E Testigu

Pa Presidente Boyd K. Packer

Presidente di e Quorum di e Diesdos Apòstelnan

Mi ke kompartí ku boso e bèrdatnan ku tin mas balor pa sá.

Tempunan di gera òf di insertidumbre tin un manera di duna nos mas enfoké riba kosnan ku realmente ta di importansha.

Di Dos Gera Mundial tabata un tempu di gran komoshon spiritual pa mi. Mi a sali mi hogar for di e suidat di Brigham na Utah ku solamante un pida testimonio i a sinti e nesesidat di algu mas. Mientras ku mi tabata basá riba e isla di Ie Shima, djis nòrt di Okinawa, Hápón, mi a lucha kontra di duda i insertidumbre. Mi tabata ké un testimonio personal di e evangelio. Mi ker a sá!

Duranti di un anochi sin por a drumi, mi a sali mi tènt i drenta un refugio bo’i tera ku a wòrdu formá dor di a pone barí di 190 liter yená ku santu riba otro pa forma un muraya. No tabata tin un dak, djis mi a gatiá i drenta adén, mira ariba na shelu yená ku strea, i a kai na rudia pa hasi orashón.

Mei mei di mi orashon e la yega. Mi no por diskribí na boso kiko a pasa aunke si mi lo ta determiná pa hasi esei. E ta mas grandi ku mi poder di expreshon, pero e ta klá awe manera e tabata e anochi ei mas ku 65 aña pasá. Mi sá ku esaki tabata un manifestashon privá i hopi individual. Por fin mi por a sá pa mi mes. Mi tabatasá ku siguransa, pasombra e la wòrdu duná na ami. Despues di algún tempu, mi a gatia f’oi dje refugio bo’i tera i a kana òf drijf bèk na mi kama. Mi a pasa sobrá di e anochi den un sentimentu di gozo i asombro.

Na lugá di pensa ku ami tabata un persona spesial, mi a pensa ku si algu asina aki a bini na ami, ku tambe e por bini na kualke otro persona. Ainda mi ta kere esaki. Den añanan ku a sigi, mi a yega di komprondé ku un experensia askina ki ta inmediatamente un lus pa sigi i un karga pa kana ku né.

Mi ke kompartí ku boso e bèrdatnan ei ku ta mas importante pa sá, e kosnan ku mi a siña i experensiá den kasi 90 aña di mi bida i di mas ku 50 aña komo Autoridat General. Hopi di loke ku mi a yega di sá ta kai den e kategoria di kosnan ku no por wòrdu siñá na un persona pero ku e persona por yega di siña.

Manera mayoria di kosnan di gran balor, konosimentu di kual tin balor eterno, solamente ta bini pa medio di orashon personal i meditashon. Esakinan, uní ku ayuno i estudio di eskritura, lo invitá impreshonan i revelashonan i e susuro di e Spiritu Santu. Esaki ta proveé nos ku instrukshon di altura mientras ku nos ta siña poko poko.

E revelashonan ta primintí ku “kuakle prinsipio di inteligensia ku nos obtené den e bida aki, lo lanta ku nos den e resurekshon” i ku “konosimentu i inteligensia [ta wòrdu ganá] dor di … diligensia i obediensia” (D&C 130:18–19).

Un bèrdat eterno ku mi a yega di sá ta ku Dios ta bibu. E ta nos Tata. Nos ta Su yunan. “Nos ta kere den Dios, e Tata Eterno, i den Su Yu, JesuCristu, i den e Spiritu Santu” (Artikulonan di Fe 1:1).

Di tur e titulonan ku E por a usa, El a skohe pa e wòrdu jamá “Tata.” E Salvador a manda, “Di e manera aki anto boso hasi orason: Nos Tata ku ta na shelu” (3 Nefi 13:9; wak tambe Mateo 6:9). Su uso di e nòmber “Tata” ta un lès pa tur mientras ku nos ta yega na komprondé ta kiko ta loke ku tin mas balor den nos bida.

Paternidat ta un privilegio sagrado, i segun nos fieldat, e por ta un bendishon eterno. E meta prinsipal di tur aktividat den Iglesia ta pa kada hòmber i su kasá i nan yunan por ta felis na nan hogar.

