Gradesido den Kualkier Sirkunstansia
Pa Presidente Dieter F. Uchtdorf
Di Dos Konsehero den e Promé Presidensia
Nos no tin rason di ta yená ku gratitut, apesar di e sirkunstansianan den kua nos ta haña nos mes?
Durante e añanan, mi tabatin e oportunidat sagrado pa konosé hopi hende di kua nan pena tabata parse di a yega den profundidat di nan alma. Den e momentunan aki, mi a skucha na mi rumannan stimá i a sinti aflikshon ku nan tokante nan karganan. Mi a meditá riba kiko pa bisa na nan, i mi a lucha pa sa kon pa konsolá i sostené nan den nan pruebanan.
Hopi biaha nan aflikshon ta kousá pa loke pa nan ta parse fin di algu. Algun ta eksperensiá e fin di un relashon kariñoso, manera e fayesementu di un persona stima òf separashon di un miembro di famia. Otronan ta sinti ku nan ta konfrontando fin di speransa—e speransa di ta kasá òf haña yu òf superá un malesa. Otronan lo por ta konfrontando e fin di nan fe, ora stèmnan di konfushon i konflikto den mundu ta tenta nan pa kuestioná, hasta bandoná, lokual un biaha nan tabata sa di ta bèrdadero.
Tempran òf lat, mi ta kere ku nos tur ta eksperensiá tempunan ora ta manera ku nos mundu ta kayendo for di otro, lagando nos ta sinti nos mes so, frustrá, i sin kontròl.
E por pasa ku tur hende. Ningun hende no ta imun.
Nos Por ta Gradesido
Tur hende su situashon ta diferente, i e detayenan di kada bida ta úniko. Sinembargo, mi a si`na ku tin algu ku por kita e amargura ku por bini den nos bida. Tin un kos ku nos por hasi pa bida bira mas plasentero, mas alegre, hasta glorioso.
Nos por ta gradesido!
E lo por zona kontrario pa e sabiduria di mundu pa sugerí ku un persona ku ta kargá ku tristesa por duna danki na Dios. Pero esunnan ku pone e bòter di amargura un banda i na lugá hisa e kopa di gratitut por haña bebida purifikadó di sanashon, pas, i komprendementu.
Komo disípulonan di Cristu, nos ta wòrdu mandá pa “gradisí Señor [nos] Dios den tur kosnan,”1 pa “kanta na Señor ku gradisimentu,”2 i pa “laga [nos] kurason ta yen di gratitut na Dios.”3
Di kon Dios ta manda nos pa ta gradesido?
Tur Su mandamentunan ta duná pa hasi bendishonnan alkansabel pa nos. Mandamentunan ta oportunidatnan pa ehersé nos albedrio i pa risibí bendishonnan. Nos Tata Selestial amoroso sa ku skohe pa desaroyá un spiritu di gratitut lo trese nos berdadero alegria i gran felisidat.
Siendo Gradesido pa Kosnan
Pero algun lo por bisa, “Kiko mi tin pa ta gradesido p’e ora mi mundu ta kayendo for di otro?”
Kisas enfoká riba kiko nos ta gradesido p’e ta e aserkamentu. Ta difísil pa desaroyá yen spiritu di gratitut si nos gradisimentu ta solamente proporshonal na e kantidat di bendishonnan ku nos por konta. Bèrdat, tin biaha ta importante pa “konta nos bendishonnan frekuentemente—i tur hende ku a purba esaki sa ku nan ta hopi—pero mi no ta kere ku Señor ta spera di nos pa ta ménos gradesido den tempunan di prueba ku den tempunan di abundansia i ora kos ta fásil. Hecho ta, mayoria di e referensianan di skritura no ta papia di gratitut pa kosnan pero mas bien ta sugerí un sentimentu general òf aktitut di gratitut.
Ta fásil pa ta gradesido pa kosnan ora bida ta parse ku nos bida ta bayendo bon. Pero kiko anto di e tempunan ora lokual nos ta deseá p’e ta mustra for di nos alkanse?
Mi por sugerí pa nos mira gratitut komo un disposishon, un manera di bida ku ta para independiente di nos situashon aktual? Den otro palabranan, mi ta sugerí pa na lugá di ta “gradesido pa kosnan,” nos enfoká riba ta “agradesido den nos sirkunstansianan”—kualke sea ku nan por ta.
Tin un relato bieu di un weiter ku ta puntra un kliente si el a gusta e kuminda. E huéspet ta kontestá ku tur kos tabata bon, pero lo tabata mas mihó si nan a sirbi mas pan. E siguiente dia, ora e hòmber a bolbe, e weiter a dòbel e kantidat di pan, dunando e kuater slais en bes di dos, pero ainda e hòmber no tabata kontentu. E siguiente dia, e weiter a bolbe dòbel e kantidat atrobe, sin éksito.
