Warda Kombenionan ta Protehá Nos, ta Prepará Nos, i ta Fakultá Nos

Pa Rosemary M. Wixom

Presidenta General di Primaria

Imagen

Nos ta hende muhé di tur edad ku ta hasi kombenionan kanando riba e kaminda di mortalidat regresando na Su presensia.

O, hermananan, nos ta stima boso. Mientras mi tabata bishitando Mehiko resien, mi tabatin un mirada chikitu di e hermandat ku nos tur ta sinti awe nochi. Imagina e escena. Nos a net kaba ku Primaria riba un Diadomingu mainta, i e muchanan, maestronan, i ami tabata saliendo den e pasiyo yen di hende. Net na e momento ei e porta di e klas di e Mujeres Jovenes a habri, i mi a wak e muhénan hoben i nan lidernan. Nos tur a extende man pa un abraso. Ku e muchanan wantando mi saya i e muhénan serka di mi, mi kiera ekspresa e sentimento ku mi a sinti na e momento ei.

Mi no ta papia Spañol, asina ku palabranan Ingles a drenta mi mente. Mi a mira den tur i nan karanan i bisa, “Nos ta yunan muhé di nos Tata Selestial, kende ta stima nos, i nos ta stima E.” Di biaha nan tur a uni ku mi, na Spañol. Einan nos tabata den un pasiyo yen di hende, resitando huntu e lema di Mujeres Jovenes mientras ku nos a bisa, “Nos lo para komo testigunan di Dios na tur tempo i den tur kos, i na tur lugá.”

Awe nochi nos ta reuní huntu tur ront di mundo, komo Su disipelnan, ku e deseo pa defende i sostene e reino di Dios. Nos ta yunan muhé di nos Tata Selestial. Nos ta hende muhé di tur edad ku ta hasi kombenionan kanando riba e kaminda di mortalidat regresando na Su presensia. Warda kombenionan ta protehá nos, ta prepará nos, i ta fakultá nos.

Tin muchanan muhé entre nos awe nochi ken ta di edad di Primaria. Algun di boso recien a tuma e prome stap riba e kaminda na bida eterno ku e ordenansa di boutismo.

Mira rond di boso. E futuro ta briyante ora boso ta mira muhénan ken tambe a hasi kombenionan i ta kla pa munstra boso e manera kon pa sigui dilanti riba e kaminda ei.

Si bo tin 8, 9, 10, of 11 aña, si ta aki na e Sentro di Konferensia, na bo kas, of na un kapiya rond mundo, por fabor lanta para! Bon bini na e reunion general di hende muhé. Awor, por fabor keda para pasobra nos kier invita boso awe nochi pa kontribuí. Mi ta bai tararea un kantika di Primaria. I manera boso ta rekonose e kantika, boso lo kuminsa kanta ku mi? Awor, bo mester kanta duru pa tur hende por skucha.

Siña mi pa kana den e lus di su amor;
Siña mi pa hasi orashon na mi Tata ariba;
Siña mi pa sa di e kosnan ku ta korekto;
Siña mi, siña mi pa kana den e lus.

Keda pará, muchanan muhé, mientras ku tur hende 12 aña pariba awor ta kanta e di dos verso.

Bini, mucha chikitu, i huntu nos lo siña
Tokante su mandamentunan, pa asina nos por regresa
Bek na su presensia, pa biba den su vista—
Semper, semper pa kana den e lus.1

Esei tabata bunita. Boso por sinta awor. Masha Danki.

Komo hende muhé di kada edad, nos ta kana den Su lus. Nos biahe riba e kaminda ta personal i bon sendí ku e Salbador su amor.

Nos ta drenta e porton na e kaminda di bida eterno ku e ordenansa i kombenio di boutismo, i depues nos ta risibi e don di e Spiritu Santu. Elder Robert D. Hales ta puntra nos, si nos ta kompronde i si nos yunan ta kompronde ku ora nos ta wòrdu boutisa nos ta kambia pa semper?

E tambe ta splika ku ora nos ta kompronde nos kombenio boutismal i e don di e Spiritu Santu, e lo kambia nos bidanan i lo establesé nos lealidat kompletu na e reino di Dios. Ora tentashonnan ta bini serka nos, si nos lo tende, e Spiritu Santu lo korda nos ku nos a priminti pa korda nos Salbador i pa obedese e mandamentunan di Dios.²

Kada siman ora nos ta tuma di e emblemanan di e santa sena, nos ta renobá nos kombenio boutismal. Elder David A. Bednar a bisa ku ora nos ta para den e awanan di boutismo, nos ta mira na e tempel. Ora nos ta tuma di e santa sena, nos ta mira na e tempel. Nos ta priminti pa semper korda e Salbador i pa warda Su mandamentunan preparando pa partisipa den e sagrado ordenansanan di e tempel.³

Ordenansanan di tempel ta hiba nos na e bendishonnan mas grandi disponibel dor di e Expiashon di JesuCristo. Nan ta e ordenansanan nesesario pa nos ekshaltashon den e reino selestial. Mientras ku nos ta trata di warda nos kombenionan, nos sentimentunan di inadekuasia i imperfekshon ta kuminsa kita, mientras ku e ordenansanan i e kombenionan di e tempel ta bini na bida. Tur hende ta bon bini pa kana e kaminda ei na bida eterno.

