“No Tin Miedo; Ami ta Huntu ku Bo”
Pa Jean A. Stevens
Promé Konsehera den e Presidensia General di Primaria
Segun nos ta desaroya fe i konfiansa mas grandi den Señor, nos por tin akseso na Su poder pa bendishoná i librá nos.
Poko sentimentunan ta kompara ku e emoshon tiernu di bira tata of mama. No tin nada mas dushi ku resibi un presioso baby, direktamente di shelu. Un di mi rumannan homber a eksperensiá e sentimentu aki den un manera specialmente intensu. Su promé yu homber chikitu a nase prematuro i solamente a pisá 2 liber i 14 ons (1.3 kg). Hunter a keda su prome dos luna di bida den e unidat di kuido intenso neonatal di e hospital. E lunanan ei tabata un tempu tiernu pa tur e famia mientras ku nos a spera i pidi Señor pa Su ayudo.
Hunter chikitu tabata tan dependiente. El a lucha pa adkiri e forsa nesesario pa biba. E man fuerte di su tata amoroso hopi biaha a ekstendé na e man chikitin di su yu homber pa anima su yu chikitu vulnerabel.
I asina e ta pa tur Dios su yunan. Nos Tata na Shelu ta ekstende man na kada un di nos ku Su amor infinitu. E tin poder riba tur kos i ta deseá pa yuda nos siña, krese, i bolbe na dj’E. Esaki ta definá e propositu di nos Tata: “pa trese dilanti e inmortailidat i bida eterno di homber.”1
Segun nos ta desaroya fe i konfiansa mas grandi den Señor, nos por tin akseso na Su poder pa bendishoná i librá nos.
E Buki di Mormon ta tehe e bunita lema aki di Señor su poder pa libra Su yunan den su paginanan. Nefi ta introdusi’é den e promé kapitulo di e buki. Den versikulo 20, nos ta lesa, “Pero mira, ami, Nefi, lo mustra na boso ku e tierno miserikordia di Señor ta riba tur esnan ku el a skohe, pa motibu di nan fe, pa hasinan fuerte te na e poder di librashon.”2
Hopi aña pasa mi a haña sa den un manera hopi personal e berdadnan ekspresá den e versikulo aki. Mi a haña sa djis kon serka nos Tata na Shelu berdaderamente ta i djis kon hopi E ta deseá di yuda nos.
Un anochi ora e tabata birando skur, mi tabata koriendo ku mi yunan ora mi a ripara un mucha homber kandando su so riba e kaya. Despues di pas’é, mi tabatin e sentimentu distintu ku mi mester a bai bek i yud’é. Pero preokupá ku e por a dun’é miedu pa tin un hende straño para su auto banda di dj’é anochi, mi a kontinuá kore. E impreshon fuerte a bini atrobe ku e palabranan den mi mente: “Bai yuda e mucha homber ei!”
Mi a kore bek serka dj’é i a puntra, “Bo mester algun ayudo? Mi tabatin un sentimentu ku mi mester yuda bo.”
El a bira serka nos i ku lagrimanan koriendo riba su wangnan a bisa, “Bo lo hasi esei? Mi tabata hasiendo orashon pa un hende bin yuda mi.”
Su orashon pa ayudo a wordu kontestá ku e inspirashon ku a bini na mi. E eksperensia di resibi direkshon tan klaru for di e Spiritu a laga un impreshon inolvidabel ku ta ainda den mi kurason.
I awor despues di 25 aña i dor di un tierno miserikordia, mi a konekta di nobo ku e mucha homber aki pa prome biaha djis un par di luna pasa. Mi a diskubri ku e eksperensia no ta solamente mi storia—e ta su storia tambe. Deric Nance awor ta un tata ku un famia di su mes. E tampoko nunka a lubida e eksperensia aki. El a yuda nos pone un fundeshi di fe ku Dios ta skucha i kontesta nos orashonnan. Tur dos di nos a us’e pa siña nos yunan ku Dios ta observando riba nos. Nos no ta nos so.
E anochi ei, Deric a keda despues di skol pa un aktividat i a perde e ultimo bus. Manera un hoben jong, e la sinti sigur ku e pora yega kas, asina ku el a kuminsa kana.
Un ora i mei a pasa kandando e kaya ketu ei. Ainda un distansia largu for di su kas i ku niun kas den bista e tabatin miedu. Desespera, el a kana bai tras di un pila di piedranan, a hinka rodiya, i a pidi Tata Selestial pa ayudo. Djis algun minüt despues Deric a bolbe riba e kaya, i ami a stop pa proveé e ayudo ku el a pidi p’é den orashon.
I awor e hopi añanan despues, Deric ta reflehá: “Señor tabata konsiente di mi, un mucha homber flaku i ku bista kortiku. I apesar di tur e otro kosnan pasando den e mundu, E tabata sa di mi situashon i a stima mi sufisientemente pa manda ayudo. Señor a kontesta mi orashonnan hopi biaha despues di e banda di kaya abandoná ei. Su kontestanan no semper ta mesun inmediato i kla, pero Su konsiensiá di mi ta djis mesun evidente awe ku e tabata e anochi ketu ei. Ki ora ku e sombranan skur di bida pasa den mi mundu, mi sa E semper tin un plan pa hiba mi siguramente bek na mi kas.”
Manera Deric a ekspresá, no kada orashon ta wòrdu kontestá asina lihé. Pero di berdad nos Tata konose nos i ta tende e suplikashonnan di nos kurasonnan. E ta kumpli Su milagernan un orashon i un persona, un pa un.