Esnan ku no por kasa òf ku no por haña yu no ta wòrdu exkluí for di e bendishonan eterno ku nan ta buska pero di kual, awor aki, ta fo’i nan alkanse. No ta semper nos sá kon, òf ki ora e bendishonan lo presentá nan mes, pero e promesa di inkremento eterno lo no wòrdu ningá na ningun individuo fiel ku ta hasi i warda konvenionan sagrado.

Komo un siervo di Señor, aktuando den e ofishi di kual mi a wòrdu ordená, mi ta duna esnan ku ta den sirkunstansianan asina ei un promesa ku lo no tin nada esensial pa bo salvashon i exaltashon ku lo no sosegá riba boso na e momentu debí. Manan bashí lo wòrdu jená, i kurasonan ku aworaki ta heridá dor di soñonan i anhelonan kibrá lo wòrdu saná.

Otro bèrdat ku mi a yega di sá ta ku Spiritu Santu ta real. E ta e di tres miembro di e Deidat. Su mishon ta di testifiká di bèrdat i rektitut. E ta manifestá Su mes den hopi forma, inklujendo sentimentunan di pas i di seguranza. Tambe e por trese konsolashon, gia, i korekshon kaminda ta nesesario. E kompañerismo di e Spiritu Santu ta wòrdu mantené hinter nos bida pa medio di bibando un bida rekto.

E don di e Spiritu Santu ta wòrdu konferí dor di un ordenanza di evangelio. Un persona ku autoridad ta pone su manan riba e kabes di un miembro nobo di Iglesia i ta bisa palabranan asinaki: “Risibí e Spiritu Santu.”

E ordenanza aki solamente no ta kambia nos den un forma notabel, pero si nos skucha i sigi e inspirashon, nos lo risibí e bendishon di e Spiritu Santu. Kada yu hòmber òf mué di nos Tata Selestial por yega di sá e realidat di e promesa di Moroni: “Pa e poder di Spiritu Santu boso por sá e bèrdat di tur kos” (Moroni 10:5; emfasis añadi).

Un bèrdat divino ku ami a gana den mi bida ta mi testimonio di Señor JesuCristo.

Prinsipalmente i susteniendo tur kos ku nos ta hasi, basá riba e revelashonan, ta e nòmber di Señor, ku ta e autoridad di kual nos ta aktua den Iglesia. Kada orashon ofresí, hasta dor di mucha chikitu, ta kaba den e nòmber di JesuCristo. Kada bendishon, kada ordenanza, kada ordenashon, kada akto ofisial ta wòrdu hasí den e nòmber di JesuCristo. Ta Sú Iglesia, i ta nombrá na Dje – e Iglesia di JesuCristo di e Santu di e Delaster Dianan (wak D&C 115:4).

Tin e gran insidente ei den e Buki di Mormón kaminda e Nefitanan “tabata hasiendo orashona na e Tata den [Señor] su nòmber.” Señor a aparesé i puntra:

“Kiko boso ke pa mi duna boso?

“I nan a bisa na dje: Señor, nos ke pa bo bisa nos e nòmber pa medio di kua nos mester yama e iglesia aki; pasobra tin diskushon entre e pueblo tokante e kos aki.

“I Señor a bisanan: Di bèrdat, di bèrdat, mi ta bisa boso, dikón e pueblo mester murmurá i diskutí pa motibu di e kos aki?

“Nan no a lesa e skrituranan, ku ta bisa boso tin ku tuma riba boso e nòmber di Cristu, ku ta mi nòmber? Pasobra pa medio di e nòmber aki boso lo wòrdu yamá den e delaster dia;

“I kualke ku tuma mi nòmber riba dje, i perseverá te na fin, esei lo wòrdu salbá den e delaster dia. …

“Asina ku, kiko ku boso hasi, hasi’é den mi nòmber; di manera ku boso lo yama e iglesia den mi nòmber; i boso lo invoká e Tata den mi nòmber pa e bendishoná e iglesia pa mi motibu” (3 Nefi 27:2–7).

