonan. Albedrio ta boso poder pa bira [loke boso ke bira]. Kada desishon ta hiba boso mas serka na òf distansia nan di loke bo mester a bira. Semper puntra bo mes, ”na Unda e eskoho aki lo kondusí?” Desaroyá e abilidat pa mira mas leu ku e momento [aki].

Satanas ke kontrolá bo albedrio, pa asina e kontrolá kiko bo ta bai bira. E sa ku un di e mihó manera pa hasi esaki ta pa gara bo den un komportashon adiktivo. Bo eskoho ta determiná si teknologia lo duna bo forsa òf sklavisá bo.

Permití mi ofresé kuater prinsipio pa yuda boso, e generashon di eskoho, eduká boso deseonan i guia boso uso di teknologia.

Promé: Si Bo Sa Ken Bo Ta Di Bèrdat Ta Hasi Desishonnan mas Fásil

Mi tin un amigu ku a siña e bèrdat aki di un manera masha personal. Su yu a lanta den Evangelio, pero tabata parse di tabata dualu spiritualmente. Frekuentemente e tabata nenga oportunidatnan pa ehersé e Saserdosio. Su mayornan tabata desapuntá ora el a deklará ku el a disidí di no bai sirbi un mishon. Mi amigu a resa sinseramente pa su yu, sperando ku e lo haña un kambio di kurason. E speransanan ei a wòrdu distruí ora e yu a anunsiá ku e tabata komprometé pa kasa. E tata a supliká su yu pa buska su bendishon patriarkal. Finalmente e yu a bai di akuerdo, pero a insistí di bishitá e patriarka su so.

Ora el a regresá despues di e bendishon, e tabata hopi emoshoná. El a kue e man di su novia i a bai ku n’e pafó kaminda e por a papia ku n’e den priva. E tata tabata lur dor di bentana pa wak kon e pareha hóben tabata seka e lágrimanan di otro.

Despues el a kompartí ku su tata loke a pasa. Ku gran emoshon el a splika ku durante di e bendishon el por a tira un mirada di ken e tabata den e bida premortal. El a mira kon balente i influyente e tabata konvensiendo otronan pa sigui Cristu. Sabiendo ken e tabata di bèrdat, kon e por keda sin sirbi un mishon?

Hóbennan, kòrda ken bosonan ta di bèrdat. Kòrda ku boso tin e Saserdosio Sagrado. Esaki lo inspirá boso pa tuma desishonnan ora bo ta usa e Internet i den boso bida.

Di Dos: Konektá ku e Fuente di Poder

Den palma di bo man mes, bo tin e sabidoria di añanan—mas importante ainda, e palabranan di e profetanan, di e tempu di Antiguo Tèstamènt te na Thomas S. Monson. Pero si bo no karga bo selular, e ta inútil, i bo ta sinti bo pèrdí i sin komunikashon ku otro. Lo bo no pensa pa pasa ni un dia sin karga bo bateria.

Mes importante ku ta pa sali kas tur dia ku bo telefon kompletamente kargá, e ta mas importante pa ta kompletamente kargá spiritualmente. Kada biaha ku bo konektá bo selular, us’é komo rekordatorio pa puntra bo mes si bo a konektá den e fuente di mas importante di poder spiritual—orashon i estudio di skritura, ku karga bo ku inspirashon dor di e Spiritu Santu. (wak D&C 11:12–14). E lo yuda bo pa sa e deseo i boluntat di e Señor, pa tuma desishon chikitu pero importante ku ta determiná bo direkshon. Hopi di nos inmediatamente ta para kiko ku nos ta hasiendo, pa lesa un mensahe di teksto—nos lo no tin ku pone mas atenshon ainda na mensahenan mas importante di e Señor?Neglishá pa konektá na e poder aki, mester ta algu inpensabel pa nos (wak 2 Nefi 32:3)

Di Tres: Tin Un Telefon Inteligente No Ta Hasi Abo Inteligente, pero Us’é ku Sabiduria [Si] Por

Hóbennan, no hasi kosnan bobo ku bo telefon inteligente. Boso tur sa kiko mi ker men (wak Mosia 4:29). Tin un kantidat di manera kon teknologia por distraí bo di loke ta mas importante. Sigui e proverbio ”Yega einan, ora bo mester ta einan.” Ora bo ta kore outo, kore outo. Ora bo ta den klas, enfoká riba e lès, Ora bo ta ku bo amigunan, duna nan e don di bo atenshon. Bo mente no por konsentrá riba dos kos na e mes momento. Hasiendo diferente tarea na e mes momento realmente ta nifiká ku bo ta kambia bo enfoke rápidamente di un kos riba pa e otro. Un proverbio bieu ta bisa, ”Si bo pèrsigui dos konènchi, bo no ta kue niun.”

Di Kuater: E Señor ta Proveé Teknologia pa Kumpli ku Su Propósitonan

E propósito divino di teknologia ta pa aselerá e obra di salbashon. Komo miembronan di e generashon di eskoho, boso ta komprondé teknologia. Us’é pa aselerá bo progreso pa perfekshon. Pasó boso a risibí hopi, boso mester duna tambe (wak ”Tu me has dado muchas bendiciones Dios, Himno 137). E Señor ta spera pa boso usa e instrumentonan poderoso aki pa hiba su obra na e siguiente nivel, pa kompartí e Evangelio na manera ku ta bai mas leu ku mi generashon ni por a soña. Kaminda generashonnan pasá tabata influenshá nan bisiña i nan suidat, bosonan tin e poder dor di Internet i media sosial pa yega mas leu ku e fronteranan i influenshá hinter e mundu.

Mi ta testifiká ku esaki ta Señor Su Iglesia. Bosonan a wòrdu eskohé pa partisipá den Su obra den e tempu aki, pasó E ta konfia ku boso ta hasi e bon eskohonan. Boso ta e generashon di eskoho. Den e nòmber di JesuCristu, amèn.