Yunan Muhé den e Kombenio

Pa Presidente Henry B. Eyring

Promé Konsehero den e Promé Presidensia

E kaminda … ku nos mester tuma riba nos biahe di regreso na nos Tata Selestial … ta marká pa e kombenionan sagrado ku Dios.

Awe nochi nos a wòrdu siñá ku poder spiritual. Mi ta spera ku e palabranan papiá pa e gran rumannan lider aki lo bai den boso kurason manera nan a bai den di ami.

Esaki ta un reunion signifikante. Tur e muhénan di Iglesia di ocho aña di edat i mas bieu a wòrdu invitá pa bini huntu ku nos awe nochi. Hopi di nos a hasi orashon pa e Spiritu Santu por ta huntu ku nos. E bendishon ei a wòrdu duná ora nos a tende e rumannan aki papia i a skucha músika edifikante. Mi ta spera ku e Spiritu lo sigui ta huntu ku nos ora mi kompartí algun palabra di estímulo i testimonio den komplementashon na lokual a wòrdu bisá kaba—i partikularmente pa tèstifiká ku lokual a wòrdu bisá na nos ta lokual Señor lo tabata ke pa nos skucha.

Awe nochi lo mi papia tokante di e kaminda—ku nos mester tuma riba nos biahe di regreso na nos Tata Selestial. E kaminda ei ta marká pa e kombenionan sagrado ku Dios. Lo mi papia ku boso tokante di e goso di hasimentu i wardamentu di e kombenionan aki i yuda otronan pa warda nan.

Mayoria di boso a wòrdu boutisá resientemente i a risibí e don di e Spiritu Santu dor di pone mannan riba kabes. Pa boso e rekuerdo ei ta fresku. Otronan a wòrdu boutisá hopi tempu pasá, asina ku e rekuerdo di boso sentimentunan di e eksperensia di e kombenio ei por ta ménos kla, pero algun di e sentimentunan aki ta bini atrobe ki ora ku boso skucha e orashonnan sakramental.

Ningun hende lo no tin mes un eksperensiá ku e otro di e dia ku nos a hasi e kombenio sagrado di boutismo ei i a risibí e don di e Spiritu Santu. Pero nos kada un a sinti Dios su aprobashon. I nos a sinti un deseo pa pordoná i pa wòrdu pordoná i un oumento di determinashon pa hasi bon.

Kon profundo den nos kurason e sentimentunan aki a bai tabata motivá mas tantu pa e manera ku boso a wòrdu prepará pa personanan amoroso. Mi ta spera ku esunnan di boso ku a bini den e reino resientemente ta bendishoná di ta sintando serka di boso mama. Si ta asina, boso por dun’é un sonrisa di gradisimentu awor aki mes. Mi por kòrda e sentimentu di goso i gratitut ora mi tabata sintá patras di mi mama na kaminda pa kas despues di mi boutismo na Philadelphia, Pennsylvania.

Mi mama tabata esun ku kuidadosamente a prepará mi pa hasimentu di e kombenio ei i pa tur otronan ku lo sigui. E tabata fiel pa e responsabilidat aki di Señor:

Si mayornan tin yunan den Sion, òf den kualke di su stakanan organisá, e piká lo ta riba kabes di e mayornan si nan no a siña nan yunan pa komprondé e doktrinanan di arepentimentu, fe den Cristu e yu di e Dios bibu, boutismo, i e don di e Spiritu Santu dor di pone mannan riba kabes ora nan tin ocho aña.