Nos por konfia ku E lo yuda nos, no nesesariamente den e manera ku nos kier pero den e manera ku lo ta yuda nos krese miho. Sometiendo nos voluntad na esun di dj’E por ta difisil, pero e ta esenshal pa bira manera E i haña e pas E ta ofresé nos.
Nos por yega di sinti, manera C. S. Lewis a deskribí: “Mi ta hasi orashon pasobra mi no por yuda mi mes. … Mi ta hasi orashon pasobra e nesesidat ta sali for di mi tur ora, spierto i drumi. E no ta kambia Dios. E ta kambia ami.”3
Tin hopi kuentonan den e skrituranan di esnan ku a pone nan konfiansa den Señor i kende a wordu yudá i librá p’E. Pensa riba e hoben David, kende a skapa un mortu sigur na e man di e Goliath grandi pa konfiando riba Señor. Konsidera Nefi, kende su rogamentu na Dios ku fe a tres’e librashon for di su rumannan homber kende a buska pa kita su bida. Korda e hoben Jose Smith, kende a buska ayudo di Señor den orashon. El a wordu librá for di e poder di skuridat i a resibí un kontesta milagroso. Kada un a enfrenta retunan real i difisil. Kada un a aktua den fe i a pone su konfiansa den Señor. Kada un a resibi Su ayudo. I ainda den nos dia, Dios su poder i amor ta wordu manifestá den e bidanan di Su yunan.
Mi a wak e recientemente den e bidanan di Santunan yená ku fe na Zimbabwe i Botswana. Durante un reunion di ayuno i testimonio den un rama chikitu, mi a sinti humildiá i inspirá pa e testimonionan kompartí di hopi hende—muchanan, hobennan, i adultonan igual. Kada ken a komuniká un ekspreshon podersoso di fe den e Señor JesuCristo. Ku retunan i sirkunstansianan difisil ront di nan, nan ta biba kada dia dor di pone nan konfiansa den Dios. Nan ta rekonose Su man den nan bidanan i hopi biaha ta ekspresa esei ku e frase “Mi ta asina hopi agradisi pa Dios.”
Algun añanan pasa un famia fiel a duna un ehempel pa miembronan di nos bario di e mesun konfiansa ei den Señor. Arn i Venita Gatrell tabata bibando un bida felis ora Arn a wordu diagnostiká ku un kanser agresivo. E prognostika tabata devastador—e tabatin djis un paar di siman mas pa biba. E famia tabata kier ta huntu un biaha mas. Asina ku tur e yunan a bini huntu, algun di distansianan largu. Nan tabatin solamente 48 ora presioso pa pasa huntu. E famia Gatrell kuidadosamente a skohe kiko tabata di mayor importansia pa nan—un portet di famia, un dinner huntu komo famia, un seshon den e tempel di Salt Lake. Venita a bisa, “Ora nos a sali for di e portanan di tempel, e tabata e ultimo biaha ku nos tabata huntu den e bida aki.”
Pero nan a sali ku e siguransa ku tin asina hopi mas pa nan ku djis e bida aki. Pasobra di e sagrado kombenionan di tempel, nan tin speransa den Dios su promesanan. Nan por ta huntu pa semper.
E siguiente dos luna tabata yen ku bendishonnan demasiado mucho pa konta. Arn i Venita nan fe i konfiansa den Señor tabata kresiendo, manera tabata evidente den Venita su palabranan: “Mi a wordu kargá. Mi a siña ku bo por sinti pas mei mei di konfushon. Mi sa ku Señor tabata wakiendo pa nos. Si bo ta konfiá den Señor, berdaderamente bo por vense tur e retunan di bida.”
Un di nan yunan muhé a bisa: “Nos a mira nos mayornan i a wak nan ehempel. Nos a mira nan fe i kon nan a deal ku ne. Nunka mi lo a pidi pa e prueba aki, pero mi nunka no lo dun’e afo. Nos tabata rondoná ku Dios su amor.”
Naturalmente, Arn su morto no tabata e resultado e famia Gatrell a spera p’e. Pero nan krisis no tabata un krisis di fe. E evangelio “no ta peso; e ta halanan.”4 E ta karga nos. El a karga e famia Gatrell. Nan a sinti pas mei mei di e storm. Nan a wanta duro na otro i na kombenionan di tempel ku nan a hasi i warda. Nan a krese den nan kapasidat pa konfia den Señor i a wordu fortalesa pa nan fe den JesuCristo i den Su poder ekspiadó.
Na unda ku ta ku nos ta haña nos mes riba e kaminda di disipulado, no importa kiko nos preokupashonnan i retunan por ta, nos no ta nos so. Boso no ta wòrdu lubida. Manera Deric, e Santunan di Afrika, i e famia Gatrell, nos por skohe pa ekstende man pa Dios su man den nos tempunan di nesesidat. Nos por enfrenta nos retunan ku orashon i konfiansa den Señor. I den e proseso nos ta bira mas manera E.
Papiando na kada un di nos, Señor ta bisa, “No tin miedo; … Ami ta huntu ku bo: No perde animo; pasobra Ami ta bo Dios: Mi lo duna bo forsa; … Mi lo yuda bo; si, mi lo sostene bo ku e man drechi di mi rektitud.”5
Mi ta komparti mi humilde pero sigur testigu ku Dios nos Tata konose nos personalmente i ta ekstende man pa yuda nos. Dor di Su Yu Stima, JesuCristo, nos por vensé e retunan di e mundu aki i wórdu siguramente entregá na kas. Ku nos tin fe pa konfia den dj’E, mi ta pidi den e nomber di JesuCristo, amen.