Ta Sú nòmber, JesuCristo, “riba mundu no tin nuin otro nòmber duná na hende, ku por salba nos” (Echonan 4:12).

Den Iglesia nos konose kén E tá: JesuCristo, e Yu di Dios. E ta e Primogenito di e Tata. E ta Esun ku a wòrdu matá i E ta esun ku a biba di nobo. E ta nos Mediador ku e Tata. “Kòrda ku ta riba e piedra di nos Redentor, ku ta Cristo, e Yu di Dios, ku bo mester edifiká bo fundeshi” (Helaman 5:12). E ta e anker ku ta wanta i protehá nos i nos famia dor di e tormentanan di bida.

Kada djadumingu rònt mundu kaminda kongregashonan ta reuní di kada nashonalidat òf lenga, e santa sena ta wòrdu bendishoná ku e mesun palabranan. Nos ta tuma riba nos e nòmber di Cristo i semper ta kòrdele. Esaki ta inkulká den nos.

E profeta Nefi a deklará, “Nos ta papia di Cristo, nos ta regosihá den Cristo, nos ta prediká di Cristo, nos ta profetisá di Cristo, i nos ta skibi segun nos profesianan, pa nos yunan por sá na kual medio nan mester mira pa remishon di nan pikanan” (2 Nefi 25:26).

Kada un di nos mester yega na nos propio testimonio personal di Señor JesuCristo. Despues nos ta komparti e testimonio ei ku nos famia i otronan.

Den tur esaki, laga nos kòrda ku tin un atversario ku personalmente ta buska di interrumpí e obra di Señor. Nos mester skohe kén nos ta sigi. Nos protekshon ta tan simpel manera di disidi individualmnente pa sigi e Salbador, hasiendo sigur ku fielmente nos keda na Su banda.

Den e Tèstamènt Nobo. Huan ta rejistrá ku tabata tin algun ku no tabata kapás di komprometé nan mes ku e Salvador i Su siñansanan, i “[for di e temporada ei] hopi di su disipelnan a bira bèk i no a kana huntu kunÉ mas.

“[Jesus] a puntra e diesdos disipelnan: “Basta boso tambe no ke bai, no?

“Simon Pedro a kontestá: ‘Señor, serka ken nos tin ku bai? Abo tin e palabranan ku ta duna bida eterno.

“Nos ta kere i nos a haña sa tambe ku Abo ta e Cristo, e Yu di e Dios bibu” (Huan 6:66–69).

Pedro a gana loke ku por wòrdu siñá pa kada disipulo di e Salvador. Di ta fielmente devoto na JesuCristo, nos ta akseptele komo nos Redentor i ta hasi tur loke ku ta den nos poder pa biba Sú siñansanan.

Despues di tur e añanan ku mi a biba i siña i sirbi, después di miyón di kilometer ku mi a viaha rónt mundo, ku tur loke ku mi a experensiá, tin un gran bèrdat ku lo mi ke kompartí. Esaki ta mi testimonio di e Salvador JesuCristo.

José Smith i Sidney Rigdon a rejistrá e sigiente despues di un experensia sagrado:

“I awor, despues di tur e tantu testimonionan ku a wòrdu duná di Dje, esaki ta e testimonio, e ultimo di tur, ku nos ta duna di Dje: Ku e ta bibu!

“Pasombra nos a mirele” (D&C 76:22–23).

Nan palabranan ta mi palabranan.

Mi ta kere i mi tin sigur ku Jesus ta e Cristo, e Yu di e Dios bibu. E ta bibu. E ta e Primogenito di e Tata, i dor di dje, i pa medio di dje, e mundunan ta i a wòrdu kreá, i e habitantenan di nan ta yunan hòmber i muhé di Dios (D&C 76:24).

Mi ta duna mi testimonio ku e Salvador ta bibu. Mi konosé Señor. Mi ta Su testigu. Mi sá di Su gran sakrifisio i amor eterno pa tur e yunan di Tata Selestial. Mi ta duna mi testimonio spesial den tur humildat pero ku siguransa absoluto den e nòmber di JesuCristo, amèn.