Pasobra esaki lo bira un lei pa tur e habitantenan di Sion òf kualke di su stakanan organisá

I nan yunan lo mester wòrdu boutisá pa e remishon di nan pikánan ora nan tin ocho aña, i risibí e Spiritu Santu.¹

Mi mama a hasi su parti. El a prepará su yunan ku e palabranan meskos ku esunnan di Alma, manera registrá den e buki di Mormon:

Alma a bisa nan ku si nan tabatin deseo pa bini den e rebaño di Dios, i pa wòrdu yamá su pueblo, i tabata dispuesto pa karga otro su karga, pa nan lo por ta lihé;

I si nan ta dispuesto pa rou ku esunnan ku ta rou i konsolá esunnan ku tin nesesidat di konsuelo, i pa para komo testigu di Dios na tur tempu i den tur kosnan, i na tur lugánan ku nan por ta aden, hasta te na morto, pa nan por wòrdu redimí di Dios, i ta nombrá ku esunnan di e promé resurekshon, pa nan por haña bida eterno.

Alma a bisa nan ku si esaki tabata deseo di nan kurasonnan, kiko nan tin kontra di wòrdu boutisá den e nòmber di Señor, komo un testigu dilanti Dje pa nan a drenta den e kombenio ku n’E, pa nan por sirbi E i warda Su mandamentunan, pa E por deramá Su Spiritu mas na abundansia riba nan.

I ora e pueblo di Alma a skucha Alma su palabranan, nan a klap den nan mannan di goso, i a sklama ku esaki ta e deseo di nan kurasonnan.²

Boso lo no a klap boso mannan ora boso na promé instante a tende e invitashon pa drenta den un kombenio dor di boutismo, pero siertamente boso a sinti e amor di e Salbador i un obligashon mas grandi pa kuida otronan pa E. Mi por bisa “siertamente” pasobra e sentimentunan aki ta poné profundamente den e kurasonnan di tur Tata Selestial su yunan muhé. Esei ta parti di nos herensia dibino di Dje.

Boso a wòrdu siñá pa E promé boso a bini den e bida aki. El a yuda boso komprondé i aseptá ku boso lo haña pruebanan, tèstnan, i oportunidatnan skohé perfektamente solamente pa boso. Boso a siña ku nos Tata tabatin un plan di felisidat pa yuda boso pasa safe den e pruebanan i ku boso lo yuda trese otronan safe dor di nan pruebanan. E plan aki ta marká pa kombenionan ku Dios.

Nos ta liber pa skohe si nos ta hasi i warda e kombenionan ei. Solamente algun di su yunan muhé tin e oportunidat den e bida aki pa hasta siña tokante e kombenionan ei. Boso ta un di e pokonan ku ta favoresé. Boso, rumannan stimá, kada un di boso, ta un yu muhé den e kombenio.

Tata Selestial a siña boso promé ku boso a nase tokante di e eksperensianan ku boso lo haña ora boso bai lag’E i bini na mundu. Boso a wòrdu siñá ku e kaminda pa bolbe bèk serka Dje lo no ta fásil. E tabata sa ku e lo bira muchu difísil pa boso hasi e biahe sin yudansa.

Boso a wòrdu bendishoná no solamente pa deskubrí e kaminda pa hasi e kombenionan ei den e bida aki pero pa ta rondoná ku otronan ku lo yuda—ken, meskos ku boso, ta yunan muhé di kombenio di Tata Selestial.

Boso tur a sinti e bendishon di ta huntu awe nochi den kompania di yunan muhé di Dios ku tambe ta bou di kombenio pa yuda i guia boso manera nan a primintí pa hasi. Mi a mira lokual boso a mira ora rumannan den kombenio ta warda e kompromiso pa konsolá i yuda—i ta hasié ku un sonrisa.

Mi ta kòrda e sonrisa di Hermana Ruby Haight. E tabata e esposa di Elder David B. Haight, ku tabata un miembro di e Quorum di e Diesdos Apòstelnan. Komo un hòmber hóben el a sirbi komo presidente di staka di Palo Alto na California. El a hasi orashon pa, i tabata prekupá pa e muchanan muhé di klas di Damitas den su mesun bario.

Asina ku Presidente Haight tabata inspirá pa pidi e obispu pa yama Ruby Haight pa siña e muchanan muhé hóben aki. E tabata sa ku e lo ta un testigu di Dios ku lo por elevá, konsolá, i stima e muchanan muhé den e klas aki.

