”Si Bo Stima Mi, Warda Mi Mandamentunan”

Elder Robert D. Hales

Di e Quorum di e Diesdos Apòstel

Imagen

Usa bo albedrio pa obedesé ta nifiká pa “hasi loke ta korekto [i laga] e konsekuenshanan sigui.”

Rumannan, di tur e lèsnan ku nos ta siña di e bida di e Salbador, niun no ta mas bisto i poderoso ku e lès di obediensia.

E Ehèmpel di e Salbador

Den e konseho selestial [den e bida] premortal, Lucifer a rebeldia kontra e Plan di Tata Selestial. Esnan ku a sigui Lucifer a stòp nan progreso eterno—ta kouteloso ken bo ta sigui!

E ora ei Jesus a ekspresá Su kompromiso pa obedesé, bisando, “Tata, Bo boluntat sea hasí, i e gloria lo ta pa Bo pa semper.”¹ Durante Su Ministerio, “El a sufri tentashon, pero no a pone atenshon na esaki.”² Efektivamente, “E [a siña] obediensia dor di e kosnan ku El a sufri.”³

Dor ku nos Salbador tabata obediente, El a ekspiá pa nos pikanan, hasiendo posibel nos resurekshon i preparando e kaminda pa nos por regresá serka nos Tata Selestial, Ken tabata sa ku nos lo kometé erornan segun nos ta siando den mortalidat. Ora nos obedesé, nos ta aseptá Su sakrifisio, pasó nos ta kere ku pa medio di e Ekspiashon di Cristu, e género humano por wòrdu salbá, dor di obediensia na e leinan i ordenansanan i e mandamentunan duná den e Evangelio.⁴

Jesus a siña nos pa obedesé den idioma simpel ku ta fásil pa komprendé: “Si bo stima Mi, warda Mi mandamentunan.”⁵ i “Bin i sigui Mi.”⁶

Ora nos wòrdu boutisá, nos ta “tuma riba nos e nòmber di Cristu” i ta drenta “den e konvenio ku Dios ku [nos lo] ta obediente te na final di [nos] bida.”⁷Kada djadumingu nos ta renobá e konvenio di boutismo ei dor di partisipá di e Santa Sena i testifiká ku nos ta dispuesto pa warda e mandamentunan. Nos ta buska pordon pa tur pensamentunan, sentimentunan òf akshonnan ku no ta den harmonia ku e boluntat di nos Tata Selestial. Ora nos ta repentí dor di kita for di desobediensia i kuminsá na obedesé atrobe, nos ta mustra nos amor p’E.

Sorto di Obediensia

Ora nos ta biba e Evangelio, nos ta progresá den komprenshon di obediensia. Tin biaha nos por wòrdu tentá pa praktiká, loke ami ta yama, “obediensia di e hòmber natural,” kaminda nos ta rechasá, dor di desobedensia, e lei di Dios dunando preferensha na nos sabidoria, nos deseonan òf asta na nos popularidat. Pasó esaki ta wòrdu praktiká ampliamente dir di hopi, e pervershon aki di obediensia ta disminuí e normanan di Dios den nos kultura i nos leinan.

Tin biaha nos por partisipá den “obediensia selektivo,” pretendiendo di stima Dios i honra Dios, miéntras ta piki i skohe kua mandamentunan i enseñansanan—i e enseñansanan i konsehonan di Su profetanan—ku nan lo sigui kompletu.

Tin algun ku ta obedesé selektivo pasó nan no por persibí tur e motibunan pa un mandamentu, meskos ku muchanan no semper ta komprondé rasonnan pa e e konsehonan i reglanan di nan mayornan. Pero semper nos sa e motibu pa sigui e profeta, pasó esaki ta e Iglesia di JesuCristu, i ta e Salbador ken ta dirigí Su profetanan den tur dispensashon.