Mi ta asombrá di e forsa di e muchanan muhé, e muhénan hoben, i i muhénan adulto mi a topa rond mundu kendenan pianan ta firmamanete plantá riba e kaminda aki. Lagami komparti algun ehempelnan di e muchanan muhé i e muhénan di kombenio ku mi a topa.

Luana tabatin 11 aña ora mi a bishita su famia na Buenos Aires, Argentina. Dor di un eksperensia traumatiko den su niñez, Luana no tabata por papia. E no a papia pa hopi aña. El a sinta silensiosamente mientras nos tur tabata konbersa. Mi tabata spera asta un susuro chikitu for di dje. E la mira mi intentamente manera si e no tabata nesesario pa bisa algu pa mi konose su kurason. Despues di un orashon, nos a lanta para pa bai, i Luana a duna mi un pintura. El a pinta JesuCristo den e hòfi di Getsémani. Na e momentu ei mi a rekonose su testigu fuerte i kla. Luana a hasi un kombenio na su boutismo pa para komo testigu di Dios “na tur tempu, i den tur kos, i na tur lugá.”⁴ El a kompronde e Ekspiashon di JesuCristo, manera a wòrdu testifiká dor di su pintura. El a haña sa ku dor di e poder fortalesando i fakultadò di e Ekspiashon, e por wordu kurá i papia atrobe? Desde e dia ei tres aña pasa, Luana a progresá den su esfuersonan pa papia. Awor e ta partisipando den Mujeres Jovenes huntu ku su amiganan. Fiel na e kombenio ku el a hasi na su boutismo, e ta kontinuá komparti su testigu di e Salbador.

Hobennan tur kaminda rond mundo ta atraé na tempelnan. Na Lima, Peru, mi a topa un tata i tres di su yunan muhé afo di e entrada di e tempel. Mi a mira e lus din nan kara. Dos di e yunan muhé tabata severamente diskapasitá i sintando den rolstoel. E di tres yu muhé, mientras atendiendo na e nesesidatnan di su rumannan, a splika ku e tin dos ruman muhé mas na kas. Nan tambe tabata din rolstoel. Nan no tabata por biaha e 14 ora na e tempel. E tempel a nifika asina tantu na e tata aki i su yunan ku kuater di nan a bini na tempel e dia ei—dos di nan simplemente pa observa esun ku tabata por wordu boutisa pa e mortonan i hasi e sagrado ordenansa ei. Manera Nefi, nan a “[deleita] den e kombenionan di Señor.”⁵

Un muhé soltero mi konose ta balorá e ordenansa semanal di e santa sena i su sagrado promesa “ku [e] por tin su Spiritu huntu ku n’e.”⁶ E kompañerismo konstant ta un promesa ku ta suavisá e olanan di su soledat. E ta dun’e forsa pa sumergi su mes den desaroya su talentonan i un deseo pa sirbi Señor. El a diskubri gran goso adorando tur e muchanan den su bida, i ora e ta buska pas sereno, bo lo hañ’e den tempel.

Ultimo, un muhé mayor den su 90 añanan a observa su yunan i nietonan lanta i su bisnietonan bini na e mundo. Manera hopi di nos, e tabatin un bida yin di pesar, aflikshon, i goso inkomprendibel. E ta admiti ku si e tabata di skirbi su storia di bida di nobo, e lo no skohe pa inkluí algun di e kapitulonan ku a wordu skirbí. Tog, ku un sonrisa, e ta bisa, “Mi djis mester biba un tiki mas largu pa mi mira kon tur kos ta bai sali!” E ta kontinuá pa wanta duro na e kombenionan riba e kaminda.

Nefi a siña:

“Despues ku boso a drenta e kaminda smal i règt aki, ami lo puntra si tur kos ta kla? Ata’ki, mi ta bisa boso, Nò: …

“Asina ku, boso mester pusha dilanti ku un firmesa den Cristo, mustrando un puresa perfekto di speransa, i un amor pa Dios i pa tur hende. Di manera ku, si boso pusha dilanti, alimentando boso ku e palabra di Cristo, i perseverá te na fin, ata, asina e Tata ta bisa: Boso lo tin bida eterno.”⁷

Kada un di nos ta riba e kaminda ei. Awe nochi nos a kanta tokante di kana riba e kaminda den e lus. Komo sernan individual, nos ta fuerte. Huntu ku Dios, nos ta imparabel.

Señor a bisa Emma Smith pa e lanta su kurason i regosiha, i wanta na e kombenionan ku e la hasi.⁸

Nos ta regosiha ku dor di wanta nos kombenionan nos por sinti e amor di nos Tata Selestial i nos Salbador, JesuCristo. Mi ta testifika ku Nan ta biba. Den e nomber di JesuCristo, amen.