Hermana Haight tabata por lo ménos 30 aña mas grandi ku e muchanan ku e tabata duna lès. Tòg 40 aña despues ku el a siña nan, kada biaha ku e topa ku mi esposa, ku tabata un di e muchanan den su klas, e lo pone su man, i hari, i bisa na Kathy, “O! Mi Damita.” Mi a mira mas ku un sonrisa. Mi a sinti su amor profundo pa un ruman ku ainda e tabata stima manera ku tabata su mesun yu muhé. Su sonrisa i kumindamentu kariñoso tabata bini dor di mira ku un ruman i yu muhé di Dios ainda tabata riba e kaminda di kombenio pa bai kas.

Tata Selestial tambe ta kontentu ku boso ki ora ku E mira boso yuda un di Su yunan muhé bai dilanti riba e kaminda di kombenio pa bida eterno. I e ta komplasé kada biaha ku boso purba pa skohe e bon. E ta mira no solamente kiko boso ta pero kiko boso por bira.

Boso por tin un mayor terenal ku a pensa ku boso lo bira mas mihó ku boso a pensa ku boso lo bira. Ami tabatin un mama asina.

Lokual mi no tabata sa tempu mi tabata hóben tabata ku mi Tata Selestial, boso Tata Selestial, ta mira potensial mas grandi den su yunan ku nos òf hasta nos mamanan terenal ta mira den nos. I kada biaha ku boso bai dilanti riba e kaminda pa boso potensial, e ta trese felisidat pa E. I boso por sinti Su aprobashon.

E ta mira e potensial glorioso aki den tur Su yunan muhé unda ku nan ta. Awor, esei ta pone un responsabilidat grandi riba kada un di boso. E ta spera boso pa trata kada persona ku boso topa komo un yu di Dios. Esei ta e motibu ku E ta manda nos pa stima nos próhimo manera nos ta stima nos mes i pa pordoná nan. Boso sentimentunan di bondat i pordonamentu na otronan ta bini komo boso herensia di Dje komo Su yunan muhé. Kada persona ku boso topa ta Su yu spiritual stimá.

Manera boso ta sinti di e gran hermandat aki, lokual ku nos ta pensa ta parti nos, ta kai afó. Por ehèmpel, rumannan hóben i bieu ta kompartí nan sentimentunan ku e speransa di wòrdu komprondé i aseptá. Boso ta mas igual komo yunan muhé di Dios ku boso ta diferente.

Ku e bista aki, muhénan hóben mester mira dilanti na nan entrada den Sosiedat di Sokoro komo un oportunidat pa hasi nan sírkulo di rumannan mas grandi kual nan lo yega di konosé, atmirá, i stima.

E mesun abilidat pa mira kiko nos por bira ta oumentando den famianan i Primaria. E ta pasando den nochi di hogar i den programanan di Primaria. Muchanan chikitu ta wòrdu inspirá pa bisa kosnan grandi i maravioso, meskos ku nan a hasi ora e Salbador lòs nan lenga ora el a siña nan despues ku El a resusitá.³

Miéntras Satanas por ta atakando rumannan na edat yòn, Señor ta inspirá rumannan na nivelnan hopi haltu di spiritualidat. Por ehèmpel, mujeres jovenes ta siñando nan mamanan kon pa usa FamilySearch pa haña i salba nan antepasadonan. Algun rumannan hóben ku mi konosé ta skohiendo pa bai mainta tempran pa hasi obra vikario di boutismo den tèmpelnan sin ningun urgensia eksepto e Spiritu di Elias.

Den mishonnan rònt mundu, hermananan ta wòrdu yamá pa sirbi komo lidernan. Señor a krea e nesesidat pa nan servisio dor di toka e kurasonnan di e hermananan den kantidat mas grandi pa sirbi. Mas ku algun presidentenan di mishon a mira e hermana mishoneronan bira kada biaha mas poderoso komo proselistanan i komo lidernan kuidadó.