Segun nos entendimentu di obediensia profundisá, nos ta rekonosé e papel importante di albedrio. Ora Jesus tabata den e hardin di Getsemane, El a resa tres biaha na Su Tata Selestial, “O mi Tata, si ta posibel, laga e kopa aki pasa di Mi: sinembargo no Mi boluntat, pero [segun] Bo boluntat.”⁸ Dios lo no kita e albedrio di e Salbador, sinembargo El yen di mizèrikòrdia a manda un angel pa fortalesé Su Yu Stimá.

E Salbador a konfrontá otro prueba na Golgota, kaminda E por a yama legionnan di angel pa bah’é for di krus, pero El a tuma su propio desishon pa perseverá obedientemente te na final i kompletá Su sakrifisio ekspiatorio, maske esaki tabata nifiká hopi sufrimentu i asta morto.

Obediensia spiritualmente maduro ta “e obediensia di e Salbador.” E ta motivá pa un amor berdadero pa e Tata Selestial i [pa] Su Yu. Ora nos obedesé boluntariamente, manera e Salbador a hasi, nos ta apresiá e palabranan di nos Tata Selestial: “Esaki ta Mi Yu stima, den ken Mi ta komplasí.”⁹ I nos ta spera di tende ora nos drenta den presensha di nos Tata Selestial, “Bon, abo siervo bon i fiel … drenta … den e goso di Señor.”¹⁰

Usando nos albedrio pa obedesé ta nifiká pa “hasi loke ta bon [i laga] e konsekuensha sigui.”¹¹ E ta rekerí outo-dominio i e ta trese konfiansa, felisidat eterno, i un sentido di kumplimentu pa nos i, dor di ehèmpel, pa esnan rònt di nos: i semper e ta inkluí un kompromiso personal profundo pa sostené e lidernan di Saserdosio i sigui nan enseñansanan i konseho.

Konsekuenshanan

Den nos eskoho si nos lo obedesé, semper e ta útil pa kòrda e konsekuenshanan di nos eskohonan. Lucifer i su siguidonan a komprondé e konsekuenshanan di nan eskohonan? Si ta asina, dikon nan a tuma un desishon asina teribel? Nos por puntra nos mes un pregunta similar: dikon nos ta skohe pa ta desobediente kaminda nos sa e konsekuensha eterno di piká? E skritura ta proveé un kontesta: e motibu ku Cain i algun di e yunan di Adam i Eva a skohé pa desobedesé ta pasó “nan tabata stima Satanas mas ku Dios.”¹²

Nos amor pa e Salbador ta e yabi pa obediensia manera esun di e Salbador. Miéntras nos ta esforsá pa obedesé den e mundu di awendia, nos ta deklará nos amor i rèspèt pa tur e yunan di Tata Selestial. Sinembargo e ta imposibel dor di e amor pa otronan aki pa modifiká e mandamentunan di Dios, ku a wòrdu duná pa nos bon! Komo ehèmpel, e mandamentu “Lo bo no … mata, òf hasi nada similar”¹³ ta fundá riba lei spiritual ku ta protehé tur e yunan di Dios, asta esnan ku no a nase ainda. Eksperensha di hopi tempu ta sugerí ku si nos ignorá e lei aki, mesora tristesa ta bin. Sinembargo hopi ta pensa ku ta aseptabel pa terminá e bida di un mucha ku no a nase ainda pa rasonnan di preferensha òf konviniensia.

Pa rasionalisá desobediensia no ta kambia e lei spiritual òf e konsekuenshanan pero ta kondusí na konfushon, instabilidat, desviando riba kamindanan straño, ta pèrdí i tristesa. Komo disípulonan di Cristu, nos tin e obligashon sagrado pa respetá Su leinan i mandamentunan i e kombenionan ku nos ta tuma riba nos mes.

Den desèmber mil ochoshentitrintiun, algun di e rumannan a wòrdu yamá pa yuda kalma sentimentunan hostil ku a desaroyá kontra di e Iglesia. Pa medio di e Profeta Jose Smith, e Señor a dirigí nan di un manera inusual, i asta sorprendente:

“Konfundí bo enemigunan: yama nan pa topa ku bo tanta den públiko komo den priva …

“P’esei, laga nan trese nan motibunan potente kontra di e Señor.