Riba e di kuater dia, e weiter tabata masha desidido pa hasi e hòmber kontentu. Pues el a kue un pan di 3 meter largu, kòrt’é den mitar, i ku un sonrisa, el a sirbi esei na e kliente. E weiter apénas por a warda pa e reakshon dje hòmber.
Despues di e kuminda, e hòmber a wak ariba i a bisa, “Bon manera semper. Pero mi ta mira ku bo a bolbe duna dos slais di pan.”
Siendo Gradesido den nos sirkunstansianan
Rumannan, ta na nos pa skohe. Nos por skohe pa limitá nos gratitut, basá riba e bendishonnan ku nos ta sinti ku nos falta. Òf nos por skohe pa ta manera Nefi, ken su kurason gradesido nunka a faya. Ora su rumannan a mar’é riba e barku—ku e a traha pa hiba nan e tera primintí—su ènkelnan i pòlsnan tabata asina doloroso “ku nan a hincha masha tantu” i un bientu tormenta violento tabata menasá pa guli nan den e profundidat di e laman. “Sinembargo, “ Nefi a bisa, “Mi a wak na mi Dios, i mi a alab’é henter dia largu; i mi no a murmurá kontra Señor pa motibu di mi aflikshonnan.4
Nos por skohe di ta manera Job, ku tabata parse di tin tur kos pero despues a pèrdè tur kos. Ainda Job a respond’é bisando, “Sunú mi a sali for di seno di mi mama, i sunú lo mi regresá … : Señor a duna, i Señor a tuma; alabá sea e nòmber di Señor.”5
Nos por skohe pa ta manera e pioneronan Mormon, ku a permanesé gradesido durante nan biahenan lento i doloroso pa e Great Salt Lake, inkluso kantando i bailando i glorifikando den e bondat di Dios.6 Hopi di nos lo por tabata inkliná pa ta antipátiko, keha, i angustiá pa e difikultat di e biahe.
Nos por skohe pa ta manera profeta Joseph Smith, ku miéntras e tabata prizonero den kondishonnan miserabel den prison di Liberty, a skibi e palabranan aki: “Rumannan stimá, laga nos hasi ku alegria tur e kosnan ku ta den nos poder; i despues pa nos lo por para ketu, ku e siguransa mayor, pa mira e salbashon di Dios, i pa su brasa wòrdu revelá.7
Nos por skohe pa ta gradesido, no ta importá kiko pasa.
E tipo di gratitut aki ta surpasá kualkier kos ku ta pasando rònt di nos. E ta surpasá desilushon, desánimo, i desesperashon. E ta desaroyá mes un bon den sirkunstansia difísil komo den sirkunstansia plasentero.
Ora nos ta agradesido na Dios den nos sirkunstansianan, nos por eksperensiá pas suave mei- mei di tribulashon. Den tristesa, ainda nos por elevá nos kurasonnan den alabansa. Den doló, nos por gloria den Cristu su Ekspiashon. Ora nos ta sinti tristesa amargo, nos por eksperensiá e konsuelo i pas di influensia dibino.
Tin bia nos ta pensa ku sea gradesido ta lokual nos ta hasi despues ku nos problemanan a wòrdu solushoná, pero esei ta un perspektiva masha chikitu. Kuantu kos nos ta keda sin ripará den bida ora nos ta spera di mira e arko íris promé ku duna Dios danki pa e áwaseru?
Sea gradesido den tempunan di problema no ta nifiká ku nos ta kontentu ku nos sirkunstansianan. E ta nifiká ku pa medio di e wowonan di fe nos ta mira mas leu ku nos desafionan aktual.
Esaki no ta gratitut di boka pero di e alma. E ta un gratitut ku ta kura e kurason i inspirá nos pensamentunan.
Gratitut komo un Akto di Fe
Sea gradesido den nos sirkunstansianan ta un akto di fe den Dios. E ta pidi pa nos konfia Dios i spera pa kosnan ku nos lo no mira pero ku ta bèrdat.8 Siendo gradesido, nos ta sigui e ehèmpel di nos estimado Salbador, ku a bisa, “No mi boluntat, pero di bo, sea hasí.”9
Gratitut bèrdadero ta un ekspreshon di speransa i testimonio. E ta bini for di rekonosé ku nos no semper ta komprondé e pruebanan di bida pero konfiando ku un dia nos lo komprondé nan.