Sea ku boso ta sirbi òf no komo mishonero di tempu kompletu, boso por gana mes un abilidat pa enrikesé boso matrimonio i e kapasidat di lanta yunan honorabel dor di sigui e ehèmpelnan di muhénan grandioso.

Pensa riba Eva, e mama di tur ser bibu. Elder Russel M. Nelson a bisa esaki di Eva: “Nos i henter humanidat ta pa semper bendishoná di Eva su gran kurashi i sabiduria. Dor di a partisipá promé di e fruta, el a hasi lokual mester a wòrdu hasí. Adam tabata sufisientemente sabio pa hasi meskos.”⁴

Kada yu muhé di Eva tin e potensial pa trese e mesun bendishonnan na nan famia ku Eva a trese na esun di dje. E tabata asina importante den establesementu di famianan ku nos tin e informashon aki di su kreashon: Diosnan a bisa ku Nan mester traha un ayuda idoneo pa e hòmber, pasobra no ta bon pa e hòmber ta su so, p’esei Nan lo forma un ayuda idoneo p’e.”⁵

Nos no sa tur e maneranan ku Eva tabata un ayuda pa Adam i pa nan famia. Pero nos sa di e gran don ku el a duna, lokual kada un di boso tambe por duna: el a yuda su famia mira e kaminda pa bai kas ora e kaminda tabata difísil pa wak. Den e buki di Moisés nos ta lesa ku Eva, esposa di Adam, a tende tur e kosnan aki i tabata kontentu, bisando: Si e no tabata pa nan transgreshon nan nunka lo por ta tin yu, i nunka tabata sa e bon di e malu, i e goso di nan redenshon, i e bida eterno lokual Dios ta duna na tur e obedientenan.⁶

Boso tin su ehèmpel pa sigui.

Pa revelashon, Eva a rekonosé e kaminda na Dios. E tabata sa ku e Ekspiashon di JesuCristu a hasi bida eterno posibel den famianan. E tabata sigur, meskos ku boso por ta, ku si e warda su kombenionan ku su Tata Selestial, ku e Redentor i e Spiritu Santu lo yuda e i su famia dor di kualke sufrimentu i desepshon ku lo bini. E tabata sa ku e por a konfia den Nan.

“Konfia den Señor ku henter bo kurason; i no konfia den bo mesun pensamentu;

“Rekonosé den tur bo kamindanan, i e lo guia bo kamindanan.”⁷

Mi sa ku Eva a eksperensiá sufrimentu i desepshonnan, pero mi sa tambe ku el a haña goso den konosementu ku e i su famia por regresá pa biba ku Dios. Mi sa ku mayoria di boso ku ta aki ta eksperensiá sufrimentu i desepshonnan. Mi ta laga un bendishon pa boso ku, meskos ku Eva, boso lo por sinti e mesun goso ku el a sinti, ora boso ta biaha bèk.

Mi tin un testimonio sigur ku Dios e Tata ta kuida boso den amor. E ta stima kada un di boso. Boso ta Su yunan muhé den e kombenio. Pasobra E ta stima boso, E lo duna e yudansa ku boso mester pa hiba boso mes i otronan dilanti riba e kaminda di regreso na Su presensia.

Mi sa ku e Salbador a paga e presio pa tur nos pikánan i ku e Spiritu Santu ta tèstifiká di bèrdat. Boso a sinti e komodidat den e reunion aki. Mi tin un testimonio ku tur e yabinan ku ta mara kombenionan sagrado a wòrdu restourá. Nan ta wòrdu tené i ehersé awendia pa nos profeta bibiente Presidente Thomas S. Monson. Mi ta laga e palabranan aki di konsuelo i speransa na boso, Su yunan muhé stimá di kombenio, den e nòmber di JesuCristo, amèn.