“… Niun arma, ku a wòrdu trahá, lo prosperá kontra bosonan:

“I si algun hòmber lanta su bos kontra di bo, el lo wòrdu konfundí den mi propio tempu.

“P’esei, warda mi mandamentunan: nan ta bèrdat i fiel.”¹⁴

Lèsnan den Skrituranan

E skrituranan ta yen di ehèmpel di profetanan ku a siña e lèsnan di obediensia dor di nan propio eksperensha.

Jose Smith a wòrdu siñá e konsekuenshanan di sede pa e preshon di un amigu i skirbidó Martin Harris. Komo kontesta riba e súplika di Martin, Jose a puntra e Señor pa pèrmit pa fia e promé shentidieseis páginanan di e manuskrito di e Buki di Mormon, pa Martin por mustra esaki na su famia, pero e Señor a bisa Jose pa bisa no. Martin a roga Jose pa puntra Señor atrobe. Despues di e di tres petishon e Señor a duna pèrmit pa sinku hende spesífiko pa revisá e manuskrito. “Den un pakto mas sagrado Martin a mara su mes na e akuerdo aki. Ora el a yega kas, i el a wòrdu poné bou preshon, el a lubidá e huramentu sagrado i a pèrmití otronan pa wak e manuskrito, ku e resultado ku dor di artemania el a pèrdè posishon di nan.”¹⁵ Komo konsekuensha, Jose a wòrdu reprendé dor di Señor i a wòrdu nengá e pèrmit pa tradusí e Buki di Mormon. Jose a sufrí i a repentí di su transgreshon di sede pa e preshon di otronan. Despues di un tempu, Jose a wòrdu pèrmití pa reanudá e obra di tradukshon. Jose a siña un lès balioso di obediensia ku a sirbié pa e restu di su bida!

E profeta Moises a proveé un otro ehèmpel. Ora Moises obedientemente a tuma komo kasá un muhé di Etiopia, Miriam i Aaron a papia kontra di esaki. Pero Señor a reprendé nan, bisando, “Ku [Moises] lo mi papia di boka pa boka.”¹⁶ Señor a usa e insidente inkreibel aki pa siña miembronan di e Iglesia den nos dispensashon. Den mil ochoshentitrinta, Hiram Page a afirmá di a risibí revelashon di e Iglesia. E Señor a korigié i a siña e Santunan, “Boso lo ta obediente na e kosnan ku Ami lo duna [Jose], meskos ku Aaron,”¹⁷ “pasó e ta risibí nan meskos ku Moises.”¹⁸

Obediensia ta trese bendishon, “i ora nos optené kualke bendishon, ta pa obediente na e lei riba kua e ta basá.”¹⁹

Obediensia ta wòrdu siñá dor di ehèmpel. Dor di kon nos ta biba, nos ta siña nos yunan: “Siña sabiduria den bo hubentut: si siña den bo hubentut pa warda e mandamentunan di Dios.”²⁰

Obediensia ta hasi nos progresivamente mas fuerte, kapas di perseverá tèst i pruebanan grandi den futuro. Obediensia den Getsemane a prepará e Salbador pa obedesé i perseverá te na e fin na Golgota.

Mi rumannan stimá, e palabranan di Alma ta ekspresá e sentimentunan di mi kurason:

“I awor mi rumannan stimá, mi a bisa boso e kosnan aki pa asina mi por lanta den bosonan un sentimentu di boso deber na Dios, pa boso por kana sin kulpa dilanti di Dje. …

“I awor, ami lo ke pa boso ta humilde, i ta sumiso i gentil: …di ta diligente den warda e mandamentunan di Dios na tur momento.”²¹

Mi ta duna mi testimonio spesial ku nos Salbador ta biba. Pasó El a obedesé, “tur rudia lo dobla, i tur lenga lo konfesá. ku E ta [nos Salbador].”²² Ku nos stim’É asina profundo i ker’É asina kompleto ku nos tambe ta obedesé, warda Su mandamentunan, i regresá pa biba ku n’E pa semper den e Reino di nos Dios ta mi orashon den e nòmber di JesuCristu, amèn.