Den kualke sirkunstansia, nos sentido di gratitut ta nutrí pa e bèrdatnan abundante i sagrado ku nos ta konosé: ku nos Tata a duna Su yunan e gran plan di salbashon; ku pa medio di e Ekspiashon di Su Yu, JesuCristu, nos por biba pa semper ku e esunnan nos ta stimá; na final nos lo haña, kurpanan, glorioso, perfekto, i inmortal,sin karga di malesa òf inkapasidat; i ku nos lágrimanan di tristesa i pèrdida lo wòrdu remplasá ku un abundansia di felisidat i goso, “ bon midí, pushá abou, i sakudí huntu, i basha over.”10
Lo mester tabata e tipo di testimonio aki ku a transformá e Salbador Su Apòstelnan di miedoso, hòmbernan ku ta duda den mensaheronan sin miedu, i alegre di e Maestro. Den e oranan despues di Su Krusifikashon, nan a wòrdu yená ku desesperashon i tristesa, inkapas pa komprondé kiko a kaba di sosedé. Pero un evento a kambia tur esei. Nan Señor a aparesé na nan i a deklará, “Mira mi mannan i mi pianan, ta Ami mes.”11
Ora e Apòstelnan a rekonosé e Cristu resusitá—ora nan a eksperensiá e glorioso Resurekshon di na Salbador stimá—nan a bira hòmbernan diferente. Nada no por a stroba nan di kumpli ku nan mishon. Nan a aseptá ku kurashi i determinashon e tortura, humiliashon, i hasta morto ku lo bini na nan pa motibu di nan testimonio.12 Nan no tabata wòrdu prevení pa alabá i sirbi nan Señor. Nan a kambia e bidanan di hende tur kaminda. Nan a kambia e mundu.
Boso no tin mester di mira e Salbador, manera ku e Apòstelnan a hasi, pa eksperensiá e mes un transformashon. Boso testimonio di Cristu, ku ta bini di e Spiritu Santu, por yuda mira mas leu di e finalnan desepshonante den mortalidat i mira e futuro briante ku e Redentor di mundu a prepará.
Nos No Ta Trahá pa Finalnan
Konsiderando lokual nos sa tokante di nos destino eterno, ta un milager ku ki ora ku nos enfrentá fin amargo di bida, nan ta parse inaseptabel pa nos? Ta parse ku tin algu den nos paden ku ta resistí finalnan.
Di kon ta asina? Pasobra nos ta trahá di e stòf di eternidat. Nos ta sernan eterno, yunan di e Dios Todopoderoso, ken su nòmber ta Sinfin13 i ku ta primintí bendishonnan eterno sin kantidat. Finalnan no ta nos destino.
Mas nos siña tokante di e evangelio di JesuCristu, mas nos lo realisá ku e fin aki den mortalidat no ta fin at all. Nan ta meramente interupshonnan—pouzenan temporal ku un dia lo parse chikitu kompará ku e goso eterno ku ta warda esunnan fiel.
Mi ta masha gradesido na mi Tata Selestial ku den Su plan no tin fin bèrdadero, solamente kuminsamentu ku lo no kaba nunka.
Esunnan Ku ta Gradesido Lo Wòrdu Hasí Glorioso
Rumannan, nos no tin motibu pa ta yená ku gratitut, independientemente di nos sirkunstansianan den kua nos ta haña nos mes?
Nos tin mester di kualke motibu mas grandi pa laga nos kurasonnan “ta yen di gratitut pa Dios.14
“Nos no tin hopi motibu pa gosa?”15
Nos ta hopi bendishoná si nos ta rekonosé Dios su obra di man den e bida maravioso. Gratitut na nos Tata na Shelu ta amplia nos persepshon i ta klara nos bista. E ta inspirá humildat i desaroyá sentimentunan di simpatia pa nos próhimo i Dios su kreashon. Gratitut ta un katalisadó pa tur atributonan Christian! Un kurason gradesido ta e mayor di tur virtutnan.16
E Salbador a duna nos Su promesa ku esunnan “ku [risibí] tur e kosnan ku gradesimentu lo wòrdu hasí glorioso; i e kosnan di e mundu aki lo wòrdu duná aserka na [nan].”17
Mi ta spera ku nos “ta biba den gradisimentu tur dia18—spesialmente durante di e finalnan ku ta parse ineksplikabel i ku ta parti di mortalidat. Mi ta spera ku nos almanan lo hincha di gratitut pa nos Tata Selestial miserikordioso. Mi ta spera ku nos semper i konstantemente nos lanta nos bos i mustra den palabra i hecho nos gratitut pa nos Tata Selestial i na Su yu stimá. Pa esaki mi ta pidi, i laga na boso mi testimonio i bendishon, den e nòmber di JesuCristu, amèn.